လါအီကူး ၃၁ သီ, ၂၀၂၁ နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ်, ယ့ၤလဲသဝီဖိ ၆ ဂၤဘၣ်တၢ်ဖီၣ်ဃၥ်အီၤလၢ သုးမီၤစိရိၤအသုး ခလရ (၆၀) လၢအဘၣ်တၢ်တီခိၣ်ရိၣ်မဲအီၤလၢ သုးခိၣ်စိ စ့ၤယၤလ့ န့ၣ်လီၤ.
ဖဲတဂီၤအံၤ (လါအီကူး ၃၁ သီ, ၂၀၂၁ နံၣ်) ဂီၤခီ ၈ နၣ်ရံၣ် ၅၄ မံးနံး အဆၢကတီၢ် သုးမီၤစိရိၤအသုးတဖၣ် ဟဲနုၥ်လီၤဝဲလၢ နိၣ်ကူသဝီပူၤ လၢကါ ၂ ခိၣ်ဃုၥ်ဒီး သုးဂံၢ်ဘါပှဲၤပှဲၤကါပူၤ န့ၣ်လီၤ. ဒီးဖဲ ၉ နၣ်ရံၣ် အဆၢကတီၢ်န့ၣ် သုးတဖုအံၤ နုၥ်လီၤကဒီးဝဲလၢ ယ့ၤလဲသဝီ ဒီး လဲၤဝဲလၢ မံၣ်တီၣ်တ့ (ပှၤလၢအအိၣ်ဃူ သုးမီၤစိရိၤတဂၤ) အဟံၣ်န့ၣ်လီၤ.
ဒီးဖဲန့ၣ် ဖီၣ်ဝဲဒၣ်သဝီဖိ ၆ ဂၤ လၢအမ့ၢ် စီၤပပြုၣ်စ့, စီၤထ့လွ့ၤ, ကိၤမ့မ့, သရၣ်ဒိၣ်မိစဲၣ် (တၢ်အိၣ်ဖှိၣ်သရၣ်), အူမၠ့ၣ်ရွ့ၤ ဒီး စီၤကပြုၢ်ထူ သ့ၣ်တဖၣ်န့ၣ်လီၤ.

ပှၤလၢတၢ်ဖီၣ်န့ၢ်အီၤတဖၣ် ဘၣ်တၢ်က့ၤကိးအီၤဆူ မံၣ်တီၣ်တ့ အဟံၣ် ဒီး ဘၣ်တၢ်သမံသမိး အဝဲသ့ၣ်န့ၣ်လီၤ. တၢ်သမံသမိးအဝဲသ့ၣ်ဝံၤ ဒီး ပျၢ်ကွံၥ်ဝဲ သရၣ်ဒိၣ်မိစဲၣ် ခီဖျိအသးပှၢ်အဃိ မ့မ့ၢ် အဂၤ ၅ ဂၤတခီ စံးဝဲလၢ သမံသမိးဝဲမ့ၢ်ဝံၤ ကပျၢ်ကွံၥ်ဝဲ ဘၣ်ဆၣ် တပျၢ်ကွံၥ်ဝဲဒံးဘၣ် ဒီး က့ၤကိးဝဲလၢ နၣ်သၤကွ့သဝီ အဂ့ၢ်န့ၣ် သ့ၣ်ညါဘၣ်န့ၣ်လီၤ.