ခီဖျိကမျၢၢ်တဖၣ် နၢ်ဟူဝဲလၢ ကျိသီၣ်ဘူးဒီးသဝီအဃိ ဒူသဝီ ၃ ဖျၢၣ် ကမျၢၢ်တဖၣ် ဘၣ်သုးလီၢ်သုးကျဲ

လါဖ့ၤဘြူၤအါရံၤ ၁၀ သီ ၂၀၂၁ နံၣ်, သူလ့ၤတၢ်ကစီၣ်
ဖဲ ၂၀၂၁ နံၣ် လါဖ့ၤဘြူၤအါရံၤ ၁၀ သီ ဂီၤခီ (၈း၃၀) နၣ်ရံၣ် အဆၢကတီၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤကမျၢၢ်တဖၣ် နၢ်ဟူဝဲလၢ ကျိသီၣ်ဘူးဒီးသဝီအဃိ ကမျၢၢ်လၢ ဒူသဝီ ၃ ဖျၢၣ် လၢအမ့ၢ်ဝဲ ဒိၣ်ဒီၣ်ခံသဝီ, ကျီလ့ၤဒၢသဝီ ဒီး လၢၢ်ဆူၣ်ခိၣ်သဝီ ဟံၣ်ဒူၣ်ခဲလၢၥ် ၄၇ ဒူၣ် ဘၣ်သုးလီၢ်သုးကျဲ ဒီး ဃ့ၢ်အိၣ်ခူသူၣ်ဆူ ခိခိၣ်ပှၢ်လၢ်ကျါန့ၣ်လီၤ.
ဘၣ်ဃးတၢ်ဂ့ၢ်အံၤအဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လၢၢ်ဒိၣ်ကီၢ်ဆၣ် ကီၢ်ဆၣ်နဲၣ်ရွဲၣ် ပဒိၣ်စီၤဆၣ်ဝါ ပၥ်ဂၢၢ်ပၥ်ကျၢၤ လၢ မ့ၢ်တၢ်ကစီၣ်လၢ အမ့ၢ်အတီ န့ၣ်လီၤ. ပဒိၣ်စီၤဆၣ်ဝါ စံးဝဲ "တၢ်ကစီၣ်န့ၣ် မ့ၢ်ဝဲဒၣ်န့ၣ်လီၤ. ဒ်ယတဲတ့ၢ်လံအသိး ပှၤဖီၣ်စုကဝဲၤတဖၣ် မ့ၢ်သူဝဲအတၢ်စုကဝဲၤ လၢကမၤနၢၤမၤဃၣ်, မၤပျံၤမၤဖုး, မၤသံမၤဝီ ပှၤထံဖိကီၢ်ဖိ တဘိယူၥ်ဃီ ဒီး ပှၤထံဖိကီၢ်ဖိတဖၣ် တမ့ၢ်လၢ ကမံဘၣ်ဝဲ မုၥ်မုၥ်ခုၣ်ခုၣ်ဘၣ်. လၢတၢ်န့ၣ်အဃိ ပှၤဖီၣ်စုကဝဲၤကရူၢ် ဒ်န့ၣ်သ့ၣ်တဖၣ် မ့ၢ်အိၣ်ဘူးဒီးကမျၢၢ်, ပမ့ၢ်တနီဟးထီၣ်ကွံၥ်အီၤဘၣ်ဒီး ပှၤကမျၢၢ်တဖၣ် လၢအတၢ်အိၣ်မူ တၢ်ဘံၣ်တၢ်ဘၢအဂီၢ် ကဘၣ်သုးလီၢ်သုးကျဲ ဃ့ၢ်အိၣ်ကဒုဝဲဒၣ်န့ၣ်လီၤ.
သုးမီၤစိရိၤ လၢအထီၣ်ဟံးန့ၢ် ထံကီၢ်တၢ်စိတၢ်ကမီၤတဖုအံၤ ဖဲတယံၥ်ဒံးဘၣ်န့ၣ် ဘိးဘၣ်ရၤလီၤဝဲဒၣ်လၢ ကလူၤပိၥ်ထွဲဒီး မၤဖျါထီၣ် ထံကီၢ်ဒီဘ့ၣ် တၢ်ပတုၥ်တၢ်ခး အလံၥ်ဃံးဃၥ် (NCA) လီၤ ဘၣ်ဆၣ် တုၤမုၢ်မဆါတနံၤအံၤ အဝဲသ့ၣ်မၤထီဒါဝဲ (NCA) ဒံးန့ၣ်လီၤ.