ကီၢ်ပယီၤသုးမုၢ်ဒိၣ် အသုးတဖၣ် ခီဖျိ ခးနါစိၤကျိဖးဒိၣ် ဒီး ကျိဖိတဖၣ်အဃိ သဝီဖိတဂၤ ဘၣ်ဒိဝဲနၥ်နၥ်ကလဲၥ်

လါယနူၤအါရံၤ ၁၉ သီ ၂၀၂၁ နံၣ်, သူလ့ၤတၢ်ကစီၣ်
ဖဲ ၂၀၂၁ နံၣ် လါယနူၤအါရံၤ ၁၉ သီဂီၤခီ ၉ နၣ်ရံၣ် ၂၅ မံးနံး အဆၢကတီၢ် ပကီၤခံသဝီဖိ စီၤလၢၢ်ဘီ တဂၤ အိၣ်ဝဲလၢ တၢ်ဃ့ၢ်ခူသူၣ်အလီၢ် ဒီး က့ၤဃီၤဝဲဆူ သဝီပူၤ လၢကဒုးအီၣ်ဆၣ်ဖိကီၢ်ဖိအဆၣ် လၢအအိၣ်လီၤတဲၥ်လၢ သဝီပူၤတဖၣ် အဂီၢ်န့ၣ်လီၤ. ဒီး ဖဲအဝဲက့ၤတုၤလၢ သဝီပူၤအဆၢကတီၢ် ကီၢ်ပယီၤသုးမုၢ်ဒိၣ် လၢအမ့ၢ် ခမရ (၆၀၃) အသုးရ့ၣ် လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်ဒိၣ်ဖိ မီၣ်အီၣ်သါ အသုးတဖၣ် ခီဖျိခးတပျုၢ်တပျီၤဝဲဒၣ် ကျိဖိဒီးကျိဖးဒိၣ်အါအါဂီၢ်ဂီၢ်အဃိ ဘၣ်ဝဲ စီၤလၢၢ်ဘီ အခီၣ်ကံၣ်ခုၣ် ခံကပၤလၢၥ် ဃုၥ်ဒီးအခိၣ်သၣ်ဃံ စ့ၢ်ကီးအဃိ ဘၣ်ဒိဝဲ နၥ်နၥ်ကလဲၥ် ဒီး မ့ၢ်တၢ်လီၤဘၣ်ယိၢ်လၢ အသးသမူအဂီၢ် န့ၣ်လီၤ. လၢတၢ်န့ၣ်အဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ပှၤဘၣ်မူဘၣ်ဒါတဖၣ် ကူဆါယါဘျါဝဲ စီၤလၢၢ်ဘီ အံၤန့ၣ်လီၤ.
တၢ်ကဲထီၣ်သးဒ်အံၤအဖီခိၣ် ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ကီၢ်ဆၣ်နဲၣ်ရွဲၣ် ပဒိၣ်စီၤဆၣ်ဝါ စံးဝဲဒၣ်လၢ "ကီၢ်ပယီၤပဒိၣ် အသုးမုၢ်ဒိၣ်အံၤ ခီဖျိမၤကမၣ်ဝဲ ထံကီၢ်ဒီဘ့ၣ် တၢ်ပတုၥ်တၢ်ခး တၢ်အၢၣ်လီၤအီလီၤ လံၥ်ဃံးဃၥ် (NCA) တလီၢ်လီၢ်အဃိ တၢ်ခးလိၥ်သးတဖၣ် ကဲထီၣ်ဝဲန့ၣ်လီၤ. ဒ်သိးတၢ်ခးလိၥ်သးဒ်အံၤ သုတအိၣ်ထီၣ်လၢၤတဂ့ၤအဂီၢ် အလီၢ်အိၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဃုၥ်ဒီးကီၢ်ပဒိၣ်တဖၣ် ကထံၣ်လိၥ်သးဒီး ဘှါရှဲက့ၤ တၢ်ဂ့ၢ်တဖၣ်အံၤလီၤ."
တၢ်ခးလိၥ်သးတဖၣ် ကဲထီၣ်အသးစးထီၣ်လၢ ၂၀၂၀ နံၣ် လါဒံၣ်စ့ဘၢၣ် ၂၈ သီ လံၤလံၤဒီး တုၤကတီၢ်ခဲအံၤဒၣ်လဲၣ် ကဲထီၣ်ဒံးဒၣ်အသးန့ၣ်လီၤ. ဒ်န့ၣ်အသိး ခီဖျိတၢ်ခးလိၥ်သးကဲထီၣ်အဃိ ဒူသဝီ ၄ ဖျၢၣ်, ဟံၣ်ခိၣ် ၁၃၀ ဖျၢၣ်, ပှၤနီၣ်ဂံၢ် ၇၉၀ ဂၤ ဘၣ်သုးလီၢ်သုးကျဲ ဒီး အိၣ်လၢသဝီပူၤတဘူၣ်လၢၤဝဲဘၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် တၢ်ပၢဟီၣ်ကဝီၤ ကီၢ်ဆၣ်အိၣ်ဝဲ ၃ ဘ့ၣ် လၢအမ့ၢ် လၢၢ်ဒိၣ်ကီၢ်ဆၣ်, ဆီထံးကီၢ်ဆၣ် ဒီး မူကီၢ်ဆၣ် တဖၣ်န့ၣ်လီၤ. လၢကီၢ်ဆၣ် ၃ ဘ့ၣ်အံၤအကျါ လၢၢ်ဒိၣ်ကီၢ်ဆၣ် မ့ၢ်ကီၢ်ဆၣ်တဘ့ၣ်လၢ တၢ်ခးလိၥ်သး ကဲထီၣ်ဝဲ ဒုးကိၥ်ဒုးကိၥ် န့ၣ်လီၤ.