တၢ်တၢၣ်ပီၣ်တဲသကိး ခ့ၣ်အဲၣ်ယူၣ်-တၢ်ကရၢကရိတၢ်ဖံးတၢ်မၤဒီး ကရၢသဘျ့လၢ အနုၥ်လီၤမၤတၢ်လၢ ဟီၣ်ကဝီၤပူၤတဖၣ်

လါအီးကထိဘၢၣ် (၂၈) သီ, ၂၀၂၀
ဖဲ လါအီးကထိဘၢၣ် (၂၈) သီနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ဆၣ်လၢၢ်ဒိၣ် မၤတၢ်တၢၣ်ပီၣ်တဲသကိးဃုၥ် ဒီး လီၢ်ကဝီၤကညီကရၢသဘျ့တဖၣ် တကတီၢ်ဃီ ပၥ်ဃုၥ်ဒီး ခ့ၣ်အဲၣ်ယူၣ်-ပှၤဂ့ၢ်ဝီကရၢတဖၣ် ဘၣ်ထွဲတၢ်နုၥ်လီၤမၤတၢ်ဂုၤထီၣ်ပသီထီၣ် တၢ်ဖံးတၢ်မၤလၢ လၢၢ်ဒိၣ်ကီၢ်ဆၣ်ဟီၣ်ကဝီၤပူၤ တဖၣ်န့ၣ်လီၤ.
တၢ်ရဲၣ်တၢ်ကျဲၤတဘျီအံၤ ကညီကရၢသဘျ့လၢ အဟဲထီၣ်တဖၣ် မ့ၢ်ဝဲ ကညီလံၥ်လဲၢ်တၢ်ဆဲးတၢ်လၤကရၢ, ရှးမရံ (ကညီပှၤဂ့ၢ်ဝီကရၢ), စစ်တေၥ်သံစ့ၣ်, ကညီသးစၢ်ကရၢ, ကညီပိၥ်မုၣ်ကရၢ ဃုၥ်ဒီး ကီၢ်ဆၣ်ခိၣ်နၢ်တဖၣ် န့ၣ်လီၤ.
တၢ်ရဲၣ်တၢ်ကျဲၤတဘျီအံၤ ဘၣ်တၢ်တီခိၣ်ရိၣ်မဲအီၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ဆၣ်လၢၢ်ဒိၣ် နဲၣ်ရွဲၣ် ပဒိၣ်စီၤဆၣ်ဝါ ဒီး တၢ်ကရၢကရိဝဲၤကျိၤ နဲၣ်ရွဲၣ် ပဒိၣ်စီၤဝါမုၢ် န့ၣ်လီၤ. တၢ်ရဲၣ်တၢ်ကျဲၤဘျီဝဲအံၤ ပှၤနီၣ်ဂံၢ်ခဲလၢၥ်အိၣ်ဝဲ (၂၃) ဂၤန့ၣ်လီၤ.
တၢ်တၢၣ်ပီၣ်တဲသကိးတဘျီအံၤ တၢ်ပညိၣ်တခီမ့ၢ်ဝဲ ကညီဖိကမၤကညီဖိအတၢ်ဖံးတၢ်မၤ ဒီး ကရၢသဘျ့လၢ အနုၥ်လီၤမၤတၢ်လၢ ခ့ၣ်အဲၣ်ယူၣ်-ဟီၣ်ကဝီၤပူၤတဖၣ် ကလဲၤဝဲဒ် ကီၢ်ပဒိၣ်ခံဖု အတၢ်အၢၣ်လီၤတူၢ်လိၥ်ဃၥ် တၢ်ပတုၥ်တၢ်ခး လံၥ်ဃံးဃၥ်အသိး ဒီး တကတီၢ်ဃီ ကဘၣ်လူၤပိၥ်မၤထွဲဝဲ ဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၥ်လီၤတၢ်ဖံးတၢ်မၤ ကျိၤကျဲတဖၣ် န့ၣ်လီၤ.
တကတီၢ်ဃီ ကရၢသဘျ့လၢ ဟဲနုၥ်လီၤမၤတၢ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဟီၣ်ကဝီၤပူၤတဖၣ် ကဘၣ်မ့ၢ်ကရၢလၢ ခ့ၣ်အဲၣ်ယူၣ်-တူၢ်လိၥ်အီၤ တဖၣ်န့ၣ်လီၤ.
ဘၣ်ထွဲဒီးတကီၢ်ခါထံရူၢ်ကီၢ်သဲးတၢ်အိၣ်သးအဖီခိၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ဆၣ်လၢၢ်ဒိၣ် (သုးရ့ၣ်-၉) အိၣ်ဆၢထၢၣ်ဝဲဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ထံရူၢ်ကီၢ်သဲးတၢ်လဲၤကျဲအသိး ဂၢၢ်ကျၢၤခၢမးန့ၣ်လီၤ.