တၢ်မၤလၤကပီၤ ကညီဒီကလုၥ် ပၢၤကီၢ်သုးမုၢ်နံၤ ဆၢက့ၤအလီၢ် ပှဲၤထီၣ် (၃၂) နံၣ် ဖဲကီၢ်သူလ့ၤတၢ်ပၢ, ဖၣ်အၣ်ကီၢ်ရ့ၣ် ဟီၣ်ကဝီၤပူၤ

လါစဲးပထ့ဘၢၣ် ၉ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါစဲးပထ့ဘၢၣ် ၉ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် ရဲၣ်ကျဲၤမၤဝဲ ကညီဒီကလုၥ်ပၢၤကီၢ်သုးမုၢ်နံၤ ဆၢက့ၤအလီၢ် (၃၂) ဝီတဝီ အမူးန့ၣ်လီၤ.

တၢ်မၤလၤကပီၤ မူးအတၢ်ရဲၣ်တၢ်ကျဲၤဘျီဝဲအံၤ ပှၤလၢဟံးမူဒါ ကယၢကယဲမူးန့ၣ် မ့ၢ်ဝဲ သုးခိၣ်ဒိၣ်ဂီၢ်ဂ့ၢ် စီၤဆၣ်မူစ့ ဒီး သုးခိၣ်ဖိ စီၤခုဂ့ၤ သ့ၣ်တဖၣ်န့ၣ်လီၤ. တၢ်ဖးဖျါထီၣ်ဝဲ တၢ်ရဲၣ်လီၤကျဲၤလီၤဝံၤ တၢ်ဟ့ၣ်ထီၣ်သကိး တၢ်ယူးယီၣ်ဆူ ကညီဒီကလုၥ် အနီၣ်တယၢ် ဝံၤ, တၢ်စးထီၣ်ဝဲ တၢ်မၤလၤကပီၤ မူးအတၢ်ရဲၣ်တၢ်ကျဲၤန့ၣ်လီၤ.

လၢတၢ်မၤလၤကပီၤ မူးတၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ, လီၢ်ခၢၣ်သးထီဘိကမံးတံၥ် ပဒိၣ်စီၤသမ့ၣ်ထိ, ဖၣ်အၣ်ကီၢ်ရ့ၣ် ကီၢ်ရ့ၣ်ခိၣ် ပဒိၣ်စီၤအီၣ်မီၣ်အ့, လီၢ်ခၢၣ်သး ပၢဆှၢတၢ်ကမံးတံၥ် ပဒိၣ်နီၢ်ဒါဒါ, လီၢ်ခၢၣ်သး ထီဘိကမံးတံၥ် ပဒိၣ်မါခဲနဒံၢ်, လီၢ်ခၢၣ်သး ထီဘိကမံးတံၥ် ပဒိၣ်နီၢ်မဲရံၤထ့, လီၢ်ခၢၣ်သး ပၢၤကီၢ်ခိၣ်ခိၣ်ကျၢၢ် သုးခိၣ်ဒိၣ်စိ စီၤကၠံၣ်နိၣ်, ကီၢ်ရ့ၣ်ပၢၤကီၢ်ခိၣ် သုးခိၣ်ဒိၣ်ဂီၢ်ဂ့ၢ် စီၤမီၣ်ကၠံၣ် ဒီး ကၠိဖိမုၣ်ခွါ, ဒူသဝီကမျၢၢ်တဖၣ် ဟဲထီၣ်မၤလၤကပီၤဝဲဒၣ် မူးတၢ်ရဲၣ်တၢ်ကျဲၤတဘျီအံၤန့ၣ်လီၤ. ပှၤဟဲထီၣ်မၤလၤကပီၤ မူးတဘျီအံၤ ခဲလၢၥ်အိၣ်ဝဲ (၂၀၀)  ဃၣ်ဃၣ်န့ၣ်လီၤ.

လၢတၢ်ရဲၣ်တၢ်ကျဲၤတဘျီအံၤန့ၣ် သုးခိၣ်ဖိ စီၤယၤဇၤဟ့ ဖးဖျါထီၣ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ်ပဒိၣ်စီၤကွဲၤထူဝ့ အလံၥ် ဟ့ၣ်ယုၢ် လၢအဟ့ၣ်ယုၢ်ဝဲဖဲ ၃၂ နံၣ်ပှဲၤထီၣ် ကညီဒီကလုၥ်ပၢၤကီၢ်သုးမုၢ်နံၤ န့ၣ်လီၤ. ဝံၤအလီၢ်ခံ သုးခိၣ်ဖိ စီၤအီကူးစတါ ဖးဖျါထီၣ်ဝဲ ပၢၤကီၢ်ခိၣ်အတၢ်ကတိၤ လၢပယီၤကျိၥ်န့ၣ်လီၤ. တၢ်ရဲၣ်တၢ်ကျဲၤတဘျီအံၤအပူၤ ခိၣ်နၢ်ဒိၣ်ထီတဖၣ် ဒ်အမ့ၢ် ပဒိၣ်စီၤလးထိ နဲၣ်ရွဲၣ်ခိၣ်ကျၢၢ်သဃဲၤ (၂), ပဒိၣ်စီၤသမ့ၣ်ထိ လီၢ်ခၢၣ်သးထီဘိကမံးတံၥ်, ဖၣ်အၣ်ကီၢ်ရ့ၣ် ကီၢ်ရ့ၣ်ခိၣ် ပဒိၣ်စီၤအီၣ်မီၣ်အ့ သ့ၣ်တဖၣ် ကတိၤဟ့ၣ်ဂံၢ်ဟ့ၣ်ဘါတၢ်ဝံၤ ဖၣ်အၣ်ကီၢ်ရ့ၣ် ပၢၤကီၢ်ခိၣ် ၂ သုးခိၣ်ဒိၣ်ဂီၢ်ဂ့ၢ် စီၤမီၣ်ကၠံၣ် ကတိၤဒုးသ့ၣ်ညါဝဲ ကညီဒီကလုၥ်ပၢၤကီၢ်သုး အိၣ်ဖျဲၣ်ထီၣ်အဂ့ၢ်အကျိၤ ဒီးတၢ်စံၣ်စိၤတဲစိၤ တဖၣ်န့ၣ်လီၤ.

လၢန့ၣ်အမဲၥ်ညါ ဖၣ်အၣ်ကီၢ်ရ့ၣ် တီၤထီကၠိ ကၠိဖိမုၣ်ခွါ ဒီးဖၣ်အၣ်ကီၢ်ရ့ၣ် ကညီပိၥ်မုၣ်ကရၢတဖၣ် မၤလၤကပီၤဝဲ ကညီဒီကလုၥ်ပၢၤကီၢ်သုး မုၢ်နံၤပှဲၤထီၣ် (၃၂) ဝီတဝီအံၤ လၢတၢ်သူၣ်ဝံၣ်သးဆၢ သ့ၣ်တဖၣ်န့ၣ်လီၤ. တၢ်မၤလၤကပီၤ တၢ်ရဲၣ်တၢ်ကျဲၤအံၤ ဘၣ်တၢ်ပျၢ်ကွံၥ်အီၤ ခီဖျိတၢ်သးဝံၣ်ထီၣ်ဝဲ ကညီဒီကလုၥ်အတၢ်သးဝံၣ် န့ၣ်လီၤ.