လါစဲးပထ့ဘၢၣ် ၆ သီ, ၂၀၂၂ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤပူၤ ခီဖျိသုးမီၤစိရိၤအသုးတဖၣ် အတၢ်ဟူးတၢ်ဂဲၤတဖၣ်အဃိ ဒူသဝီကမျၢၢ်ထံဖိကီၢ်ဖိတဖၣ် ဘၣ်ဃ့ၢ်မှံဟးဖျိးဝဲဒၣ်န့ၣ်လီၤ. ဒ်သိးကမျၢၢ်ထံဖိကီၢ်ဖိ လၢအဃ့ၢ်မှံဟးဖျိးတဖၣ် ကဒိးန့ၢ်ဝဲ တၢ်ကူဆါယါဘျါအဂီၢ် ချၢၣ်လွံၢ်ထူၣ်ကီၢ်ရ့ၣ် ကညီပှၤဂ့ၢ်ဝီကရၢတဖၣ် တီခိၣ်ရိၣ်မဲဝဲ ဒီး လဲၤဟ့ၣ်ဝဲ တၢ်ကူဆါယါဘျါ အတၢ်ရဲၣ်တၢ်ကျဲၤ ခံဘျီတဘျီဆူ ပှၤဂ့ၢ်မှံဟးဖျိး လၢအအိၣ်လၢ လၢၢ်ဒိၣ်ကီၢ်ဆၣ် ဟီၣ်ကဝီၤပူၤတဖၣ်န့ၣ်လီၤ.

ချၢၣ်လွံၢ်ထူၣ်ကီၢ်ရ့ၣ် ဟီၣ်ကဝီၤပူၤ ကမျၢၢ်ထံဖိကီၢ်ဖိ လၢဘၣ်ဃ့ၢ်မှံဟးဖျိးတဖၣ် ဘၣ်ကွၢ်ဆၢၣ်မဲၥ်ဝဲဒၣ်ဒီး တၢ်အီၣ်တၢ်အီ, တၢ်ကူတၢ်သိးအတၢ်ကီတၢ်ခဲ တကးဘၣ် ဘၣ်ကွၢ်ဆၢၣ်မဲၥ်စ့ၢ်ကီး ဒီး တၢ်အိၣ်ဆူၣ်အိၣ်ချ့ တၢ်ဂ့ၢ်ကီတဖၣ်အဃိ ချၢၣ်လွံၢ်ထူၣ်ကီၢ်ရ့ၣ် ကညီပှၤဂ့ၢ်ဝီကရၢတဖၣ် ဘၣ်လဲၤဟ့ၣ်ဝဲ တၢ်အိၣ်ဆူၣ်အိၣ်ချ့ အတၢ်ကူဆါယါဘျါန့ၣ်လီၤ.

သုးမီၤစိရိၤအသုးတဖၣ် ဟူးဂဲၤဝဲလၢ ဟီၣ်ကဝီၤ ဒီး မၤထီဒါဝဲ ပှၤဂ့ၢ်ဝီခွဲးယၥ်တဖၣ် ဒ်အမ့ၢ် ခးလီၤကျိဖးဒိၣ်ကျိဖိ လၢဒူသဝီပူၤ, ဟဲခးလီၤတၢ်လၢ ကဘီယူၤ လၢဒူသဝီပူၤ, ဖီၣ်ဒူဖိသဝီဖိတဖၣ်ဒီးမၤဆူးမၤဆါဝဲ, ဟုၣ်န့ၢ်ကမျၢၢ်အတၢ်ပီးတၢ်လီ တၢ်ဖိတၢ်လံၤ, မၤဟးဂီၤဒူဖိသဝီဖိအတၢ်စုလီၢ်ခီၣ်ခိၣ် တၢ်ပီးတၢ်လီ, အီၣ်ဟုၣ်ကမျၢၢ်အဆၣ်ဖိကီၢ်ဖိ ဒီး မၤသံမၤဝီ၀ဲ အဃိ ဒူဖိသဝီဖိတဖၣ် ဘၣ်ကွၢ်ဆၢၣ်မဲၥ်ဒီး တၢ်ဂ့ၢ်ကီတဖၣ်န့ၣ်လီၤ.

ခီဖျိလၢ သုးမီၤစိရိၤအသုးတဖၣ် အတၢ်ဟူးတၢ်ဂဲၤဒ်သိးအံၤတဖၣ်အဃိ လၢတၢ်ဒီသဒၢက့ၤ ကမျၢၢ်ဖိတဖၣ်အဂီၢ် ဒ်မူဒါအိၣ်အသိး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢတဖၣ် ဒီး သုးမီၤစိရိၤအသုးတဖၣ် အဘၢၣ်စၢၤ တၢ်ဒုးကဲထီၣ်ဝဲအဃိ ဒူဖိသဝီဖိတဖၣ် ဘၣ်ပၥ်တ့ၢ်ကွံၥ်ဒူသဝီ ဒီး ဃ့ၢ်အိၣ်ကဒုလၢ တၢ်ပူၤဖျဲးအလီၢ်န့ၣ်လီၤ.