လါအီးကထိဘၢၣ် ၆ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ခိၣ်နၢ်တဖၣ် ဒ်အမ့ၢ် ဒူသထူၣ်ကီၢ်ရ့ၣ် ကီၢ်ရ့ၣ်ခိၣ်နၢ်ဘၣ်မူဘၣ်ဒါတဖၣ်, မုၢ်တြီၢ်ကီၢ်ရ့ၣ် ကီၢ်ရ့ၣ်ခိၣ်နၢ်ဘၣ်မူဘၣ်ဒါတဖၣ်, ဒူပျၥ်ယၥ်ကီၢ်ရ့ၣ် ကီၢ်ရ့ၣ်ခိၣ်နၢ်ဘၣ်မူဘၣ်ဒါတဖၣ် ဃုၥ်ဒီး ၉ ၀ီတဝီ စၢၤသွဲၣ်သီကၠိခိၣ် ပဒိၣ်စီၤပိၣ်ပိၣ်ထူအီၣ် ဖဲ ၂၀၂၃ နံၣ် လါအီးကထိဘၢၣ် ၂ သီအနံၤန့ၣ် ထံၣ်လိၥ်အိၣ်သကိးဝဲ ဒီး ကတိၤဟ့ၣ်ဂံၢ်ဟ့ၣ်ဘါဝဲ ၉ ၀ီတဝီ စၢၤသွဲၣ်သီကၠိဖိတဖၣ် ဖဲခ့ၣ်အဲၣ်ယူၣ် လီၢ်ခၢၣ်သး စၢၤသွဲၣ်သီကၠိ ဘျီၣ်ဒိၣ်အပူၤန့ၣ်လီၤ.

ဖဲတၢ်ထံၣ်လိၥ်အိၣ်သကိး အဆၢကတီၢ် ၉ ၀ီတဝီ စၢၤသွဲၣ်သီကၠိ ကၠိခိၣ် ပဒိၣ်စီၤပိၣ်ပိၣ်ထူအီၣ် ဟ့ၣ်ဒုးသ့ၣ်ညါဝဲ ကၠိဖိသ့ၣ်တဖၣ် လၢကီၢ်ရ့ၣ်ခိၣ်နၢ်တဖၣ်, ကၠိတၢ်လဲၤတရံးအတၢ်အိၣ်သး ဒီးတၢ်မၤလိမၤဒိး အတၢ်အိၣ်သးတဖၣ် ပၥ်ဖျါဒုးသ့ၣ်ညါဝဲ ကီၢ်ရ့ၣ်ခိၣ်နၢ် တဖၣ်န့ၣ်လီၤ.

ဝံၤအလီၢ်ခံ မုၢ်တြီၢ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤကျိၣ်ထူ ကတိၤဟ့ၣ်ဂံၢ်ဟ့ၣ်ဘါဝဲ ၉ ၀ီတဝီ စၢၤသွဲၣ်သီကၠိဖိတဖၣ်လၢ ခီဖျိထံရူၢ်ကီၢ်သဲးတၢ်အိၣ်သး ဒီးတၢ်ဃံးတၢ်စ့ၤ အကလုၥ်ကလုၥ်အဃိ ကၠိဖိတဖၣ် အသးသဟီၣ် သုတလီၤစၢ်တဂ့ၤအဂီၢ်, ကဂုၥ်ကျဲးစၢး ဟံးန့ၢ်တၢ်မၤလိ တၢ်ကူၣ်ဘၣ်ကူၣ်သ့ ဒ်သိးမုၢ်တနံၤ ကကဲထီၣ်တၢ်ဘျူးတၢ်ဖှိၣ်လၢ ထံကီၢ်ဒီးပှၤကလုၥ်အဂီၢ် ဒ်န့ၣ်အသိး ကၠိဖိတဖၣ် ဒ်အမ့ၢ် ပှၤလၢအဟဲထီၣ်လၢ ကီၢ်ရ့ၣ်တဖၣ်အသိး တုၤမ့ၢ်တၢ်မၤလိဝံၤဒီး ကက့ၤလီၤလၢ လီၢ်ကဝီၤဒၣ်ဝဲစုၥ်စုၥ် ဒီး ဖံးသကိးမၤသကိးတၢ်လၢ ထံကီၢ်ဒီးပှၤကလုၥ်အဂီၢ် န့ၣ်လီၤ.

ဒ်န့ၣ်အသိး ဒူသထူၣ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤအ့နဲၣ် မၤလိၥ်ထွဲကၠိဖိတဖၣ်လၢ ကအိၣ်ဒီးတၢ်သးစၢၢ်ဆၢ လၢတၢ်ဖံးလိမၤလိအပူၤ, ကဂုၥ်ကျဲးစၢး ဖံးလိမၤလိတၢ် ဒီးကကဲထီၣ်ခိၣ်နၢ်ပှၤမၤသကိးတၢ်အဂ့ၤကတၢၢ် လၢပလီၢ်ကဝီၤဒၣ်ဝဲစုၥ်စုၥ်အပူၤ ဒီးဂဲၤလိၥ်သကိးလၢ ကညီကလုၥ်အဂီၢ်ဃူဃူန့ၣ်လီၤ. လၢန့ၣ်အမဲၥ်ညါ ဒူပျၥ်ယၥ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤလံးစတၢၣ် (မ့ၢ်ဝဲ စၢၤသွဲၣ်သီကၠိခိၣ်လီၢ်လံၤ) ကတိၤဟ့ၣ်ဂံၢ်ဟ့ၣ်ဘါဝဲ ကၠိဖိတဖၣ်လၢ သးစၢ်တဖၣ်မ့ၢ်ဝဲ တၢ်မျၢ်လုၢ်ဒိၣ်ပှ့ၤဒိၣ်တဖၣ်အဃိ မ်ကမ့ၢ်စ့ၢ်ကီးပှၤလၢ အဟ့ၣ်လီၤသးလၢ ထံကီၢ်ဒီးကလုၥ်အဂီၢ် အဂ့ၢ်န့ၣ် ကတိၤဆီၣ်သခူထီၣ်ဝဲ ကၠိဖိတဖၣ်အသးသဟီၣ်န့ၣ်လီၤ.