ခီဖျိလၢ ပယီၤသုးတဖၣ် ခးနါစိၤကျိအဃိ ဘၣ်သံဝဲကမျၢၢ်ဖိ ၂ ဂၤ

လါယနူၤအါရံး (၁၉) သီ, ၂၀၂၁
ဖဲ လါယနူၤအါရံး (၁၉) သီဂီၤ (၇း၀၀) နၣ်ရံၣ်ဆၢကတီၢ် လၢသုးက့ (၃) ဒီး သုးက့ (၅) အဆၢ ဖဲကစၢၢ်တကွံ တၢ်လီၢ်ကပိၥ်ကပၤန့ၣ် ခီဖျိပယီၤသုးတဖၣ် ခးနါစိၤကျိအဃိ ပမၤန့ၢ်တၢ်ကစီၣ်လၢ ပှၤကမျၢၢ်သံခံဂၤန့ၣ်လီၤ. ပှၤသံခံဂၤအံၤ အမံၤမ့ၢ်ဝဲ အူတၥ် သးနံၣ်အိၣ် (၅၇) နံၣ်ဒီး ကၠံၣ်ဖိ သးနံၣ်အိၣ် (၄၂)နံၣ်န့ၣ်လီၤ.
လၢတၢ်ဂ့ၢ်အံၤအဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လၢၢ်ဒိၣ်ကီၢ်ဆၣ် နဲၣ်ရွဲၣ် ပဒိၣ်စီၤဆၣ်ဝါ တခီစံးဝဲလၢ ပယီၤသုး ခမရ (၅၇), သုးရ့ၣ်ခိၣ်ပတီၢ် (ရှါလ့) ကိးထံၣ်လိၥ်ဝဲ မုၢ်သဲၣ်သဝီဖိ ဖဲလါယနူၤအါရံၤ (၁၆) သီအနံၤ ဒီးဟ့ၣ်ပလီၢ် သဝီဖိတဖၣ် တဘၣ်ဟးထီၣ်လၢ သဝီချၢဘၣ်. မ့ၢ်ထံၣ်န့ၢ်ဝဲလၢ သဝီဖိလၢအဟးထီၣ် လၢသဝီချၢအါန့ၢ်အကဲး (၅၀) န့ၣ် လၢအဝဲသ့ၣ်အတၢ်ဘံၣ်တၢ်ဘၢအဂီၢ် ကခးဝဲဒၣ်လၢကျိလီၤ အဂ့ၢ်န့ၣ် စံးဘၣ်ဝဲ မုၢ်သဲၣ်သဝီဖိ ၄ ဂၤလၢအမ့ၢ် စီၤစ့ခ့ၢ်သီ, စီၤခ့ၤသါမူ, စီၤဂ့ၤန့ၢ်မူ ဒီးစီၤဖါန့ၢ် သ့ၣ်တဖၣ်န့ၣ်လီၤ.
လၢတၢ်န့ၣ်အဃိ မုၢ်သဲၣ်သဝီဖိတဖၣ် ဟးထီၣ်ဝဲဆူ သဝီအချၢ တဘူၣ်လ့ၤတက့ၤလၢၤဘၣ်န့ၣ်လီၤ. ပှၤသံခံဂၤအလီၢ်အံၤ သဝီတအိၣ်ဘၣ် ဒီး အိၣ်ဒၣ်ထဲ ပယီၤသုးကလၢၤဝံၤ အိၣ်စီၤစူၤဒီးသဝီသ့ၣ်တဖၣ် ဖးယံၤန့ၣ်လီၤ.
ဖဲကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ် ကျဲလၢပယီၤသုးတ့ထီၣ်အီၤဖဲ လၢၢ်ဒိၣ်ဝ့ၢ်ဆူ မုၢ်သဲၣ်သဝီဒီး ဆူသုးက့ (၃), သုးက့ (၅) အဆၢ ကျဲခိၣ်ကျဲၤဃၢၤဝး၀း ဒူသဝီလၢအအိၣ်သူၣ်ဆီလီၤသးတဖၣ် ပယီၤသုးတဖၣ် ခးလီၤကျိဖးဒိၣ် ဒီး ကျိဖိတဖၣ်အဃိ ဒူသဝီကမျၢၢ်ဖိတဖၣ် အိၣ်တဘူၣ်, ဘၣ်ပျံၤဘၣ်ဖုး ဒီး ဃ့ၢ်အိၣ်ဆူပှၢ်လၢ်ကျါလံန့ၣ်လီၤ.