ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် ဟီၣ်ကဝီၤပူၤ သုးမီၤစိရိၤတဖၣ် မၤအါထီၣ်အသုးဂံၢ်ဘါ

လါအီကူး ၂၆ သီ, ၂၀၂၁ နံၣ်, သူလ့ၤတၢ်ကစီၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ်ဟီၣ်ကဝီၤပူၤ ဖဲတနံၤအံၤ ဟါခီ ၄ နၣ်ရံၣ် အဆၢကတီၢ် သုးမီၤစိရိၤအသုးတဖၣ် ဟဲထီၣ်ဝဲ ဒီး ကါ ၆ ဘ့ၣ် (သုးကါ ၅ ဘ့ၣ် ဒီး ကမျၢၢ်ကါ ၁ ဘ့ၣ်) န့ၣ်လီၤ. လၢကါ ၆ ဘ့ၣ်အံၤအပူၤ တီၣ်ဝဲအသုးဂံၢ်ဘါပှဲၤပှဲၤ ဒီး လဲၤထီၣ်ဝဲဆူ လၢၢ်ဒိၣ်ဝ့ၢ် တကပၤန့ၣ်လီၤ.

ဖဲလါအီကူး ၂၄ သီအနံၤန့ၣ် သုးမီၤစိရိၤအသုး ခလရ (၆၀) ဒီး ခမရ (၃၄၉) အသုးတဖၣ် ဆီလီၤပၥ်လီၤဝဲအလီၢ်အကျဲ ဖဲလၢၢ်ဒိၣ်ကီၢ်ဆၣ်, ဒီမိၣ်ကရူၢ်, တီကၠီၤပီၣ်သဝီ ဒီး ဝါပ့ၤစုၣ်သဝီ ပူၤန့ၣ်လီၤ. ဒီဖဲလါအီကူး ၂၆ သီန့ၣ် အဝဲသ့ၣ်တဖၣ် မၤအါထီၣ်စ့ၢ်ကီး အသုးဂံၢ်ဘါ ဖဲတၢ်လီၢ်ဖဲန့ၣ် န့ၣ်လီၤ.

ခီဖျိပယီၤသုးတဖၣ် မၤအါထီၣ်အဂံၢ်အဘါ ဒ်အံၤအဃိ လီၢ်ကဝီၤကမျၢၢ်တဖၣ် ဘၣ်ပျံၤဘၣ်ဖုးတၢ်လၢ တၢ်ဒုးကကဲထီၣ်န့ၣ်လီၤ အဂ့ၢ်န့ၣ် ပှၤလီၢ်ကဝီၤဖိတဖၣ် စံးဝဲဒၣ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ကီၢ်ဆၣ်နဲၣ်ရွဲၣ် ပဒိၣ်စီၤဆၣ်ဝါ စံးဝဲ "ပယီၤသုးတဖုအံၤ ဖဲအဝဲသ့ၣ် ဟံးန့ၢ်ဆူၣ် တၢ်စိတၢ်ကမီၤလံၤလံၤန့ၣ် အဝဲသ့ၣ်မ့ၢ်ပှၤလၢ အကမၤကမၣ်တၢ်လံ ဒီး ခဲအံၤမၤအါထီၣ်ဝဲ အသုးအဂံၢ်အဘါန့ၣ် မ့ၢ်ကမၤကမၣ်တၢ် စ့ၢ်ကီးန့ၣ်လီၤ".