လါဒံၣ်စ့ဘၢၣ် ၂၂ သီ ၂၀၂၃ နံၣ် ခ့ၣ်အဲၣ်ယူၣ်-လီၢ်ခၢၣ်သး

ခီဖျိလီၢ်ကဝီၤတၢ်ဒုးတၢ်ယၤတဖၣ်အဃိ ကမျၢၢ်ထံဖိကီၢ်ဖိ လၢအဃ့ၢ်တၢ်ဒုး ဒီးဟဲဃ့ၢ်အိၣ်ကဒုလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်, သုးက့ (၇) ဟီၣ်ကဝီၤပူၤတဖၣ်, တၢ်ဆီၣ်ထွဲမၤစၢၤပှၤလီၢ်အိၣ်ကမှံကမံးတံၥ် (CIDKP) လီၢ်ခၢသး ဒီး ဖၣ်အၣ်ကီၢ်ရ့ၣ် ခိၣ်နၢ်ဘၣ်မူဘၣ်ဒါတဖၣ် ပၥ်ဖှိၣ်မၤသ ကိးတၢ် ဒီး ဟ့ၣ်နီၤလီၤဝဲ ဂံၢ်ခီၣ်ထံးတၢ်အီၣ်မိၢ်ပှၢ် ဆူပှၤဃ့ၢ်မှံဟးဖျိးတဖၣ် အအိၣ်န့ၣ်လီၤ.

ခီဖျိတၢ်ဒုးတၢ်ယၤအဃိ ကမျၢၢ်ထံဖိကီၢ်ဖိ လၢဟဲဃ့ၢ်အိၣ်ကဒုလၢ ဖၣ်အၣ်ကီၢ်ရ့ၣ်ပူၤတဖၣ် ဒ်လါဒံၣ်စ့ဘၢၣ်ထီၣ်တ၀ၥ် တၢ်မၤနီၣ်မၤဃါအသိး ဖဲတန့ခၠါကီၢ်ဆၣ် ဟီၣ်ကဝီၤပူၤ အိၣ်ဝဲ (၄၄၈၉) ဂၤ, တၢ်တြဲၢ်ကီၢ်ဆၣ် ဟီၣ်ကဝီၤပူၤ အိၣ်ဝဲ (၂၆၇၉) ဂၤ ဒီး ဒူယီၢ်ကီၢ်ဆၣ် ဟီၣ်ကဝီၤပူၤ အိၣ်ဝဲ (၃၅၂၀) ဂၤအဃိ ထံဖိ ကီၢ်ဖိကမျၢၢ် လၢဟဲဃ့ၢ်အိၣ်ကဒုလၢ ဖၣ်အၣ်ကီၢ်ရ့ၣ် ဟီၣ်ကဝီၤပူၤခဲလၢၥ် အိၣ်ဝဲ (၁၀၆၈၈) ဂၤ အဂ့ၢ်သ့ၣ်ညါဘၣ်န့ၣ်လီၤ.

ခီဖျိကီးကရံးဟီၣ်ကဝီၤ တၢ်ဒုးတၢ်ယၤအဃိ ကမျၢၢ်ထံဖိကီၢ်ဖိ လၢဘၣ်ဃ့ၢ်မှံဟးဖျိးတဖၣ် ကညီတၢ်ဆီၣ်ထွဲမၤစၢၤပှၤလီၢ်အိၣ်ကမှံကမံးတံၥ် (CIDKP) ဒီး ဖၣ်အၣ်ကီၢ်ရ့ၣ် ခိၣ်နၢ်ဘၣ်မူဘၣ်ဒါတဖၣ် လဲၤထံၣ်လိၥ်သးဒီး ပှၤဃ့ၢ်မှံဟးဖျိးတဖၣ်ဝံၤ ကတိၤဟ့ၣ်ဂံၢ်ဟ့ၣ်ဘါ အဝဲသ့ၣ်, တၢ်ဆီၣ်ထွဲမၤစၢၤလၢ အဟဲလၢ ကီၢ်ပူၤကီၢ်ချၢတဖၣ် ဖၣ်အၣ်ကီၢ်ရ့ၣ် ဒီး ကီၢ်ဆၣ်ဘၣ်မူဘၣ်ဒါတဖၣ် တီခိၣ်ရိၣ်မဲ ဒီး ဟ့ၣ်နီၤလီၤဝဲဆူ ပှၤဃ့ၢ်မှံဟးဖျိးတဖၣ်အအိၣ် ဒ်အမ့ၢ် တၢ်အီၣ်တၢ်အီ, တၢ်ပီး တၢ်လီ ဒီး တၢ်လိၣ်အဂုၥ်အဂၤတဖၣ်န့ၣ်လီၤ.

ခီဖျိကီးကရံးဟီၣ်ကဝီၤ တၢ်ဒုးတၢ်ယၤကဲထီၣ်အဃိ ကမျၢၢ်ထံဖိကီၢ်ဖိတဖၣ် ဘၣ်ဃ့ၢ်မှံဟးဖျိး ဒီး လၢအဝဲသ့ၣ်အဂီၢ် တၢ်အီၣ်တၢ်အီ, တၢ်အိၣ်ဆူၣ်အိၣ်ချ့ပီးလီ တဖၣ် လိၣ်ဘၣ်ဝဲဒၣ် တကးဒံးဘၣ် လၢဖိဒံဖိသၣ် အတၢ်ကူၣ်ဘၣ်ကူၣ်သ့အဂီၢ် တၢ်ပီးတၢ်လီတဖၣ်, ပှၤမိၢ်ဒၢ ဒီး ဖိသၣ်ဆံးတဖၣ်အဂီၢ် တၢ်အီၣ်န့ၢ်ဂံၢ်န့ၢ်ဘါ ဒီး တၢ်နူၢ်ထံကမူၣ်တဖၣ် လိၣ်ဝဲဒၣ်န့ၣ်လီၤ.