ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ ပယီၤသုးအတၢ်ဟူးတၢ်ဂဲၤ ဟဲအါထီၣ်

လါအီကူး ၂၅ သီ, ၂၀၂၁ နံၣ်, သူလ့ၤတၢ်ကစီၣ်
စးထီၣ်လါအီကူး ၂၀၂၁ နံၣ်န့ၣ် ကီၢ်ပယီၤသုးမုၢ်ဒိၣ် လၢအဟံးန့ၢ်ဆူၣ် ထံကီၢ်တၢ်စိတၢ်ကမီၤတဖၣ် ဟူးဂဲၤအါထီၣ်ဝဲလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် တၢ်ပၢဟီၣ်ကဝီၤပူၤစ့ၢ်ကီးန့ၣ်လီၤ.
ဒ်န့ၣ်အသိး ကမျၢၢ်လၢ အပၥ်ဖျါထီၣ်အသး ထီဒါတၢ်ဟံးန့ၢ်ဆူၣ် တၢ်စိတၢ်ကမီၤတဖၣ် ပယီၤသုး လူၤဖီၣ်အဝဲသ့ၣ်, တကတီၢ်ဃီ ပၥ်လီၤစ့ၢ်ကီး တၢ်သမံသမိးအလီၢ် လၢကျဲဒီးဒူသဝီတဖၣ် အိၣ်ထီၣ်ဝဲဒၣ်န့ၣ်လီၤ. ခီဖျိလၢ ပယီၤသုးအတၢ်ဟူးတၢ်ဂဲၤဒ်န့ၣ်အဃိ ကဲထီၣ်တၢ်ပျံၤတၢ်ဖုးလၢ လီၢ်ကဝီၤဒူဖိသဝီဖိတဖၣ် အဂီၢ်န့ၣ်လီၤ.
လၢန့ၣ်အမဲၥ်ညါ ဖဲလါအီကူး တလါအံၤအတီၢ်ပူၤ ပယီၤသုးတဖၣ် မၤအါထီၣ် အသုးတၢ်လီၢ်တၢ်ကျဲ, ပၥ်လီၤတၢ်ဘံၣ်တၢ်ဘၢ လၢဒူသဝီ ဒီး သီခါဖၠၣ်တဖၣ်, ပၥ်လီၤကျဲတၢ်ဘံၣ်တၢ်ဘၢ, လၢအသုးကလၢၤပူၤတခီ မၤအါထီၣ်အသုးဂံၢ်ဘါ ဒီး အတၢ်အီၣ်တၢ်အီတဖၣ်, ဟးထီၣ်ဟူးဂဲၤလၢတၢ်ချၢအါထီၣ် အဂ့ၢ်န့ၣ် လီၢ်ကဝီၤဘၣ်မူဘၣ်ဒါတဖၣ် စံးဝဲဒၣ်န့ၣ်လီၤ.
ခီဖျိလၢ ပယီၤသုးတဖၣ် မၤအါထီၣ်အသုးတၢ်ဟူးတၢ်ဂဲၤဒ်အံၤအဃိ တၢ်လဲၤတၢ်က့ၤကီခဲဝဲ ဒီး ကဲထီၣ်စ့ၢ်ကီး တၢ်ကီတၢ်ခဲလၢ ဒူဖိသဝီဖိတဖၣ် အတၢ်လုၢ်အီၣ်နီၢ်ခိသးသမူ တကးဘၣ် ဒူဖိသဝီဖိတဖၣ် ဘၣ်ယိၣ်ဝဲလၢ တၢ်ဘၣ်သဂၢၢ်ခးလိၥ်သး ဒီး ကညီတၢ်ထူၣ်ဖျဲးသုးမုၢ်ဒိၣ် ကအိၣ်ထီၣ်အဂ့ၢ်န့ၣ် ဒူဖိသဝီဖိ လၢတအဲၣ်ဒိးပၥ်ဖျါအမံၤတဂၤ စံးဝဲဒၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် လီၢ်ကဝီၤခိၣ်နၢ် လၢတအဲၣ်ဒိးပၥ်ဖျါအမံၤတဂၤ စံးစ့ၢ်ကီးဝဲလၢ ပယီၤသုးအတၢ်ဖံးတၢ်မၤဒ်အံၤ ကဲထီၣ်ဝဲ တၢ်ပျံၤတၢ်ဖုးလၢ ကမျၢၢ်တဖၣ်အဂီၢ် ဒီး မ့ၢ်တၢ်မၤတံၥ်တၥ် ကမျၢၢ်တဖၣ် အတၢ်လုၢ်အီၣ်နီၢ်ခိသးမူ တၢ်ဖံးတၢ်မၤန့ၣ်လီၤ. လၢန့ၣ်အမဲၥ်ညါ တၢ်သဘံၣ်သဘုၣ်အိၣ်ထီၣ်လၢ သုးခံဖုအဘၢၣ်စၢၤသ့ဝဲဒၣ်စ့ၢ်ကီးန့ၣ်လီၤ.