ဝဲၤကျိၤတဖၣ်
တၢ်ပၢဆှၢရဲၣ်ကျဲၤ သ့ၣ်ပှၢ်တၢ်မၤလိ
လါယူၤ၂၂သီ၂၀၁၉နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သးသ့ၣ်ပှၢ်ဝဲၤကျိၤ, ကညီခိၣ်ဃၢၤန့ၣ်ဆၢၣ် ဟူးဂဲၤ ကရၢ ဒီး ပှၤတ ၀ၢကညီကရၢသ့ၣ်တဖၣ် ပၥ်ဖှိၣ်ထီၣ်အသး ဒီး ရဲၣ်ကျဲၤမၤဝဲ တၢ်မၤလိတကတီၢ် ဖဲ တီအူကီၢ်ရ့ၣ်ပူၤ လၢတၢ်လီၢ် ၆ တီၤန့ၣ်လီၤ. တၢ်မၤလိအံၤ အတၢ်ပညိၣ်မ့ၢ်ဒ်သိး တၢ်ကဒုးအိၣ်ထီၣ်, သူၣ်ထီၣ်ဆီလီၤသ့ၣ်ပှၢ်လၢ ဒူသဝီတဖၣ် ဒိးန့ၢ်ပၢဖှိၣ်ဘၣ်ဝဲ ဒီး တၢ်မၤလိအံၤ တၢ်စးထီၣ်မၤအီၤဖဲ လါယူၤ ၁၇သီတုၤ ၂၂ သီ န့ၣ်လီၤ.
လါယူၤ ၁၇ သီအဆၢကတီၢ် တၢ်မၤအီၤဖဲ ပဲၤတီဒ့ သဝီ, ၁၈ သီအဆၢကတီၢ် တၢ်မၤအီၤဖဲ ကစၢၢ်ဒိၣ်ကီၢ်ဆၣ်, ၁၉ သီ အဆၢကတီၢ် တၢ်မၤအီၤဖဲ ရှါစ့ဘိၤ သဝီ, ၂၀ သီ အဆၢကတီၢ် တၢ်မၤအီၤဖဲ မီၤဖးဒဲသဝီ, ၂၁ အဆၢကတီၢ် တၢ်မၤအီၤဖဲ ရွ့ၤညီၤပ့ၤသဝီ ဒီး ၂၂ သီ အနံၤ တၢ်မၤအီၤဖဲ မၠ့ၤသၤကိသဝီ န့ၣ်လီၤ.
ဒ်သိးတၢ်ပၥ်ပနီၣ် ဒူၣ်သဝီသ့ၣ်ပှၢ် ကန့ၢ်အဂီၢ် တၢ်လိၣ်တဖၣ် ဒ်အမ့ၢ် သ့ၣ်ပှၢ်ဟီၣ်ကဝီၤ အလဲၢ်အထီ, သ့ၣ်ပှၢ်ပူၤ တၢ်လၢကဘၣ်အိၣ်တဖၣ်, တၢ်အကျိၤအကျဲတဖၣ်, တၢ်မၤလိၣ်ထီၣ် ဖးထီၣ်အီၤကန့ၢ် အဂီၢ် တၢ်မၤအကျိၤ အကွၥ်တဖၣ် ဘၣ်တၢ်သိၣ်လိတၢၣ်ပီၣ်တဲသကိးအီၤလၢ တၢ်မၤလိအံၤအပူၤ န့ၣ်လီၤ. ပှၤလၢအဟ့ၣ်တၢ်သိၣ် လိတခီမ့ၢ်ဝဲသရၣ်မုၣ်နီၢ်မံလ့လၢအမ့ၢ်က ညီခိၣ်ဃၢၤန့ၢ်ဆၢၣ်ဒီး ပှၤတ၀ၢဟူးဂဲၤကရၢန့ၣ်လီၤ.
ပဒူသဝီ ၄ ဖျၢၣ် လၢအမ့ၢ်ဝဲ ရှါစ့ဘိၤ, ကစၢၢ်ဒိၣ်, ပဲၤတီၤဒ့ ဒီး ထံလိၤသ့ၣ်တဖၣ် ပဒုးအိၣ်ထီၣ် (လီၢ်မုၥ်ဒိၣ်) သ့ၣ်ပှၢ်လၢ ဒူသဝီပၥ်ဖှိၣ်ဘၣ်ဝဲ ၀ံၤဝဲလံန့ၣ်လီၤ. အလဲၢ်အထီအိၣ်ဝဲ ၁၅၀၃၇ အ့ကၢၢ် န့ၣ်လီၤ. ဒ်သိးပကပၥ်ပနီၣ်အီၤအဂီၢ် ပပၥ်ဖျါထီၣ်ဆူကီၢ်ဆၣ်, ဒီး ကီၢ်ဆၣ် ပၥ်ဖျါထီၣ် ဆူကီၢ်ရ့ၣ် ဒီးကီၢ်ရ့ၣ် ကပၥ်ဖျါထီၣ်ဆူ လီၢ်ခၢၣ်သးအဂီၢ် ပစးထီၣ်ဟူးဂဲၤလံန့ၣ်လီၤ. ပဒုးအိၣ်ထီၣ် (လီၢ်မုၥ်ဒိၣ်) သ့ၣ်ပှၢ်တ၀ၢအံၤ မ့ၢ်ဒ်သိးပကကၢၤဃၥ်ဒီး ဒီသဒၢခိၣ်ဃၢၤန့ၢ်ဆၢၣ် ဒီး သ့ၣ်ပှၢ်တဖၣ်အဂီၢ်န့ၣ်လီၤ. ပမ့ၢ်တမၤဒ်န့ၣ်ဘၣ်ဒီး ပှၤလၢအတလူၤပိၥ်မၤထွဲ ဒီး တပၥ်ကဲသ့ၣ်ပှၢ်တဖၣ် ကူၥ်သ့ၣ်ကူၥ်၀ၣ် ဒ်အကစၢ်တၢ်ဘၣ်သးအသိး တကးဘၣ် ဒွဲၣ်အူစ့ၢ်ကီးသ့ၣ်ပှၢ်အိၣ်ဝဲအဃိ တၢ်မ့ၢ်ဆဲးမၤအသးဒ်အံၤယံၥ်ထီၣ်ယံၥ်ထီၣ် ဒီးကကဲထီၣ်တၢ်ဘၣ်ဒိဘၣ်ထံး ပှၤလၢခံတစိၤအဂီၢ်န့ၣ်လီၤ. လၢတၢ်န့ၣ်အဃိပဂုၥ်ကျဲးစၢၤလၢ တၢ်ကပၥ်ပနီၣ်န့ၢ်ပှၤ (လီၢ်မုၥ်ဒိၣ်)သ့ၣ်ပှၢ်တ၀ၢအံၤလီၤအဂ့ၢ်န့ၣ် သရၣ်န့ၤဘးထူတဲဖျါထီၣ်ဝဲဖဲတၢ် မၤတၢ်မၤလိလၢပဲၤတီၤ ဒ့ဒီးရှါစ့ၤဘိၤ သဝီအဆၢကတီၢ်န့ၣ်လီၤ.
သရၣ်အီၤကူး လၢအမ့ၢ် က့ၤဘါ ကညီတ၀ၢအနဲၣ်ရွဲၣ်စံးစ့ၢ်ကီးဝဲလၢ "ကီၢ်ပယီၤပဒိၣ်ပၥ်ပနီၣ်ဝဲ မဲၢ်သဒ့ၤသ့ၣ်ပှၢ် ဟီၣ်ကဝီၤအံၤလံန့ၣ်လီၤ. ဟီၣ်ကဝီၤအံၤအိၣ်ဝဲအအ့ကၢၢ် ၅၀၀၀၀ ဘျဲၣ်န့ၣ်လီၤ. ဟီၣ်ကဝီၤ တဖၣ်ခဲလၢၥ်န့ၣ်မ့ၢ်ဝဲပှၤ ကမျၢၢ် အတၢ်လီၢ်တၢ်ကျဲအဟီၣ်ကဝီၤန့ၣ်လီၤ. လၢတၢ်န့ၣ်အဃိ ပပၥ်ဖျါထီၣ် ဆူဘျီၣ်ဒိၣ်ဒ်သိးပှၤ တပၥ်ပတုၥ်ကွံၥ် တၢ်ပၥ်ပနီၣ်ဝဲန့ၣ်ဘၣ်ဆၣ်တကနၣ်ဝဲဘၣ်. လၢတၢ်န့ၣ်အဃိဟီၣ်ကဝီၤထံဖိကီၢ်ဖိသ့ၣ်တဖၣ် အဂီၢ်ဘၣ်ဃး တၢ်န့ၢ်ပၢဘၣ်ဟီၣ်ခိၣ်ကပံၥ်တၢ်ဘျၢ ကအိၣ်ထီၣ်အဂီၢ်ပဟူးဂဲၤအီၤန့ၣ်လီၤ. လၢတၢ်န့ၣ်အဃိလၢတၢ်မၤလိတက တီၢ်အံၤ ပဝဲခဲလၢၥ် ပကပၥ်ဖှိၣ်ထီၣ်ပသးဟ့ၣ်ထီၣ်ပသကိးပတၢ်ထံၣ် ဒီး ပကဃုသကိးတၢ်အဆၢအဂီၢ်န့ၣ်" အဝဲကတိၤဟ့ၣ်ဂံၢ်ဟ့ၣ်ဘါပှၤမၤလိတၢ် ဖိဖဲတၢ်မၤလိအဆၢကတီၢ်န့ၣ်လီၤ.
လၢတၢ်မၤလိ ၆ သီအတီၢ်ပူၤ, ကီၢ်ရ့ၣ်ခိၣ်, ကီၢ်ရ့ၣ်သ့ၣ်ပှၢ်ဝဲၤကျိၤနဲၣ်ရွဲၣ်, ကီၢ်ရ့ၣ်စံၥ်ပှဲၤ သူၣ်ဖျးဝဲၤကျိၤ နဲၣ်ရွဲၣ်, ကီၢ်ရ့ၣ်ကူၣ်သ့ဆဲးလၤဝဲၤကျိၤခိၣ်သ့ၣ်တဖၣ် ပၥ်ဂုၥ်ပၣ်ဂီၢ်လၢတၢ်မၤလိ အကတီၢ်ဒီးဒ် တၢ် လိၣ်အိၣ်အသိးတဲနၢ်ပၢၢ်ဝဲပှၤထီၣ်တၢ်မၤလိဖိတဖၣ်လၢ အဘၣ်ဃးဒီး ကီၢ်သူလ့ၤဟီၣ်ခိၣ်သပံၥ်သနူတဖၣ်န့ၣ်လီၤ.
တၢ်ဟူးတၢ်ဂဲၤလၢအဘၣ်ထွဲတဖၣ်
