၉ လါမးရှး ၂၀၂၁ နံၣ် သူလ့ၤတၢ်ကစီၣ်

       ၂၀၂၁ နံၣ် လါမးရှးထီၣ် ၇ သီ ဒီး ၈ သီအနံၤ သုးမီၤစိရိၤ လၢဟံးန့ၢ်ဆူၣ် တၢ်စိတၢ်ကမီၤ အစုဒုၣ်တီၤ သုး လၢအမ့ၢ် (ခမရ-၃၃၉) အိၣ်ဆီလီၤအလီၢ်ဖဲ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် မဲၤဝ့ၤသဝီပူၤတဖၣ် ခးလီၤဝဲကျိဖးဒိၣ် ၂၇ ထံၣ် ဆူမဲၤဝ့ၤသဝီ အကပၤ စံၥ်ပျီအခိၣ်အဃၢၤအဃိ မဲၤဝ့ၤသဝီဖိ ခဲလၢၥ် (၄၈) ဒူၣ် ပှၤနီၣ်ဂံၢ် တကယၤဘျဲၣ် ဘၣ်ဃ့ၢ်အိၣ်ခူသူၣ်လၢ ပှၢ်လၢ်ကျါ ဒီး ကမျၢၢ်ဖိတဖၣ် ဘၣ်အိၣ်လၢ တၢ်ပျံၤတၢ်ဖုး အဖီခိၣ်န့ၣ်လီၤ. လၢကမျၢၢ်ဖိတဖၣ် အတၢ်ဘံၣ်တၢ်ဘၢအဂီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့နီၣ်ဂံၢ် (၅) လီၢ်ကဝီၤ သုးဖိသ့ၣ်တဖၣ် ဟံန့ၢ်ဝဲ တၢ်ဒီသဒၢ လၢကမျၢၢ်ဖိအဂီၢ်န့ၣ်လီၤ.

       တကီၢ်ခါ တၢ်အိၣ်သးခဲအံၤ ကမျၢၢ်ဖိလၢ ကီၢ်ဒီဘ့ၣ်အပူၤ ထီဒါဝဲ သုးမီၤစိရိၤ လၢအဟံးန့ၢ်ဆူၣ် တၢ်စိတၢ်ကမီၤတဖၣ် ဒီး ပၥ်ဖျါထီၣ် အတၢ်ဘၣ်သး လၢကီၢ်ဒီတဘ့ၣ်အပူၤ န့ၣ်လီၤ. ကမျၢၢ်ဖိလၢ ကီၢ်ဒီဘ့ၣ်အပူၤတဖၣ် ပၥ်ဖျါထီၣ် အတၢ်ဘၣ်သး ဆဲးဆဲးလၤလၤ ဘၣ်ဆၣ် သုးမီၤစိရိၤလၢ အဟံးန့ၢ်ဆူၣ် တၢ်စိတၢ်ကမီၤ အသုးတဖၣ် ဒီး အပၢၤကီၢ်တဖၣ် သူဝဲ တၢ်စုဆူၣ်ခီၣ်တကး မၤပျံၤမၤဖုး ကမျၢၢ်ဒီး ခးသံကမျၢၢ် အိၣ်ထီၣ်ဝဲဒၣ်အါမးန့ၣ်လီၤ. ဟီၣ်ကဝီၤတနီၤ ကမျၢၢ်ဖိ ပၥ်ဖျါထီၣ်အတၢ်ဘၣ်သး အတၢ်ဟူးတၢ်ဂဲၤအပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် (KNLA) ကညီဒီကလုၥ်ဂၢၤသးကရၢ (KNDO) ဒီး ကညီဒီကလုၥ်ပၢၤကီၢ်သုး (KNPF) သ့ၣ်တဖၣ် နုၥ်လီၤပၥ်ဖှိၣ်မၤသကိးတၢ် ဒီး ကမျၢၢ်ဖိ မၤစၢၤကမျၢၢ်ဖိ ဒ်အလီၢ်အိၣ်ဝဲအသိးန့ၣ်လီၤ. တကတီၢ်ဃီ အဝဲသ့ၣ်တဖၣ် ဘၣ်ဟံးန့ၢ်စ့ၢ်ကီး တၢ်ဘံၣ်တၢ်ဘၢ လၢကမျၢၢ်ဖိလၢ ဘၣ်ဃ့ၢ်မှံဟးဖျိး လၢပှၢ်လၢ်ကျါသ့ၣ်တဖၣ် အဂီၢ်န့ၣ်လီၤ.