၂၀၂၄ နံၣ် လါယနူၤအါရံၤ ၆ သီ, ခ့ၣ်အဲၣ်ယူၣ်-လီၢ်ခၢၣ်သး

ဖဲအပူၤကွံၥ် ၂၀၂၃ နံၣ် လါဒံၣ်စ့ဘၢၣ် ၇ သီတုၤ ၂၀ သီအတီၢ်ပူၤန့ၣ် ကညီသးစၢ်ကရၢ မၤဝဲကီၢ်ရ့ၣ်ပတီၢ် တၢ်လိၥ်ကွဲဖျၢၣ်ထူတၢ်ပြၢ တၢ်ဟူးတၢ်ဂဲၤ တခါန့ၣ် လီၤ. တၢ်ပြၢအံၤ ဘၣ်တၢ်မၤအီၤဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဘီလ့ကီၢ်ဆၣ် ဟီၣ်ကဝီၤပူၤ ဒီး ဘၣ်တၢ်တီခိၣ်ရိၣ်မဲအီၤလၢ ဒူသထူၣ် ကီၢ်ရ့ၣ် ကညီသးစၢ်ကရၢ ခိၣ်နၢ်တဖၣ်န့ၣ်လီၤ.

ကီၢ်ရ့ၣ်ပတီၢ် ကညီသးစၢ်ကရၢ တၢ်လိၥ်ကွဲဖျၢၣ်ထူတၢ်ပြၢ အတၢ်ပညိၣ်တဖၣ် မ့ၢ်ဝဲ
(၁) ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဟီၣ်ကဝီၤပူၤ ထံဖိကီၢ်ဖိကမျၢၢ်တဖၣ်, ပၢပြးတဖၣ်, သုးမုၢ်သံၣ်ဘိတဖၣ်, ပတီၢ်ထီပီညါ ဖၠၣ်စိမိၤ ကၠိဖိ တဖၣ် ဒီး တီၤထီကၠိ ကၠိဖိတဖၣ် လၢသးစၢ်သ့ၣ်တဖၣ်အံၤအဘၢၣ်စၢၤ တၢ်ပၥ်ဖှိၣ်မၤသကိးတၢ် ကအါထီၣ် ဒီးတၢ်ဃူတၢ်ဖိး ကအိၣ်အါထီၣ် အဂီၢ်န့ၣ်လီၤ.
(၂) ခီဖျိထံရူၢ်ကီၢ်သဲးတၢ်အိၣ်သးအဃိ သူၣ်ဘီၣ်သးစၢ် လၢဘၣ်ပၥ်တ့ၢ်ကွံၥ်ဟံၣ်ဖိဃီဖိ ဒီး ဃုဖံးဃုမၤ လၢတၢ်ကလုၢ်အီၣ်ဟံၣ်ဖိဃီဖိတဖၣ် ကသ့ၣ်က့ၤဝဲ က လုၥ်ဂ့ၢ်ဝီ ဒီး ဒံၣ်မိၣ်ကရ့ၣ်စံၣ်အခွဲးအယၥ်အဂီၢ် တၢ်လၢအလိၣ်တဖၣ် ဒီး တၢ်သးစၢၢ်စၢလၢ ကလုၥ်ဂ့ၢ်ဝီ တၢ်ဖံးတၢ်မၤကအါထီၣ်ဝဲအဂီၢ်
(၃) သးစၢ်လၢ အနုၥ်လီၤဖျၢၣ်ထူတၢ်ပြၢတဖၣ်အကျါ တၢ်ကဃုထၢဝဲ သးစၢ်လၢ အလိၥ်ကွဲဖျိးစိတဖၣ် ဒီး တၢ်ကဒုးအိၣ်ထီၣ်ဝဲ ကီၢ်ရ့ၣ်ပတီၢ် ကညီသးစၢ်ဖျၢၣ် ထူကရူၢ် တကရူၢ်အဂီၢ် ဒီး
(၄) လၢတၢ်ပြၢတၢ်ရဲၣ်တၢ်ကျဲၤတဘျီအံၤ အကတီၢ် တၢ်ဃုအါထီၣ်စ့ၢ်ကီး စ့ပၥ်ကီၤ ဒ်သိးကညီသးစၢ်တဖၣ် ဒ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ဟံး စုနဲၣ်ကျဲ တၢ်မၤဖျါထီၣ် ထံရူၢ်ကီၢ်သဲးတၢ်ပညိၣ်ကွၢ်စိတဖၣ် ဟူးဂဲၤဖံးမၤကသ့အါထီၣ်လၢ ကီၢ်ရ့ၣ်ပူၤကသ့အဂီၢ်အဂ့ၢ် ဒူသထူၣ်ကီၢ်ရ့ၣ် ကညီသးစၢ်ကရၢခိၣ် စီၤလွါမိနဲၤ စံးဝဲဒၣ်န့ၣ်လီၤ.

တၢ်လိၥ်ကွဲဖျၢၣ်ထူ တၢ်ပြၢတဘျီအံၤ ဖဲလါဒံၣ်စ့ဘၢၣ် ၇ သီအနံၤန့ၣ် တၢ်မၤဝဲ တၢ်အိးထီၣ် အမူးန့ၣ်လီၤ. ဖဲတၢ်အိးထီၣ်မူး တၢ်ရဲၣ်တၢ်ကျဲၤ အဆၢကတီၢ် လီၢ်ခၢၣ်သးခိၣ်နၢ်, ကီၢ်ရ့ၣ်ခိၣ်နၢ်, ကီၢ်ဆၣ်ခိၣ်နၢ် ဒီး ဒူသဝီကရူၢ်ခိနၢ်တဖၣ် ဟဲထီၣ်ဝဲဒၣ်အသိး ကညီသးစၢ်ကရၢ လၢလီၢ်ခၢၣ်သး, ကီၢ်ရ့ၣ်, ကီၢ်ဆၣ် ဒီး ကညီသးစၢ်ဖျၢၣ်ထူကရူၢ်တဖၣ်, ပှၤကမျၢၢ်တဖၣ် ခဲလၢၥ်ဟဲထီၣ်ဝဲဒၣ် (၃၀၀) ဘျဲၣ် န့ၣ်လီၤ.

ဖဲတၢ်လိၥ်ကွဲဖျၢၣ်ထူ တၢ်ပြၢအဆၢကတီၢ် ကညီသးစၢ်ကရၢ ဆါဝဲဒၣ် ဖျၢၣ်ထူကူကၤတဖၣ်, ကညီလုၢ်လၢ်တၢ်ဆဲးတၢ်လၤ လၢအမ့ၢ် ဆ့ကညီတဖၣ် အမဲၥ်ညါ ဆါစ့ၢ်ကီးဝဲ သဘျုၣ်, သဲးသၣ်, မီၥ်ထူ, တၢ်ခုၣ်ထံ, ထံခု လၢကညီသးစၢ်ကရၢ တၢ်မၤအါထီၣ်စ့ပၥ်ကီၤ အဂီၢ်န့ၣ်လီၤ.

လၢတၢ်လိၥ်ကွဲဖျၢၣ်ထူၢ်ပြၢတဘျီအံၤ ဒူသထူၣ်ကီၢ်ရ့ၣ်ပူၤ ဖျၢၣ်ထူကရူၢ် ဒ်အမ့ၢ် ကညီသးစၢ်ကရၢ ဖျၢၣ်ထူကရူၢ်, ကီၢ်ဆၣ် ၅ ဘ့ၣ်အပူၤ ကီၢ်ဆၣ် တဘ့ၣ်စုၥ်စုၥ် ဖျၢၣ်ထူကရူၢ်, D9D ဖျၢၣ်ထူကရူၢ်, DDO ဖျၢၣ်ထူကရူၢ်, ကီၢ်သူလ့ၤခီလံးကၠိ လၢအမ့ၢ် (DJC) ဖျၢၣ်ထူကရူၢ်, ယိၤကျါသဝီ ဖျၢၣ်ထူကရူၢ်, ပနွဲၢ်ကျါသဝီ ဖျၢၣ်ထူကရူၢ်, မ့စီသဝီ ဖျၢၣ်ထူကရူၢ်, (PDF) ဖျၢၣ်ထူကရူၢ်, နိၣ်အီလၢ်သဝီ ဖျၢၣ်ထူကရူၢ်, မဲၢ်သဲခံသဝီ ဖျၢၣ်ထူကရူၢ်, ကၠိဝဲတီၤထီကၠိ ဖျၢၣ်ထူကရူၢ် ခဲလၢၥ် ဖျၢၣ်ထူကရူၢ် ၁၆ ဖု နုၥ်လီၤသတြီၤတၢ်လၢ တၢ်ပြၢတဘျီအံၤန့ၣ်လီၤ. တၢ်ပြၢအံၤ ခိၣ်ဖးတဖၣ် မ့ၢ်ဝဲ ခိၣ်ဖး (၁) စ့ပယီၤ (၁၀) ကလီၢ်, ခိၣ်ဖး (၂) စ့ပယီၤ (၇) ကလီၢ်, ခိၣ်ဖး (၃) စ့ပယီၤ (၄) ကလီၢ် တဖၣ်န့ၣ်လီၤ. တကးဒံးဘၣ် ဖဲတၢ်ပြၢအဆၢကတီၢ် တၢ်မၤအါထီၣ်ဝဲ တၢ်လိၥ်ကွဲ လၢအမ့ၢ် ဖျၢၣ်ဃၤတၢ်လိၥ်ကွဲ တခါန့ၣ်လီၤ. ဖျၢၣ်ဃၤတၢ်လိၥ်ကွဲအဂီၢ် ခိၣ်ဖး (၁) စ့ပယီၤ ၅ ကလီၢ် ဒီး ခိၣ်ဖး (၂) စ့ပယီၤ ၃ ကလီၢ် တဖၣ်န့ၣ်လီၤ.