ပကိကီၢ်ခီ, ကညီဂ့ၢ်ဝီကိတိၥ် နီၢ်ပှဲၤစ့ ဟဲဟ့ၣ်မၤစၢၤဝဲ လီၢ်ကဝီၤထံဖိကီၢ်ဖိလၢ အဃ့ၢ်မှံဟးဖျိး ခီဖျိတၢ်ခးလိၥ်သးကဲထီၣ်တဖၣ် လၢတၢ်ဖိတၢ်လံၤဒီး တၢ်လၢအလိၣ်တဖၣ်

လါယနူၤအါရံၤ ၂၀ သီ ၂၀၂၁ နံၣ်, သူလ့ၤတၢ်ကစီၣ်
ဖဲလါယနူၤအါရံၤ ၂၀ သီ မုၢ်ထူၣ်ခါ ၁၂ နၣ်ရံၣ်အဆၢကတီၢ် ပကိကီၢ်ခီ, ကညီဂ့ၢ်ဝီကိတိၥ် နီၢ်ပှဲၤစ့ ဒီး ခိၣ်နၢ်ခၢၣ်စးတဖၣ် ဟဲဟ့ၣ်ဝဲ တၢ်ဆီၣ်ထွဲမၤစၢၤဆူ ထံဖိကီၢ်ဖိ လၢအဘၣ်ဃ့ၢ်မှံဟးဖျိတဖၣ် လၢတၢ်အီၣ်တၢ်အီ, ကသံၣ်ကသီ, ယၣ်လုး ဒီး ဆ့ကလၢၤ တဖၣ်န့ၣ်လီၤ. ကညီဂ့ၢ်ဝီကိတိၥ် နီၢ်ပှဲၤစ့ ဟ့ၣ်မၤစၢၤဝဲ ထံဖိကီၢ်ဖိလၢ အအိၣ်ဖဲ ခ့ၣ်အဲၣ်ယူၣ်-ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤတဖၣ် လၢအဘၣ်ဃ့ၢ်မှံဟးဖျိ ခီဖျိ ကီၢ်ပယီၤသုးတဖၣ် ခးကျိအါအါဂီၢ်ဂီၢ် အဃိန့ၣ်လီၤ. အတၢ်ဆီၣ်ထွဲမၤစၢၤတဖၣ် ဟ့ၣ်လီၤဝဲခီဖျိ ကညီဂံၢ်ခီၣ်ထံးပှၤတ၀ၢ ပှၤဂ့ၢ်ဝီကရၢ ကမံးတံၥ် အစုပူၤန့ၣ်လီၤ.
ဘၣ်ဃးဒီးတၢ်ဟ့ၣ်တၢ်ဆီၣ်ထွဲမၤစၢၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ကီၢ်ဆၣ်နဲၣ်ရွဲၣ် ပဒိၣ်စီၤဆၣ်ဝါ ပၥ်ဖျါထီၣ်အတၢ်ထံၣ် ဒ်အံၤန့ၣ်လီၤ. "ဘၣ်ဃးတၢ်ဆီၣ်ထွဲမၤစၢၤအဂ့ၢ်အံၤ တၢ်ရ့လိၥ်ဝဲၤဒၢး ဆဲးကျိးတဲကျၢပှၤန့ၣ်လီၤ. အဝဲသ့ၣ်တဲဝဲလၢ ပကိကီၢ်ခီ ကညီဂ့ၢ်ဝီကိတိၥ် ကဟဲမၤစၢၤဝဲ ကမျၢၢ်လၢအဘၣ်ဃ့ၢ်မှံဟးဖျိး ခီဖျိ တၢ်ဒုးတၢ်ယၤတဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤ တၢ်တဲလီၤလီၤဆီဆီဒု တအိၣ်ဘၣ်. ကမျၢၢ်တဖၣ် ဃ့ၢ်ဝဲခီဖျိ တၢ်ဒုးတၢ်ယၤအဃိ န့ၣ်လီၤ. တမ့ၢ်လၢ န့ဆၢၣ်တၢ်ကဲထီၣ်သးအဃိ ဘၣ်ဃ့ၢ်တမ့ၢ်ဘၣ်. အဝဲအံၤမ့ၢ်ပှၤဟီၣ်ခိၣ်ဖိ မၤကဲထီၣ်ဝဲန့ၣ်လီၤ. မ့ၢ်ဝဲပှၤဟီၣ်ခိၣ်ဖိအဃိ အစုအခီၣ်အိၣ်ဝဲဒၣ်န့ၣ်လီၤ. အစုအခီၣ်အိၣ်လၢ ကမၤဟးဂီၤတၢ်အဃိ တၢ်သိၣ်တၢ်သီ လၢအတြီဃၥ်အီၤ မ့ၢ်တအိၣ်နီတမံၤဘၣ်န့ၣ် တၢ်ဆီၣ်ထွဲမၤစၢၤဒ်အံၤ ပကဘၣ်မၤစၢၤဒၣ် တဘိယူၥ်ဃီန့ၣ်လီၤ. ခဲအံၤပှၤလၢအဟဲမၤစၢၤတၢ်န့ၣ် မ့ၢ်ဝဲ ကီၢ်ပဒိၣ်ခၢၣ်စး, ပှၤလၢအမၤဒုးအိၣ်ထီၣ်တၢ်သ့တဖၣ်အံၤတခီ မ့ၢ်ပှၤလၢအအိၣ်ဒီး အစုအခီၣ် န့ၣ်အလီၤ. အဃိပဆဲးမၤစၢၤကန့ၢ်ဆံးယံၥ်လဲၣ်န့ၣ် ပကဘၣ်ဆိကမိၣ်ကွၢ် န့ၣ်လီၤ" အဂ့ၢ်န့ၣ် ပဒိၣ်စီၤဆၣ်ဝါ စံးဝဲဒၣ်န့ၣ်လီၤ.
တၢ်ဆီၣ်ထွဲမၤစၢၤ တၢ်ရဲၣ်တၢ်ကျဲၤတဘျီအံၤ ဘၣ်တၢ်တီခိၣ်ရိၣ်မဲအီၤလၢ ကညီဂ့ၢ်ဝီကိၥ်တိၥ် နီၢ်ပှဲၤစ့ တကးဘၣ် လၢၢ်ဒိၣ်ကီၢ်ဆၣ် ကီၢ်ဆၣ်ပှၤဘၣ်မူဘၣ်ဒါ ဃုၥ်ဒီး ဝဲၤကျိၤဘၣ်ထွဲ ခိၣ်နၢ်ခၢၣ်စးတဖၣ် ဟဲပၣ်ဃုၥ်ဝဲဒၣ်န့ၣ်လီၤ. လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်ခၢၣ်စးတခီ တၢ်ရ့လိၥ်ဝဲၤဒၢး မူဒါခိၣ် ၂ စီၤသိမါ ဒီး ပှၤဘၣ်မူဘၣ်ဒါတဖၣ် ဃုၥ်ဒီး ကညီဂံၢ်ခီၣ်ထံးပှၤတ၀ၢ ပှၤဂ့ၢ်ဝီကရၢ ကမံးတံၥ် ဘၣ်မူဘၣ်ဒါတဖၣ် ဟဲထီၣ်ဝဲဒၣ်န့ၣ်လီၤ.