လါစဲးပထ့ဘၢၣ် ၂၂ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါစဲးပထ့ဘၢၣ် ၁၉ သီတုၤ ၂၂ သီနံၤတဖၣ်အဆၢကတီၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ် ကညီပိၥ်မုၣ်ကရၢ ရဲၣ်ကျဲၤမၤဝဲ ကီၢ်ဆၣ်ကညီပိၥ်မုၣ်ကရၢ ခီကရဲး (၉) ဝီတဝီ တၢ်ရဲၣ်တၢ်ကျဲၤန့ၣ်လီၤ.

လၢခီကရဲးတၢ်ရဲၣ်တၢ်ကျဲၤတဘျီအံၤန့ၣ် ဒူသဝီကရူၢ် (၁၀) ဘ့ၣ် ကညီပိၥ်မုၣ်ခိၣ်နၢ်တဖၣ် ဒီး ခိၣ်နၢ်ခၢၣ်စး ခဲလၢၥ် (၅၂) ဂၤဟဲထီၣ်ဝဲန့ၣ်လီၤ. ခီကရဲးဃုထၢပၥ်လီၤဝဲ ကညီပိၥ်မုၣ်ကရၢ ပၢဆှၢတၢ်ကမံးတံၥ် ၉ ဂၤဝံၤ တၢ်နီၤဖးလီၤဝဲမူဒါတၢ်ဖံးတၢ်မၤတဖၣ် ဒ်အလီၢ်အိၣ်ဝဲအသိးန့ၣ်လီၤ.

ဝံၤအလီၢ်ခံ ကညီပိၥ်မုၣ်ကရၢ ခိၣ်နၢ်လၢဘၣ်တၢ်ဃုထၢထီၣ်အီၤတဖၣ် အၢၣ်လီၤအီလီၤအသးလၢ နီၣ်တယၢ်အမဲၥ်ညါဝံၤ တၢ်ဖံးတၢ်မၤလၢ တၢ်မၤတ့ၢ်အီၤ ၂ နံၣ်အတီၢ်ပူၤတဖၣ် တၢ်ကွၢ်ကဒါက့ၤအီၤ, ပဲၥ်ထံနီၤဖးက့ၤအီၤဝံၤ တၢ်ပၥ်လီၤဝဲ တၢ်ဖံးတၢ်မၤလၢ တၢ်ကမၤဖျါထီၣ်အီၤဆူညါ ၂ နံၣ်အတီၢ်ပူၤတဖၣ်န့ၣ်လီၤ. ခီကရဲးတဘျီအံၤ တၢ်ဃုထၢထီၣ်ဝဲ ပၢဆှၢတၢ်ကမံးတံၥ် ၉ ဂၤ ဒီး တၢ်ပၥ်လီၤဝဲမူဒါတၢ်ဖံးတၢ်မၤတဖၣ်န့ၣ်လီၤ.

ခီကရဲးဃုထၢထီၣ် ပၢဆှၢတၢ်ကမံးတံၥ် (၉) ဂၤမ့ၢ်ဝဲ
၁. နီၢ်ဟ့ၣ်ဘျူးဖီ - ကရၢခိၣ်
၂. နီၢ်အဲၣ်သယုၢ်ဆၢ - ကရၢခိၣ်-၂
၃. နီၢ်ခုအဲၣ်ဖီ - နဲၣ်ရွဲၣ်
၄. နီၢ်ဆၢခုၣ်ဖီ - နဲၣ်ရွဲၣ်သဃဲၤ
၅. နီၢ်ကၠူၤလဲၣ်ဖီ - တၢ်ကရၢကရိဒီးတၢ်ဟ့ၣ်တၢ်သ့ၣ်ညါဝဲၤဒ့မူဒါခိၣ်
၆. နီၢ်ဖီအဲၣ်တၢ်ကပီၤဆှံ - တၢ်ကူၣ်ဘၣ်ကူၣ်သ့ဒီးတၢ်အိၣ်ဆူၣ်အိၣ်ချ့မူဒါခိၣ်
၇. နီၢ်လၢၢ်ဖီ - ပှၤဂ့ၢ်ဝီမူဒါခိၣ်
၈. နီၢ်ထံခုၣ်ဆၢ - ကျိၣ်စ့ဂ့ၢ်ဝီမူဒါခိၣ်
၉. နီၢ်ဆၢဃံလၤဖီ - ပှၤဆဲးစ့
    သ့ၣ်တဖၣ်န့ၣ်လီၤ.

တချုးတၢ်စးထီၣ်ဝဲ ကညီပိၥ်မုၣ်ကရၢ ခီကရဲးဒံးဘၣ်န့ၣ် ဖဲလါစဲးပထ့ဘၢၣ် ၁၀ တုၤလၢ ၁၈ သီမုၢ်နံၤတဖၣ်န့ၣ် တၢ်ရဲၣ်ကျဲၤမၤဝဲ တၢ်မၤလိအမူး ဒီးပိၥ်ထွဲထီၣ်အခံလၢ ခီကရဲး ဖဲလါစဲးပထ့ဘၢၣ် ၁၉ သီတုၤ ၂၂ သီအနံၤသ့ၣ်တဖၣ်န့ၣ်လီၤ. ခီကရဲးတဘျီအံၤ တၢ်မၤအီၤဝံၤဝဲဂ့ၤဂ့ၤဘၣ်ဘၣ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, မူကီၢ်ဆၣ် ကညီပိၥ်မုၣ်ကရၢန့ၣ် ရဲၣ်ကျဲၤမၤဝဲ ခီကရဲး ဒ်ကညီပိၥ်မုၣ်ကရၢ တၢ်ဘျၢခိၣ်သ့ၣ်အသိး ၂ နံၣ်တဘျီန့ၣ်လီၤ. ခီကရဲးအံၤ တၢ်မၤအီၤပှဲၤထီၣ်လံဝဲ ၉ ဘျီတဘျီလံန့ၣ်လီၤ.