လါအီးကထိဘၢၣ် ၃၁ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် သုးက့ (၇), ဒူယီၢ်ကီၢ်ဆၣ် ဟီၣ်ကဝီၤ ထံလီၤဆူမုၢ်နုၥ်သီခါဖၠၣ်အပူၤန့ၣ် ဖဲ ၂၀၂၃ နံၣ် လါအီးကထိဘၢၣ် ၂၂ သီတုၤ လါနိၣ်ဝ့ဘၢၣ် ၁ သီအနံၤ လၢ ၁၁ သီအတီၢ်ပူၤန့ၣ် (UCKAG) တီခိၣ်ရိၣ်မဲ ဒီးရဲၣ်ကျဲၤမၤဝဲ ဟးဝ့ၤဝီၤဒူသဝီ ဒီးယါဘျါကလီန့ၢ် ကမျၢၢ်လၢ အတူၢ်ဘၣ်မဲၥ်ချံတၢ်ဆါ တၢ်တဘၣ်လီၢ်ဘၣ်ဆးဘၣ် တဖၣ်န့ၣ်လီၤ.

တၢ်ယါဘျါကလီန့ၢ် ကမျၢၢ်မဲၥ်ချံ တၢ်ရဲၣ်တၢ်ကျဲၤတဘျီအံၤ ဖၣ်အၣ်ကီၢ်ရ့ၣ် ကီၢ်ရ့ၣ်နဲၣ်ရွဲၣ်သဃဲၤ ပဒိၣ်စီၤဂ့ၤထူ, တၢ်ကရၢကရိဒီးတၢ်ဘိးဘၣ်ရၤလီၤဝဲၤကျိၤ ဝဲၤကျိၤခိၣ် ပဒိၣ်နီၢ်ဆှံဝါ, သုးက့ (၇) သုးက့ခိၣ် သုးခိၣ်ဒိၣ်စိ စီၤဒံၣ်ကွဲၤထူ ဒီး ဒူယီၢ်ကီၢ်ဆၣ် ပှၤဘၣ်မူဘၣ်ဒါတဖၣ် တီခိၣ်ရိၣ်မဲဝဲဒၣ် ဒီး လၢ (UCKAG) တခီ ဒီၣ်ကထၢၣ်န့ၢ်ဆၢ ဒီး ဆူၣ်ချ့မၤစၢၤဝဲၤကျိၤပှၤဘၣ်မူဘၣ်ဒါတဖၣ် ဟံးမူဒါလၢ တၢ်ယါဘျါတၢ်ရဲၣ်တၢ်ကျဲၤတဖၣ်န့ၣ်လီၤ.

တၢ်ယါဘျါကလီၢ်န့ၢ် ကမျၢၢ်မဲၥ်ချံ တၢ်ရဲၣ်တၢ်ကျဲၤတဘျီအံၤ ကမျၢၢ်လၢအဟဲမၤန့ၢ် မဲၥ်ဒိး အိၣ်ဝဲ (၇၄၈) ဂၤ, ကမျၢၢ်လၢ အဟဲဒိးယါဘျါ (ကွဲးအမဲၥ်ချံ) အိၣ်ဝဲ (၂၂၄) ဂၤ ဒီး ကီၢ်ဆၣ်ပူၤကမျၢၢ်လၢ အတူၢ်ဘၣ် မဲၥ်ချံတၢ်ဆါ တၢ်တဘၣ်လီၢ်ဘၣ်ဆးဘၣ်တဖၣ် ခဲလၢၥ် (၁၁၅၀) ဂၤ ဟဲဒိးယါဘျါအသး လၢတၢ်ရဲၣ်ကျဲၤယါဘျါကလီ တၢ်ရဲၣ်တၢ်ကျဲၤတဘျီအံၤန့ၣ်လီၤ.

လၢအပူၤကွံၥ် ဖဲ ၂၀၂၃ နံၣ် လါယူၤ ၁၄ သီတုၤ ၂၀ သီနံၤဆၢကတီၢ်န့ၣ် တၢ်မၤဝဲ တၢ်ယါဘျါကလီန့ၢ် ကမျၢၢ်မဲၥ်ချံ အတၢ်ရဲၣ်တၢ်ကျဲၤ အဆိကတၢၢ်တဘျီ ဖဲ ဒူယီၢ်ကီၢ်ဆၣ် နီၤသၤယၤသဝီ အဆၢကတီၢ် ကမျၢၢ် (၄၄၁) ဂၤ ဟဲဒိးတၢ်ယါဘျါအသးန့ၣ်လီၤ.