လါစဲးပထ့ဘၢၣ် ၂၈ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါစဲးပထ့ဘၢၣ် ၁၅ သီ တုၤ ၁၇ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် ကညီသးစၢ်ကရၢ ရဲၣ်ကျဲၤမၤဝဲ ကီၢ်ရ့ၣ်ကညီသးစၢ်ကရၢ နံၣ်ကတၢၢ်တၢ်အိၣ်ဖှိၣ် ဖဲဖၣ်အၣ်ကီၢ်ရ့ၣ် တန့ခၠါကီၢ်ဆၣ် ထံကလ့သဝီ ကညီသးစၢ်ကရၢဝဲၤဒၢး န့ၣ်လီၤ.

တၢ်ထံၣ်လိၥ်အိၣ်သကိးတဘျီအံၤ ဘၣ်တၢ်တီခိၣ်ရိၣ်မဲရဲၣ်ကျဲၤအီၤလၢ ဖၣ်အၣ်ကီၢ်ရ့ၣ် ကညီသးစၢ်ကရၢ န့ၣ်လီၤ. တၢ်ထံၣ်လိၥ်အိၣ်သကိးတဘျီအံၤ ပှၤလၢဟဲထီၣ်တဖၣ် မ့ၢ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် ကီၢ်ရ့ၣ်ပၢၤကီၢ်ခိၣ် သုးခိၣ်ဒိၣ်ဂီၢ်ဂ့ၢ် စီၤမီၣ်ကၠံၣ်, ဖၣ်အၣ်ကီၢ်ရ့ၣ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤခိၣ် ပဒိၣ်နီၢ်ရှံဝါ, တၢ်တြဲၢ်ကီၢ်ဆၣ် ကီၢ်ဆၣ်ခိၣ် ဒီး တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤခိၣ်, ထံၣ်လိၣ်ကီၢ်ဆၣ် ကီၢ်ဆၣ်ခိၣ် ဒီး တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤခိၣ်, လူပျဲၢ်ကီၢ်ဆၣ် တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤခိၣ်, ကညီသးစၢ်ကရၢ လီၢ်ခၢၣ်သးခိၣ်နၢ်, လူပျဲၢ်ကီၢ်ဆၣ် ကညီသးစၢ်ကရၢခိၣ်နၢ်, တၢ်တြဲၢ်ကီၢ်ဆၣ် ကညီသးစၢ်ကရၢခိၣ်နၢ်, တန့ခၠါကီၢ်ဆၣ် ကညီသးစၢ်ကရၢခိၣ်နၢ်, တန့ခၠါကီၢ်ဆၣ် ကညီပိၥ်မုၣ်ကရၢခိၣ်နၢ်, ဒူယီၢ်ကီၢ်ဆၣ် ကညီသးစၢ်ကရၢခိၣ်နၢ်, မဲၢ်လးကညီသးစၢ်ကရၢခိၣ်နၢ် ဒီး ကညီသးစၢ်တဖၣ် ဟဲထီၣ်ဝဲ တၢ်ထံၣ်လိၥ်အိၣ်သကိးအံၤ ဒီးတၢၣ်ပီၣ်တၢၣ်ပီသကိးတၢ်န့ၣ်လီၤ.

တၢ်ထံၣ်လိၥ်တၢၣ်ပီၣ်တဲသကိးတဘျီအံၤ ခိၣ်နၢ်လၢဟဲထီၣ်တဖၣ် ကတိၤဟ့ၣ်ဂံၢ်ဟ့ၣ်ဘါဝဲ သးစၢ်တဖၣ် လၢကဂုၥ်ကျဲးစၢး ခီဖျိသကိး တကီၢ်ခါတၢ်ကီတၢ်ခဲ ဒီးတၢ်တၤတၢ်တဖၣ်န့ၣ်လီၤ. တၢ်ကတိၤဟ့ၣ်ဂံၢ်ဟ့ၣ်ဘါဝံၤအလီၢ်ခံ ခိၣ်နၢ်ဘၣ်မူဘၣ်ဒါတဖၣ် ကတိၤပၥ်ဖျါ ဒုးသ့ၣ်ညါဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်သူၣ်ထီၣ်သဲစး တၢ်ဘျၢခိၣ်သ့ၣ် တၢ်မၤကျဲသနူ ဒီး တၢ်မၤကျဲတဖၣ်, ကညီသးစၢ်ကရၢ တၢ်သူၣ်ထီၣ်တၢ်ဘျၢသဲစးခိၣ်သ့ၣ်, တၢ်တီခိၣ်ရိၣ်မဲ ဒီး တၢ်ပၢဆှၢရဲၣ်ကျဲၤ အတၢ်သ့ၣ်ညါနၢ်ပၢၢ်တဖၣ်န့ၣ်လီၤ.

တကီၢ်ခါတၢ်အိၣ်သး ဒီးတၢ်တၤတၢ်တဖၣ်အဖီခိၣ် ဒ်သိးသးစၢ်တဖၣ် လဲၤခီဖျိကွံၥ်ဝဲ ကန့ၢ်ကသ့အဂီၢ် တၢ်မၤလၢတၢ်ကဘၣ်မၤအီၤတဖၣ် သးစၢ်ဒီးခိၣ်နၢ် လၢအဟဲထီၣ်တၢ်ထံၣ်လိၥ်အိၣ်သကိးတဖၣ် တၢၣ်ပီၣ်တဲသကိးဝဲ ဘျဲးဘျဲးဘျီးဘျီးဝံၤ ပၥ်လီၤစ့ၢ်ကီးဝဲ တၢ်ဆၢတဲၥ် လၢတၢ်ကဘၣ်မၤဖျါထီၣ်အီၤဆူညါ တဖၣ်န့ၣ်လီၤ. တၢ်ထံၣ်လိၥ်အိၣ်သကိးအံၤ တၢ်ပျၢ်ကွံၥ်အီၤလၢ ကညီဒီကလုၥ်တၢ်သးဝံၣ်န့ၣ်လီၤ.