လါဒံၣ်စ့ဘၢၣ် ၂၄ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါဒံၣ်စ့ဘၢၣ် ၂၁ တုၤ ၂၂ သီအနံၤန့ၣ် တၢ်မၤဝဲ တၢ်ထံၣ်လိၥ်တၢၣ်ပီၣ်တဲသကိးဒီး ကီၢ်ချၢကညီတ၀ၢခိၣ်နၢ်တဖၣ်, ကီၢ်ချၢကညီတၢ်ကရၢ ကရိခိၣ်နၢ်ခၢၣ်စးတဖၣ် ဒီး ကီၢ်ချၢကညီထံဖိကီၢ်ဖိတဖၣ် ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဝဲၤလီၢ်ခိၣ်သ့ၣ် န့ၣ်လီၤ. တၢ်ထံၣ်လိၥ်တၢၣ်ပီၣ် တဲသကိးအံၤ တၢ်မၤအီၤယံၥ်ဝဲ ၂ သီန့ၣ်လီၤ.

တၢ်ထံၣ်လိၥ်တၢၣ်ပီၣ်တဲသကိးအံၤ တၢ်စးထီၣ်အီၤလၢ တၢ်ဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်အနီၣ်တယၢ်, လၢတၢ်ဟ့ၣ်ထီၣ်တၢ်ယူးယီၣ်ဆူ ကညီဒီက လုၥ်တၢ်ထူၣ်ဖျဲးသုးမုၢ်ဒိၣ် ခိၣ်နၢ်သိၣ်ဒူလၢ အလုၢ်ထီၣ်တ့ၢ်အသးသမူ လၢထံကီၢ်ဒီးကလုၥ်ဂီၢ်တဖၣ် ဖဲန့ၣ်အဆၢကတီၢ် တၢ်အိၣ်ဘှီၣ်ဝဲတစိၢ်ဖိန့ၣ်လီၤ. တၢ်ထံၣ် လိၥ်တၢၣ်ပီၣ်တဲသကိးအပူၤ ကညီဒီကလုၥ်စၢဖှိၣ်ကရၢ လီၢ်ခၢၣ်သး ပၢပြးခိၣ်နၢ်တဖၣ်, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဝဲၤလီၢ်ခိၣ်သ့ၣ်ခိၣ်နၢ်တဖၣ်, ကီၢ်ချၢကညီကလုၥ်ခိၣ်နၢ်တဖၣ်, ကညီပှၤတ၀ၢခိၣ်နၢ်တဖၣ် ဒီး ကညီကမျၢၢ်တဖၣ် ဟဲထီၣ်ဝဲန့ၣ်လီၤ.

"ကညီကလုၥ် လၢအအိၣ်လၢ ထံလီၢ်ကီၢ်ပူၤမ့ၢ်ဂ့ၤ, ကညီကလုၥ် လၢအလဲၤအိၣ်လဲၤဆိးလၢ ထံဂုၤကီၢ်ဂၤမ့ၢ်ဂ့ၤ ဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ပၥ်လီၤဃၥ် ကညီကလုၥ်ဂီၢ် တၢ်ပညိၣ်ကွၢ်စိ ဒီး ကျဲသနူအသိး တၢ်လဲၤအီၤကတုၤထီၣ်အဂီၢ် အလီၢ်အိၣ်လၢ ကဘၣ်ဖီၣ်လိၥ်စု လဲၤသကိးတၢ် ဃူဃူဖိးဖိးန့ၣ် လီၤ. တၢ်ထံၣ်လိၥ်တၢၣ်ပီၣ်တဲသကိးအံၤ အတၢ်ပညိၣ်မ့ၢ်ဒ်သိး ကညီကလုၥ် လၢအလဲၤအိၣ်လဲၤဆိးလၢ ထံဂုၤကီၢ်ဂၤတဖၣ် ကထံၣ်လိၥ်ဘၣ်အသးဒီး လီၢ်ခၢၣ် သးခိၣ်နၢ်, သုးဝဲၤလီၢ်ခိၣ်သ့ၣ်ခိၣ်နၢ် ဒီး ကီၢ်ရ့ၣ်, ကီၢ်ဆၣ်ခိၣ်နၢ်တဖၣ် လၢကဒိးန့ၢ်ဘၣ်ဝဲ တၢ်ဂ့ၢ်တၢ်ကျိၤတၢ်ကစီၣ် လၢအမ့ၢ်အတီ လၢအဘၣ်ထွဲ ခ့ၣ်အဲၣ် ယူၣ်-ကညီဒီကလုၥ်စၢဖှိၣ်ကရၢ တၢ်ဟူးတၢ်ဂဲၤတဖၣ် ဒ်အမ့ၢ် ထံရူၢ်ကီၢ်သဲးဂ့ၢ်ဝီ, သုးဂ့ၢ်ဝီ ဒီး လီၢ်ကဝီၤတၢ်ဒုးကစီၣ်သ့ၣ်တဖၣ်န့ၣ်လီၤ" အဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ စံးဝဲဒၣ်န့ၣ်လီၤ.

တၢ်ထံၣ်လိၥ်တၢၣ်ပီၣ်တဲသကိးတဘျီအံၤ ခ့ၣ်အဲယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ပၢဆှၢတၢ်ကမံးတံၥ် ပဒိၣ်နီၢ်ဒါဒါ, ခ့ၣ်အဲၣ်ယူၣ်-ကညီဒီကလုၥ်စၢ ဖှိၣ်ကရၢ စံၣ်ညီၣ်ကွီၢ်ခိၣ်ကျၢၢ် ပဒိၣ်နီၢ်မၠဲၣ်ဖိ, ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ခိၣ်နၢ်ဒ်အမ့ၢ် သုးခိၣ်ကျၢၢ်ဖိစီၤတၢ်မျၢ်သီ, သုးခိၣ်ကျၢၢ်ဖိ မါဖါလိၣ်ဟ့ တဖၣ် ကတိၤတူၢ်လိၥ်ဝဲ ကညီခိၣ်နၢ်လၢ အဟဲထီၣ်တၢ်ထံၣ်လိၥ်တၢၣ်ပီၣ်တဲသကိး ဖဲတၢ်အိၣ်ဖှိၣ်တဲသကိးဘျီဝဲအံၤန့ၣ်လီၤ.