ပယီၤသုး ခးပျံၤခးဖုး မုၢ်တြီၢ်ကီၢ်ရ့ၣ် ထံဖိကီၢ်ဖိလၢ ကျိဒိၣ်ကျိဖိ ဒီး တၢ်ခးလိၥ်သး ကဲထီၣ်ဒီး ကညီတၢ်ထူၣ်ဖျဲးသုးမုၢ်ဒိၣ် သုးက့ ၅

မုၢ်နံၤ ၂၃ သီ, လါအီကူး ၂၀၂၁ နံၣ်
ပယီၤသုး မီၤစိရိၤ လၢ အဟဲနုၥ်လီၤဟူးဂဲၤဝဲဒၣ်လၢ မုၢ်တြီၢ်ကီၢ်ရ့ၣ် သုးက့ ၅ ဟီၣ်ကဝီၤပူၤတဖၣ် ဟူးဂဲၤအါထီၣ်ဝဲဒၣ်လၢ သုးဂ့ၢ်ဝီတကပၤ အဖီခိၣ် တၢ်ခးလိၥ်သး ကဲထီၣ်ဝဲဒၣ်ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ ၅ အစုတီၤဖီလၥ် သုးရ့ၣ်တဖၣ် ကိးနံၤဒဲးအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် တၢ်ကစီၣ် စံးဝဲဒၣ်န့ၣ်လီၤ.
ခီဖျိပယီၤသုး လၢအဟံးန့ၢ်ဆူၣ်ဝဲ ထံကီၢ်တၢ်စိတၢ်ကမီၤတဖုအံၤ အတၢ်ဟူးတၢ်ဂဲၤ အါထီၣ်ဝဲလၢ သုးဂ့ၢ်ဝီအဖီခိၣ် တၢ်ခးလိၥ်သး ကဲထီၣ်ဝဲဒၣ်တလီၢ်လီၢ် ကိးနံၤဒဲး တကးဒံးဘၣ်အမဲၥ်ညါ ပယီၤသုးတဖၣ် ခးလီၤဝဲဒၣ်ကျိဖးဒိၣ်ကျိဖိလၢ ကမျၢၢ်ထံဖိကီၢ်ဖိ တၢ်ဖံးအီၣ်မၤအီၣ်အလီၢ်အဃိ ကဲထီၣ်ဝဲ တၢ်ပျံၤတၢ်ဖုး တၢ်လီၤဘၣ်ယိၣ်လၢ ထံဖိကီၢ်ဖိကမျၢၢ်သ့ၣ်တဖၣ် အဂီၢ်န့ၣ်လီၤ.
တလါအံၤ ဖဲလါအီကူး ၂၀ သီ, ၂၀၂၁ နံၣ် ပယီၤသုး စကခ စုတီၤဖီလၥ် ခမရ-၄၀၈, ၄၀၇ ဒီး သုးခိးကီၢ်ဆၢ သုးလၢအဟဲနုၥ်လီၤဟံးဝဲဒၣ် ကျဲတၢ်ဘံၣ်တၢ်ဘၢ ကမးမိၢ် ဒီး ဖၣ်ပူၣ် အဘၢၣ်စၢၤတဖၣ် ခးလီၤဝဲဒၣ် ကျိဒိၣ် ၃၀ ဖျၢၣ် ဒီး ကျိဖိ (၁၀၀၀) ဖျၢၣ် ဆူဒွဲၣ်လိကီၢ်ဆၣ်, မးထီကရူၢ်, မးထီသဝီ, သွၣ်ခိၣ်လိၥ်သဝီ, ထွံၣ်သံအုၣ်သဝီ ဒီး ပူးဘီခိၣ်သဝီ သ့ၣ်တဖၣ် တလီၢ်လီၢ်အဂ့ၢ်န့ၣ် မုၢ်တြီၢ်ကီၢ်ရ့ၣ် တၢ်ကစီၣ်သန့ စံးဝဲဒၣ်န့ၣ်လီၤ.
တလါအံၤ လါအီကူး ၂၁ သီ ဒီး ၂၂ သီ ၂၀၂၁ နံၣ် လၢခံသီအတီၢ်ပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့ ၅ စုတီၤဖီလၥ် သုးရ့ၣ်တဖၣ် ဘၣ်သဂၢၢ်ခးလိၥ်သးဒီး ပယီၤသုးခဲလၢၥ် ၉ ဘျီ ဒီး ပယီၤသုးတကပၤ သံဝဲဒၣ် ၁၂ ဂၤဒီး ဘၣ်ဒိ ၁၉ ဂၤ, ပယီၤသုးသံအကျါ ပၣ်ဃုၥ်ဒီး အသုးဒ့ခိၣ်တဂၤန့ၣ်လီၤ. မ့မ့ၢ်လၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးက့ ၅ အပှၤတကပၤ တၢ်ဘၣ်ဒိဘၣ်ထံး တအိၣ်ဝဲဘၣ်အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် တၢ်ကစီၣ် စံးဝဲဒၣ်န့ၣ်လီၤ.
ပယီၤသုးတဖုအံၤ တၢ်ဟူးတၢ်ဂဲၤ တလီၤစၢ်ဝဲဒၣ်ဘၣ်အဖီခိၣ် ဆဲးဟူးဂဲၤအါထီၣ်ဝဲဒၣ် တၢ်လီၢ်အါတီၤ တကးဘၣ် မၤပျံၤမၤဖုးဝဲဒၣ် ထံဖိကီၢ်ဖိကမျၢၢ် အါထီၣ်ဝဲဒၣ်ကွ့ၢ်ကွ့ၢ်န့ၣ်လီၤ.