မုၢ်တြီၢ်ကီၢ်ရ့ၣ် ပှၤထူလံၤဖိတဖၣ် ပၥ်ဖျါထီဒါဝဲ သုးမီၤစိရိၤ လၢဟံးန့ၢ်ဆူၣ် တၢ်စိတၢ်ကမီၤတဖၣ်

၂၀၂၁ နံၣ် လါမးရှး ၁၄ သီ သူလ့ၤတၢ်ကစီၣ်
ဖဲ ၂၀၂၁ နံၣ် လါမးရှး ၁၄ သီအနံၤ မုၢ်တြီၢ်ကီၢ်ရ့ၣ် လူၤသီကီၢ်ဆၣ် ဟီၣ်ကဝီၤပူၤ ပှၤထူလံၤဖိသ့ၣ်တဖၣ် ပၥ်ဖှိၣ်ထီၣ်လိၥ်အသး လၢတၢ်ဃူတၢ်ဖိးအပူၤ ဒီး ပၥ်ဖျါထီၣ် အတၢ်ဘၣ်သး ထီဒါဝဲ သုးမီၤစိရိၤ လၢဟံးန့ၢ်ဆူၣ် တၢ်စိတၢ်ကမီၤတဖၣ် န့ၣ်လီၤ.
ပှၤထူလံၤဖိတဖၣ် ပၥ်ဖျါထီၣ်ဝဲ တၢ်ကိးသတြီ ဒ်အမ့ၢ် သုးမီၤစိရိၤ လၢအိၣ်ဖဲ ပှၤထူလံၤဖိဟီၣ်ကဝီၤပူၤတဖၣ် ကဘၣ်ထုးကွံၥ်သး, သုးမီၤစိရိၤသနူ ကဘၣ်လီၤပှီၢ်, ၂၀၀၈ တၢ်ဘျၢခိၣ်သ့ၣ် တၢ်ကဘၣ်တြူၢ်သံကွံၥ်အီၤ, ကီၢ်စၢဖှိၣ် ဒံၣ်မိၣ်ခြ့ၣ်စံၣ် ကဘၣ်အိၣ်ထီၣ်, တၢ်ထဲသိးတုၤသိး ဒီး တၢ်စံၣ်ညီၣ်ပၢလီၤသး ကဘၣ်အိၣ်ထီၣ် ဒီး ပှၤထူလံၤဖိတဖၣ် နၥ်ဝဲသပှၢ်ကတၢၢ်လၢ ကမျၢၢ်အတၢ်ဃ့ထီၣ်သ့ၣ်တဖၣ်အံၤ ကမၤနၢၤတၢ် သပှၢ်ကတၢၢ်န့ၣ်လီၤ. တကတီၢ်ဃီ ပၥ်ဖျါထီၣ်စ့ၢ်ကီးဝဲလၢ ဃိၣ်လိၥ်ကျိအထံတမၢၢ် အတၢ်တိၥ်ကျဲၤ ကဘၣ်ပတုၥ်ကွံၥ်အသး ဒီး ဃိၣ်လိၥ်ကျိ ကဘၣ်ယွၤလီၤဝဲ သဘျ့န့ၣ်လီၤ. ဃိၣ်လိၥ်တၢ်မုၥ်တၢ်ခုၣ်အကရၢၢ် အတၢ်မံမီၢ်လၢ ဃိၣ်လိၥ်ကျိကအိၣ်ဝဲဒ် န့ဆၢၣ်တၢ်ဘၣ်တ့အသိးအံၤ ကဘၣ်လၢထီၣ်ပှဲၤထီၣ်ဝဲဒၣ် န့ၣ်လီၤ.
ကမျၢၢ်ပှၤထူလံၤဖိတဖၣ် အိၣ်ပှိၤစ့ၣ်ကီးဝဲ ကမျၢၢ်လၢ ထံကီၢ်ဒီဘ့ၣ် အတၢ်ကိးသတြီ ဃ့ထီၣ်သ့ၣ်တဖၣ်န့ၣ်လီၤ. ထံကီၢ်ဒီဘ့ၣ် ပှၤလၢအထီဒါမီၤစိရိၤသနူတဖၣ် အတၢ်ကိးသတြီအပူၤ သုးမီၤစိရိၤသူဝဲ တၢ်စုဆူၣ်ခီၣ်တကး ဒီး ကမျၢၢ်ဖိလၢ အတၢ်ကမၣ်တအိၣ်ဘၣ်တဖၣ် ဘၣ်သံဝဲအါမးအဃိ ပှၤထူလံၤဖိသ့ၣ်တဖၣ်စ့ၢ်ကီး တူၢ်ဘၣ်တၢ်တမံၤဃီ ဒ်အဝဲသ့ၣ်အသိး န့ၣ်လီၤ. ပှၤကမျၢၢ်ဖိလၢ သုးမီၤစိရိၤ ခးသံအီၤသ့ၣ်တဖၣ်အဂီၢ် လၢတၢ်ရဲၣ်တၢ်ကျဲၤဘျီဝဲအံၤအပူၤ ပှၤထူလံၤဖိသ့ၣ်တဖၣ် လၢအတၢ်စူၥ်တၢ်နၥ်ဒၣ်ဝဲအဖီခိၣ် ဃ့ဘါထုကဖၣ်တၢ်လၢ အဝဲသ့ၣ်တဖၣ်အဂီၢ် န့ၣ်လီၤ.
တၢ်ရဲၣ်တၢ်ကျဲၤဘျီဝဲအံၤ မုၢ်တြီၢ်ကီၢ်ရ့ၣ် လူၤသီကီၢ်ဆၣ် ကရူၢ်သ့ၣ်တဖၣ် ဒ်အမ့ၢ် ခ့ပူၤ, လၢၢ်မုၢ်ပျီ, စီၤမုၢ်ပျီ, နီၢ်ယိးထၣ်, ကီၤလူၢ်ဒၢ, ဖျးခိၣ်ကရူၢ် ပှၤထူလံၤဖိတဖၣ် ဟဲထီၣ်ဝဲလၢ တၢ်ဃူတၢ်ဖိးအပူၤန့ၣ်လီၤ. ပှၤထူလံၤဖိနီၣ်ဂံၢ်လၢ ဟဲပၥ်ဖျါထီၣ်သးဘျီဝဲအံၤ ခဲလၢၥ်အိၣ်ဝဲ (၃၂၀၀) ဂၤန့ၣ်လီၤ.