၂၀၂၃ နံၣ် ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် အတၢ်အိၣ်သး

၂၀၂၃ နံၣ် လါအီးကထိဘၢၣ် (၁၄) သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ကီၢ်ရ့ၣ်ဒူသထူၣ်, ကီၢ်ရ့ၣ်တီအူ, ကီၢ်ရ့ၣ်ချၢၣ်လွံၢ်ထူၣ်, ကီၢ်ရ့ၣ်ဘျံးဒဝဲၢ်, မုၢ်တြီၢ်ကီၢ်ရ့ၣ်, ကီၢ်ရ့ၣ်ဒူပျၥ်ယၥ် ဟီၣ်ကဝီၤပူၤ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ် အနီၣ်ဂံၢ် ခဲလၢၥ်အိၣ်လံဝဲ (၇၁၇၆၂၆) ဂၤလံန့ၣ်လီၤ.
ကမျၢၢ်ဖိလၢ ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်အီၣ်တၢ်အီ, တၢ်အိၣ်တၢ်ဆိး တၢ်ဂ့ၢ်ကီသ့ၣ်တဖၣ် အါမးန့ၣ်လီၤ. ၂၀၂၃ နံၣ် အတီၢ်ပူၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဃုကျဲဒီး ရဲၣ်ကျဲၤန့ၢ်ဝဲ ကမျၢၢ်ဖိလၢ ဃ့ၢအိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် တၢ်အီၣ်မိၣ်ပှၢ် ဒ်အမ့ၢ် ဟုသး ဒီး တၢ်အီၣ်အဂၤသ့ၣ်တဖၣ် န့ၢ်ဝဲဟံၣ်ဒူၣ် (၅၄၄၉၄) ဒူၣ် ကမျၢၢ်နီၣ်ဂံၢ် (၂၆၉၆၃၁) ဂၤ ဒီး တၢ်လၢၥ်ဘူၣ်လၢၥ်စ့ၤခဲလၢၥ် လီၤလၢစ့ယိၤ (၉) ကကွဲၢ်န့ၣ်လီၤ.
ကမျၢၢ်ဖိလၢ တဒိးန့ၢ်ဘၣ်ဝဲ တၢ်အီၣ်တၢ်အီ တၢ်ဆီၣ်ထွဲမၤစၢၤသ့ၣ်တဖၣ် အိၣ်ဒံးဝဲအါမးအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကျဲးစၢးဃုကျဲ ဒ်သိးကမျၢၢ်ဖိလၢ ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် ကဒိးန့ၢ်ဘၣ် တၢ်ဆီၣ်ထွဲမၤစၢၤ အဂီၢ်န့ၣ်လီၤ.
၂၀၂၃ နံၣ်ထီၣ်အဆၢကတီၢ် သုးမီၤစိရိၤအသုးသ့ၣ်တဖၣ် ဟူးဂဲၤဆူၣ်ထီၣ်ဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ တကတီၢ်ဃီ မၤထီဒါဝဲ ဟီၣ်ခိၣ်ဖိခွဲးယၥ်အါထီၣ်ဝဲအဃိ ကမျၢၢ်ဖိလၢ အိၣ်ဘူးဒီးတၢ်ဒုးကဲထီၣ်အဟီၣ်ကဝီၤသ့ၣ်တဖၣ် ဘၣ်ပၥ်တ့ၢ်ကွံၥ်ဝဲ အတၢ်ဖံးအီၣ်မၤအီၣ်လီၢ်ကျဲ ဒီး ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်အဃိ ကမျၢၢ်ဖိလၢ တဖံးအီၣ်မၤအီၣ်ဘၣ် အမုၢ်အဝဲၤတၢ်ဖံးတၢ်မၤသ့ၣ်တဖၣ် အဂီၢ် လိၣ်ဘၣ်ဝဲ တၢ်ဆီထွဲမၤစၢၤ ထီရီၤန့ၣ်လီၤ.