တၢ်မၤဝဲ ကညီလုၢ်လၢ်ထူသနူ တၢ်ကံၢ်စုအမူး ဖဲကညီဒီကလုၥ် ဂၢၤသးကရၢ ဝဲၤလီၢ်ခိၣ်သ့ၣ်

လါအီကူး ၃၁ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါအီကူး ၃၁ သီအနံၤန့ၣ် တၢ်ရဲၣ်ကျဲၤမၤဝဲ ကညီလုၢ်လၢ်ထူသနူ တၢ်ကံၢ်စုကွဲကလၤအမူး ဖဲကညီဒီကလုၥ်ဂၢၤသးကရၢ ဝဲၤလီၢ်ခိၣ်သ့ၣ်န့ၣ်လီၤ. တၢ်ရဲၣ်တၢ်ကျဲၤအံၤ ဘၣ်တၢ်စးထီၣ်အီၤဖဲ ဂီၤခီ ၈ နၣ်ရံၣ် ဒီး ပှၤလၢဟံးမူဒါကယၢကယဲမူးန့ၣ် မ့ၢ်ဝဲ သုးခိၣ်ဒိၣ်ဖိ စီၤန့ၢ်ဒိၣ်မူ န့ၣ်လီၤ.

လၢမူးတၢ်ရဲၣ်တၢ်ကျဲၤတဘျီအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးထီဘိကမံးတံၥ် ပဒိၣ်စီၤကျၢၤစ့ (မ့ၢ်ဝဲ ပှၤကတိၤတၢ်ပၢ, ဝံစိၥ်တီဆှၢဒီးတၢ်ဆဲးကျိးကျဲဝဲၤကျိၤခိၣ်), ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ် သုးခိၣ်ဒိၣ်ဖိ စီၤကၠ့ၤဖ့ၤ, ကညီဒီကလုၥ်ဂၢၤသးကရၢ ပှၤပၢၤလီၢ်ဆ့ၣ်နီၤ သုးခိၣ်ကျၢၢ်ဖိ စီၤရှံလ့ၣ် ဒီး ခိၣ်နၢ်အဂၤတဖၣ် လဲၤထီၣ်ဒီး ကတိၤဟ့ၣ်ဂံၢ်ဟ့ၣ်ဘါတၢ်ဖဲ မူးတၢ်ရဲၣ်တၢ်ကျဲၤတဘျီအံၤန့ၣ်လီၤ.

ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးခိၣ်နၢ် ဒီးကညီဒီကလုၥ်ဂၢၤသး ဂၢၤသးဝဲၤလီၢ်ခိၣ်သ့ၣ် ခိၣ်နၢ်တဖၣ် ရ့လိၥ်မုၥ်လိၥ်အသး ခီဖျိတၢ်မၤဝဲ ဖျၢၣ်ထူတၢ်လိၥ်ခိၣ်လိၥ်ကွဲ န့ၣ်လီၤ. ကညီလုၢ်လၢ်ထူသနူ တၢ်ကံၢ်စုကွဲကလၤအမူးတဘျီအံၤ ပှၤဟဲထီၣ်ပၣ်ဃုၥ်ပၣ်ဂီၢ် မၤလၤကပီၤအိၣ်ဝဲ အဂၤ (၅၀၀) ဘျဲၣ်န့ၣ်လီၤ.