မူကီၢ်ဆၣ် ဟီၣ်ကဝီၤအပူၤ ကမျၢၢ်လၢ အပၥ်ဖျါထီၣ်အသး ဒီး မီၤစိရိၤသုး အဘၢၣ်စၢၤ တၢ်ဖ့ၣ်ဆၢအိၣ်ထီၣ်

၂၀၂၁ နံၣ်, လါမးရှး ၉ သီ

ဖဲ ၂၀၂၁ နံၣ်, လါမးရှး ၉ သီအနံၤ ဂီၤခီ ၈ နၣ်ရံၣ် အဆၢကတီၢ် မူကီၢ်ဆၣ် လီၢ်ကဝီၤကမျၢၢ်တဖၣ် ပၥ်ဖျါထီၣ်ဝဲ အတၢ်ဘၣ်သး န့ၣ်လီၤ. ဖဲအဝဲသ့ၣ် ပၥ်ဖျါထီၣ်အတၢ်ဘၣ်သး အဆၢကတီၢ် မီၤစိရိၤ လၢအဟံးန့ၢ်ဆူၣ် တၢ်စိတၢ်ကမီၤ အသုးတဖၣ် ဒ်အမ့ၢ် ခမရ (၅၉၀), (၅၉၉) ဒီး ပၢၤကီၢ်သုးတဖၣ် ဟးလူၤဖီၣ်ဝဲ ကမျၢၢ်တဖၣ် ဒီး ဖီၣ်ဃုၥ်ဝဲ မီၤတီၤပူၤ ဒီး သိလ့ၣ်တဖၣ် န့ၣ်လီၤ. မီၤစိရိၤသုး ဒီး ပၢၤကီၢ်သုးတဖၣ် လူၤဖီၣ်တၢ် ဒ်န့ၣ်အဃိ ကမျၢၢ်တနီၤ ဒိဝဲတၢ်ဂီၤအဖီခိၣ် မီၤစိရိၤသုး ဒီး ပၢၤကီၢ်သုးတဖၣ် ဖီၣ်ဃုၥ်ဝဲ ပှၤဒိတၢ်ဂီၤတဖၣ် ဒီး မၤဒၢၣ်, တီၢ်ဝဲ အိၣ်စ့ၢ်ကီးန့ၣ်လီၤ.

ခီဖျိလၢ မီၤစိရိၤအသုး ဒီး ပၢၤကီၢ်သုးတဖၣ် လူၤဖီၣ် မၤဒၢၣ်ပှၤဒိတၢ်ဂီၤတဖၣ် အဃိ ကမျၢၢ်တဖၣ် သံကွၢ်အီၤလၢ ဘၣ်မနုၤနဘၣ်မၤဒၢၣ်တၢ်လဲၣ်န့ၣ်ဒီး စံးဝဲလၢ တဘၣ်တၢ်နီတမံၤဘၣ် မ့ၢ်လၢ ဒိတၢ်ဂီၤ ပတဘၣ်သးဘၣ် အဃိန့ၣ်လီၤ. ကမျၢၢ်တဖၣ် ပၥ်ဖျါထီၣ်သး ဒီး ဒိဃုၥ်ဒီးတၢ်ဂီၤအဃိ သုး ဒီး ပၢၤကီၢ်တဖၣ် ခးပိၢ်ဝဲကျိ ၁၅ ထံၣ် ဒီး ကမျၢၢ်တဖၣ် လီၤမုၢ်ပြံပြါကွံၥ်ဝဲန့ၣ်လီၤ.

သုး ဒီး ပၢၤကီၢ်တဖၣ် တီၣ်ထီၣ်ဝဲ ကမျၢၢ်လၢတၢ်ဖီၣ်န့ၢ်အီၤတဖၣ် လၢကါလၢအဖီၣ်န့ၢ်ဝဲတဖၣ် အပူၤဝံၤ ဟးတရံးဝဲ၀့ၢ်ဒီး အိးထီၣ်ဃုၥ်သုးအတၢ်သးဝံၣ် န့ၣ်လီၤ. အဝဲသ့ၣ်အတၢ်မၤဒ်အံၤ မ့ၢ်အဟ့ၣ်တၢ်စံၣ်ညီၣ်လီၤန့ၣ် ပှၤပၥ်ဖျါထီၣ်သးလၢ တၢ်ဖီၣ်န့ၢ်အီၤတဂၤ စံးဝဲဒၣ်န့ၣ်လီၤ. ကမျၢၢ်လၢ တၢ်ဖီၣ်န့ၢ်အီၤတဖၣ် ဘၣ်တၢ်ပျဲလီၤကွံၥ်အီၤဖဲ မုၢ်ထူၣ်ခါ ၁၂ နၣ်ရံၣ်အဆၢကတီၢ်ဒီး အဝဲသ့ၣ်တဖၣ် ဘၣ်ဆဲးစုမုၢ်ကျၢၢ် ဒီး အၢၣ်လီၤသးလၢ ခါဆူညါ တဘၣ်ပၥ်ဖျါထီၣ်သး လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.

မူကီၢ်ဆၣ် လီၢ်ကဝီၤကမျၢၢ်တဖၣ် ဖဲကီၢ်ပယီၤသုးမုၢ်ဒိၣ် ဟံးဆူၣ်တၢ်စိတၢ်ကမီၤ ဝံၤအလီၢ်ခံ စးထီၣ် ၂၀၂၁ နံၣ် လါဖ့ၤဘြူၤအါရံၤ ၂ သီအနံၤန့ၣ် အဝဲသ့ၣ်စးထီၣ် ပၥ်ဖျါထီၣ်အတၢ်ဘၣ်သး ဘၣ်ဆၣ် တၢ်ဖ့ၣ်ဆၢဒ်သိးအံၤ တအိၣ်ထီၣ်ဝဲဘၣ်န့ၣ်လီၤ. ဘၣ်ဆၣ် စးထီၣ် လါမးရှး ၈ သီန့ၣ် မီၤစိရိၤသုး ခမရ (၅၉၉) အသုးတဖၣ် မၤအါထီၣ်ဝဲ အသုးဂံၢ်ဘါ ဒီး ပၥ်ဖှိၣ်မၤသကိးဃုၥ်တၢ်ဒီး ခမရ (၅၉၀) ဃုၥ်ဒီး ပၢၤကီၢ်သ့ၣ်တဖၣ်ဝံၤ ကမျၢၢ်လၢအပၥ်ဖျါထီၣ်သးတဖၣ် လူၤဖီၣ်ဝဲ, မၤဒၢၣ်ဝဲ, သိလ့ၣ် ဒီး မီၤတီၤပူၤတဖၣ်စ့ၢ်ကီး ဖီၣ်ဝဲဒၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.