တၢ်မၤလၤကပီၤ ကညီဒီကလုၥ်စၢဖှိၣ်ကရၢ မုၢ်နံၤ ပှဲၤထီၣ် (၇၄) နံၣ်မူး ဖဲလ့ဝါ

မုၢ်နံၤ ၂၀၂၁ နံၣ်, လါဖ့ၤဘြူၤအါရံၤ ၅ သီ

၂၀၂၁ နံၣ် လါဖ့ၤဘြူၤအါရံၤ (၅) သီ, အနံၤအံၤ မ့ၢ်မုၢ်နံၤတနံၤလၢ တၢ်ကရၢကရိသူၣ်ထီၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပှဲၤထီၣ်ဝဲ (၇၄) နံၣ် အမုၢ်နံၤန့ၣ်လီၤ. ခီဖျိလၢ တၢ်ဆူးတၢ်ဆါအဃိ ဒ်တၢ်ပၥ်လီၤဃၥ်တၢ်သိၣ်တၢ်သီအိၣ်အဖီခိၣ် တၢ်ကဘၣ်လူၤပိၥ်မၤထွဲအီၤ အိၣ်ဝဲအသိး တနံၤအံၤ တၢ်မၤလၤကပီၤ ကညီဒီကလုၥ်စၢဖှိၣ်ကရၢ မုၢ်နံၤလၢ ကညီတၢ်ပၢၢ်ဆၢဟီၣ်ကဝီၤတဖၣ်အပူၤ တဂၤလၢအဟီၣ်ကဝီၤဒၣ် ဝဲန့ၣ်လီၤ.
ခီဖျိ ကညီကလုၥ် အတၢ်စံၣ်စိၤတဲစိၤ အတၢ်လဲၤခီဖျိ, အတၢ်ဘၣ်ကွၢ်ဆၢၣ်မဲၥ် ဒီး အတၢ်အိၣ်သးဃ့ထီၣ်ဝဲအဖီခိၣ် ကညီကလုၥ်ခၢၣ်စးလၢ ကီၢ်ပယီၤဒီဘ့ၣ် တၢ်အိၣ်ဖှိၣ်ဖးဒိၣ် လၢအဘၣ်တၢ်မၤအီၤဖဲ ၁၉၄၇ နံၣ် လါဖ့ၤဘြူၤအါရံၤ (၃) သီတုၤ (၇) သီ ဖဲဝ့ၢ်တကူၣ်, ဒီး တၢ်အိၣ်ဖှိၣ်ဖးဒိၣ် အၢၣ်လီၤတူၢ်လိၥ်ဝဲလၢ တၢ်မၤလၢပှဲၤ ကညီကလုၥ်ထံရူၢ်ကီၢ်သဲး အတၢ်မိၣ်န့ၢ်သးလီ အဂီၢ် တၢ်ကပၥ်ဖှိၣ်ထီၣ် ကညီကလုၥ် အတၢ်ကရၢကရိ လၢအအိၣ်ဖဲ ဆၢကတီၢ်ဖဲန့ၣ် လၢအမ့ၢ်ဝဲ ကညီဒီကလုၥ်ကရၢ (Karen National Association-KNA), ကညီဒီကလုၥ်ဘူးဒးကရၢ (Buddhist Karen National Association- BKNA), ကညီလီၢ်ခၢၣ်သးကရၢ (Karen Center Organization- KCO), ဒီး ကညီသးစၢ်ကရၢ (Karen Youth Organization -KYO)  တဖၣ် အတၢ်ပၥ်သးတဖျၢၣ်ဃီအသိး ဒုးအိၣ်ထီၣ် ကညီဒီတကလုၥ်အကရၢတကရၢ လၢအမ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ (Karen National Union - KNU) န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘၣ်တၢ်ကရၢကရိသူၣ်ထီၣ်အီၤဖဲ ၁၉၄၇ နံၣ် လါဖ့ၤဘြူၤအါရံၤ (၅) သီအနံၤ ဒီးဘၣ်တၢ်ဟ့ၣ်လီၤမူဒါလၢ ကဆၢထၢၣ်ခၢၣ်စး, ဟ့ၣ်တၢ်တီခိၣ်ရိၣ်မဲ ဒီး ရိၣ်ဖှိၣ်ကညီဒီတကလုၥ်လၢ ကပၥ်ဖှိၣ်ဒီး ဂဲၤလိၥ်မၤသကိးတၢ် ဒ်သိးတၢ်ကဒိးန့ၢ်ဘၣ် ကညီဒီကလုၥ်ထံရူၢ်ကီၢ်သဲး တၢ်ခွဲးတၢ်ယၥ်တဖၣ် လၢအကြၢးဒိးန့ၢ်ဘၣ်ဝဲတဖၣ် အဂီၢ်န့ၣ်လီၤ.