လါစဲးပထ့ဘၢၣ် ၆ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

လီၢ်ခၢၣ်သး ကညီသးစၢ်ကရၢ တီခိၣ်ရိၣ်မဲ ဒီးရဲၣ်ကျဲၤမၤဝဲ သးစၢ်တၢ်ရ့လိၥ်မုၥ်လိၥ် တၢ်ရဲၣ်တၢ်ကျဲၤ ဖဲ ၂၀၂၃ နံၣ် လါစဲးပထ့ဘၢၣ် ၄ သီတုၤ ၅ သီအနံၤ ဖဲကညီ သးစၢ်ကရၢ လီၢ်ခၢၣ်သး န့ၣ်လီၤ.

လၢသးစၢ်တၢ်ရ့လိၥ်မုၥ်လိၥ် တၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ, လီၢ်ခၢၣ်သး ထီဘိကမံးတံၥ် ပဒိၣ်စီၤသမ့ၣ်ထိ, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးရ့ၣ် (၂၄) သုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမိစဲး, ဖၣ်အၣ်ကီၢ်ရ့ၣ် ပၢၤကီၢ်ခိၣ် သုးခိၣ်ဒိၣ်ဂီၢ်ဂ့ၢ် စီၤမီၣ်ကၠံၣ်, ကညီသးစၢ်ကရၢ လီၢ်ခၢၣ်သးခိၣ်နၢ်, ဖၣ်အၣ်ကီၢ်ရ့ၣ် ကညီသးစၢ်ကရၢခိၣ်နၢ်, ကညီတၢ်ဆီၣ်ထွဲမၤစၢၤ သဲစးကရူၢ် ဒီး သိၣ်မှံၤတၢ်ကရၢကရိ သူၣ်ဘီၣ်သးစၢ်တဖၣ် ခဲလၢၥ်ပှၤနီၣ်ဂံၢ် (၆၀) ဘျဲၣ် ပၣ်ဃုၥ်ဝဲဒၣ်လၢ သးစၢ်တၢ်ရ့လိၥ်မုၥ်လိၥ် အတၢ်ရဲၣ်တၢ်ကျဲၤတဘျီအံၤ အပူၤန့ၣ်လီၤ.

သးစၢ်တၢ်ရ့လိၥ်မုၥ်လိၥ် တၢ်ရဲၣ်တၢ်ကျဲၤတဘျီအံၤ အတၢ်ပညိၣ်မ့ၢ်ဒ်သိး သးစၢ်တဖၣ် တၢ်ရ့လိၥ်မုၥ်လိၥ်သး တၢ်ရဲၣ်တၢ်ကျဲၤ ဝံၤအလီၢ်ခံ သးစၢ်လၢတၢ်ကရၢကရိဘၣ်ထွဲတဖၣ်စုၥ်စုၥ် ကထံၣ်လိၥ်အိၣ်သကိးသး ဒီးတၢၣ်ပီၣ်တဲသကိးဝဲ ဘၣ်ထွဲဒီး တၢ်ပၢၢ်ဆၢ အတၢ်လဲၤကျဲဆူညါ, ကရၢတဖုဒီးတဖုအဘၢၣ်စၢၤ, သးစၢ်တဂၤဒီးတဂၤအဘၢၣ်စၢၤ တၢ်ကသူၣ်ထီၣ်တၢ်ရ့လိၥ်မုၥ်လိၥ် ဒီးတၢ်ဆဲးကျိးဆဲးကျၢ အကျိၤအကျဲ, တၢ်ကပၥ်လီၤကျဲသနူ ဒီးတၢ်မၤကျဲတဖၣ် ဒ်လဲၣ်အဂ့ၢ်အကျိၤတဖၣ် တၢ်ကတၢၣ်ပီၣ်တဲသကိးအီၤ အဂီၢ်န့ၣ်လီၤ အဂ့ၢ်န့ၣ် သရၣ်စီၤသဟဲစရံ တဲဖျါထီၣ်ဝဲဒၣ်န့ၣ်လီၤ.

ဒ်န့ၣ်အသိး ကညီသးစၢ်ကရၢ ကရၢခိၣ် ပဒိၣ်စီၤလၢၢ်နၢၢ် (မ့ၢ်စ့ၢ်ကီး ခ့ၣ်အဲၣ်ယူၣ် လီၢ်ခၢၣ်သး ထီဘိကမံးတံၥ်) စံးဝဲဒၣ်လၢ တၢ်ကမၤလီၤမၢ်ကွံၥ် သုးမီၤစိရိၤသနူ, တၢ်ကဒုးအိၣ်ထီၣ် တၢ်တုၤသိးထဲသိး လၢကလုၥ်ဒူၣ်ခဲလၢၥ်အဂီၢ်, ပှၤတ၀ၢ အတၢ်သူၣ်ထီၣ်ဆီလီၤတ့ၢ်သးလီၢ်လံၤတဖၣ်အံၤ တၢ်ကမၤလီၤမၢ်ကွံၥ်အီၤ ဒီးဒုးအိၣ်ထီၣ်တၢ်တုၤသိးထဲသိး လၢပှၤဟီၣ်ခိၣ်ဖိကိးဂၤဒဲးအဂီၢ်, တၢ်ကသူၣ်ထီၣ်ပှၤတ၀ၢ လၢအအိၣ်ပှဲၤဒီး နီၢ်ကစၢ်တၢ်စံၣ်ညီၣ်ပၢလီၤသးခွဲးယၥ် အလၢအပှဲၤအဂီၢ် တၢ်ပၥ်လီၤဝဲ တၢ်ပညိၣ်လၢ အဒ်သိးလိၥ်သးဝံၤ တၢ်ရဲၣ်ကျဲၤမၤဝဲ သးစၢ်တၢ်ရ့လိၥ်မုၥ်လိၥ် တဘျီအံၤန့ၣ်လီၤ.

လၢသးစၢ်တၢ်ရ့လိၥ်မုၥ်လိၥ် တၢ်ရဲၣ်တၢ်ကျဲၤ ၂ သီအံၤအပူၤ သးစၢ်တဖၣ် ဒုးသ့ၣ်ညါလိၥ်သး တဂၤဒီးတဂၤဝံၤ, တၢ်ဒုးသ့ၣ်ညါဝဲ တကီၢ်ခါထံရူၢ်ကီၢ်သဲး အတၢ်အိၣ်သး, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်တဖၣ် ဒုးသ့ၣ်ညါဝဲ သးစၢ်အတၢ်ပၣ်ဃုၥ်ပၣ်ဂီၢ်န့ၣ် အရ့ဒိၣ်ဝဲဒၣ်အဂ့ၢ်အကျိၤ, တၢ်ဟ့ၣ်ခီဟ့ၣ်နီၤဝဲ သးစၢ် ဒီးခိၣ်ဃၢၤန့ဆၢၣ်, တၢ်တၢၣ်ပီၣ်တဲသကိး သးစၢ်တၢ်ကရၢကရိ တဖုစုၥ်စုၥ် အတၢ်ဟူးတၢ်ဂဲၤ တၢ်ဖံးတၢ်မၤတဖၣ်, သးစၢ်တဖၣ် ပၥ်ဖျါထီၣ်အတၢ်ထံၣ် ဘၣ်ထွဲဒီး ကီၢ်ပယီၤပူၤပှၤတ၀ၢတဖၣ် အတၢ်အိၣ်မူအိၣ်ဂဲၤ အတၢ်အိၣ်သး, တၢ်ဟ့ၣ်ခီဟ့ၣ်နီၤဝဲ ကီၢ်သူလ့ၤ သဲစးတၢ်ဘျၢတဖၣ်, သးစၢ်တၢ်ရ့လိၥ်မုၥ်လိၥ် တၢ်လိၥ်ခိၣ်လိၥ်ကွဲ, ပိၥ်မုၣ်ဖျၢၣ်ထူ တၢ်လိၥ်ကွဲ, ပိၥ်ခွါဖျၢၣ်ထူ တၢ်လိၥ်ကွဲ ဒီးတၢ်ဟ့ၣ်ခိၣ်ဖး တၢ်ရဲၣ်တၢ်ကျဲၤတဖၣ် တၢ်မၤအီၤလၢ တၢ်ရဲၣ်တၢ်ကျဲၤဘျီဝဲအံၤ န့ၣ်လီၤ.