ခီဖျိ ကီၢ်ပယီၤသုးမုၢ်ဒိၣ် နုၥ်လီၤဟူးဂဲၤအါထီၣ်လၢ ခ့ၣ်အဲၣ်ယူၣ် တၢ်ပၢဟီၣ်ကဝီၤတဖၣ်အဃိ တၢ်ခးလိၥ်သးကဲထီၣ်ဒီး လီၢ်ကဝီၤကမျၢၢ် လွံၢ်ကထိဘျဲၣ် ဘၣ်ဃ့ၢ်မှံဟးဖျိး

လါယနူၤအါရံၤ ၂၆ သီ ၂၀၂၁ နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် ဟီၣ်ကဝီၤပူၤ ခီဖျိ ကီၢ်ပယီၤသုးမုၢ်ဒိၣ် အသုးတဖၣ် နုၥ်လီၤဟူးဂဲၤအါထီၣ်အဃိ ဘၣ်သဂၢၢ်ခးလိၥ်သးဒီး လီၢ်ကဝီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ် အသုးလၢ အဟံးတၢ်ဘံၣ်တၢ်ဘၢလၢ ဟီၣ်ကဝီၤဖဲန့ၣ်တဖၣ် အိၣ်ထီၣ်ဝဲအဃိ ပှၤလီၢ်ကဝီၤဖိတဖၣ် ပျံၤတၢ်ဖုးတၢ်ဒီး ဃ့ၢ်အိၣ်လၢပှၢ်ပူၤ လၢတၢ်သဒၢအဂီၢ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် ဟီၣ်ကဝီၤပူၤ ကမျၢၢ်လၢ အဘၣ်ဃ့ၢ်အိၣ်ကဒုတဖၣ် မ့ၢ်ဝဲ ဒူသဝီကရူၢ် ၅ ကရူၢ်, သဝီခဲလၢၥ် ၁၇ ဖျၢၣ်, ဟံၣ်ခိၣ်ခဲလၢၥ် ၇၀၀ ဖျၢၣ် ဒီး ပှၤနီၣ်ဂံၢ်ခဲလၢၥ် အိၣ်ဝဲ ၄၁၃၁ ဂၤန့ၣ်လီၤ.
ပှၤဃ့ၢ်အိၣ်ကဒု စရီလၢ တၢ်ပၥ်ဖျါထီၣ်အီၤခဲအံၤ မ့ၢ်စရီလၢ တၢ်ထၢန့ၢ်အီၤ အစဲၤခံကတၢၢ် ဖဲ ၂၀၂၁ နံၣ် လါယနူၤအါရံၤ ၂၅ သီ အစရီ န့ၣ်လီၤ.
ပှၤကမျၢၢ်ဖိလၢ အဘၣ်ဃ့ၢ်မှံဟးဖျိးသ့ၣ်တဖၣ် ပၣ်ဃုၥ်စ့ၢ်ကီးဒီး ပှၤသးပှၢ်တဖၣ်, ပိၥ်မုၣ်ပိၥ်မၢၤတဖၣ် ဒီး ဖိဒံဖိသၣ်တဖၣ် စ့ၢ်ကီးန့ၣ်လီၤ. ကမျၢၢ်သ့ၣ်တဖၣ် ခီဖျိဘၣ်ဃ့ၢ်အိၣ်လၢပှၢ်ပူၤအဃိ တူၢ်ဘၣ်စ့ၢ်ကီးဝဲ မူခိၣ်ကလံၤသီၣ်ဂီၤ တၢ်နးတၢ်ဖှီၣ်တဖၣ် တကးဘၣ် လၢတၢ်အီၣ်တၢ်အီအဂီၢ်စ့ၢ်ကီး ဘၣ်ကွၢ်ဆၢၣ်မဲၥ်ဘၣ်ဝဲ တၢ်ကီတၢ်ခဲ န့ၣ်လီၤ. ကမျၢၢ်တနီၤနီၤ ဃ့ၢ်အိၣ်လၢ တၢ်အိၣ်ကဒုအလီၢ်အသိး တၢ်လိၣ်မ့ၢ်အိၣ်ထီၣ်ဒီး ဘၣ်က့ၤနုၥ်ဝဲလၢ သဝီပူၤ လၢတၢ်ပျံၤတၢ်ဖုး အါမးအပူၤန့ၣ်လီၤ.
လၢပှၤဃ့ၢ်အိၣ်ကဒုတဖၣ်အကျါ ပၣ်ဃုၥ်စ့ၢ်ကီးဒီး ကၠိဖိ, ကၠိသရၣ်, ကၠိသရၣ်မုၣ် တဖၣ်အဃိ ကၠိဖိသ့ၣ်တဖၣ် မၤလိတၢ်တသ့လၢၤဘၣ်ဒီး တၢ်မၤလိကၠိ ၁၁ ဖျၢၣ် ဘၣ်ပတုၥ်ကွံၥ်အသးန့ၣ်လီၤ.
လၢန့ၣ်အမဲၥ်ညါ ကီၢ်ပယီၤသုးမုၢ်ဒိၣ် အသုးတဖၣ် ဟးအိၣ်ဝဲလၢ ကျဲလၢပှၤလ့ၢ်ထီၣ်လ့ၢ်လိၤအါအလီၢ်, ခးနါစိၤကျိဖိဒီးကျိဖးဒိၣ် တဖၣ်အဃိ တၢ်ဘၣ်ဒိဘၣ်ထံးတဖၣ် အိၣ်ထီၣ်ဝဲ တကးဘၣ် တၢ်သံတၢ်ပှၢ်စ့ၢ်ကီး အိၣ်ထီၣ်ဝဲအဃိ ကမျၢ်ၢဖိတဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ ဒိၣ်မးန့ၣ်လီၤ. လီၢ်ကဝီၤ ပှၢ်ဃ့ၢ်အိၣ်ကမှံတဖၣ် အကျါ မဲၤဝ့ၤ ဒူသဝီကရူၢ်ကမျၢၢ် အနီၣ်ဂံၢ်အါကတၢၢ်န့ၣ်လီၤ.