၂၀၂၄ နံၣ် လါဖ့ၤဘြူၤအါရံၤ ၁၁ သီ, ခ့ၣ်အဲၣ်ယူၣ်-လီၢ်ခၢၣ်သး

တနံၤအံၤ ၂၀၂၄ နံၣ် လါဖ့ၤဘြူၤအါရံၤ ၁၁ သီန့ၣ် မ့ၢ်ဝဲဒၣ် ကညီဒီကလုၥ်မုၢ်နံၤ ပှဲၤထီၣ်ဝဲဒၣ် (၇၆) ဝီတဝီအနံၤအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ်, လူၢ်ပျဲၢ်ကီၢ်ဆၣ်, မီပၢၤခိၣ်သဝီ, နီၣ်ဂံၢ် (၁) ဖၣ်အၣ်ကီၢ်ရ့ၣ် တီၤထီကၠိ ဘျီၣ်ဒိၣ်ပူၤန့ၣ် တၢ်မၤလၤကပီၤဝဲ ကညီဒီကလုၥ်အမုၢ်နံၤ ပှဲၤထီၣ် (၇၆) ဝီတဝီအမူးန့ၣ်လီၤ. လၢတၢ်မၤလၤကပီၤမူးတဘျီအံၤ ပှၤလၢဟံးမူဒါ ဒ်ပှၤကယၢကယဲမူးအသိးန့ၣ် မ့ၢ်ဝဲဒၣ် သရၣ်မုၣ်နီၢ်အဲၣ်ဖီဝါ ဒီး သရၣ်စီၤဝ့ၤယၤမ့သ့ သ့ၣ်တဖၣ်န့ၣ်လီၤ. တုၤမ့ၢ်တၢ်ဆၢကတီၢ်ဘၣ်ဒီး ပှၤခိၣ်ပှၤနၢ်ဒီးတမှံၤတဖၣ် ဟံးန့ၢ်တၢ်လီၢ်ဝံၤအလီၢ်ခံ သုးရ့ၣ် (၂၁) ဝဲၤဒၢးခိၣ် သုးခိၣ်စိ စီၤတိၤတ့ တီခိၣ်ရိၣ်မဲ ဟ့ၣ်တၢ်ကလုၢ် လၢတၢ်ကဟ့ၣ်ထီၣ်တၢ်ယူးယီၣ်ဆူ ကညီဒီကလုၥ်အနီၣ်တယၢ် ဒီး ခိၣ်နၢ်, သိၣ်ဒူ, ကမျၢၢ်ထံဖိကီၢ်ဖိ လၢအဟ့ၣ်လီၤသးသမူလၢ ထံကီၢ်ဒီးကလုၥ်ဂီၢ်တဖၣ် ဖဲန့ၣ်အခါ တၢ်အိၣ်ဘှီၣ်ဝဲဒၣ် 1 မံးနံးန့ၣ်လီၤ.

ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်သဃဲၤ (၂) ပဒိၣ်စီၤလးထိ ကတိၤအိးထီၣ်ဝဲ မူးအတၢ်ရဲၣ်တၢ်ကျဲၤဒီး ပဒိၣ်စီၤလွဲစိ (မုၢ်တြီၢ်ကီၢ်ရ့ၣ်) ဖးဖျါထီၣ်ဝဲ ကညီဒီကလုၥ်မုၢ်နံၤ ကဲထီၣ်အဂ့ၢ်အကျိၤ တၢ်စံၣ်စိၤတဲစိၤတဖၣ်န့ၣ်လီၤ. ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူဝ့ ကတိၤဆၢဂ့ၤဆၢဝါ, ကတိၤဒိၣ်ဝဲ ကညီဒီကလုၥ်မုၢ်နံၤန့ၣ်လီၤ.

သရၣ်မုၣ်နီၢ်ဂ့ၤဂ့ၤ ဖးဖျါထီၣ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးအလံၥ်ဟ့ၣ်ယုၢ် လၢအဟ့ၣ်ယုၢ်ဝဲဖဲ ၇၆ နံၣ်ပှဲၤထီၣ် ကညီဒီကလုၥ်မုၢ်နံၤ မူးအတၢ်ရဲၣ်တၢ်ကျဲၤအဂီၢ်န့ၣ်လီၤ. ဝံၤအလီၢ်ခံ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ခိၣ်နၢ်ဒိၣ်ထီတဖၣ် ဒ်အမ့ၢ် ပဒိၣ်စီၤသမ့ၣ်ထိ (လီၢ်ခၢၣ်သးထီဘိကမံးတံၥ်), ပဒိၣ်နီၢ်စလဲ (တီအူကီၢ်ရ့ၣ်ကညီပိၥ်မုၣ်ကရၢ), သရၣ်စီၤခၣ်ဇီၤဝ့ (ကညီသးစၢ်ကရၢ), ဒီး ပဒိၣ်မါပါသံၤ (ဖၣ်အၣ်ကီၢ်ရ့ၣ် စံၣ်ညီၣ်ကွီၢ်ခိၣ်) တဖၣ် ကတိၤဟ့ၣ်ဂံၢ်ဟ့ၣ်ဘါတၢ်ဖဲ မူးတၢ်ရဲၣ်တၢ်ကျဲၤတဘျီအံၤန့ၣ်လီၤ.

လၢန့ၣ်အမဲၥ်ညါ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် နီၣ်ဂံၢ် (၁) တီၤထီကၠိ ကၠိခိၣ် သရၣ်စီၤအဲၣ်ကျိၣ်စ့ ကတိၤစံးဘျူးက့ၤ ဝဲခိၣ်နၢ်, သိၣ်ဒူ, ကမျၢၢ်လၢဟဲထီၣ်တၢ်မၤလၤကပီၤအမူးတဖၣ်ဝံၤ ဖၣ်အၣ်ကီၢ်ရ့ၣ် ကၠိဖိမုၣ်ခွါတဖၣ်, ပှၤဟဲထီၣ်တၢ်မၤလိဖိတဖၣ်, ကညီတၢ်ဂဲၤကလံၣ်အဖုတဖၣ် မၤလၤကပီၤဝဲ ကညီဒီကလုၥ်မုၢ်နံၤ လၢတၢ်သူၣ်ဝံၣ်သးဆၢ ဒီးတၢ်ဂဲၤကလံၣ်တဖၣ်န့ၣ်လီၤ. တၢ်မၤလၤကပီၤ မူးအတၢ်ရဲၣ်တၢ်ကျဲၤတဘျီအံၤ ပှၤဟဲထီၣ်အိၣ်ဝဲ (၁၅၀) ဘျဲၣ်န့ၣ်လီၤ.