လါအီးကထိဘၢၣ် ၃၀ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

ဖဲ ၂၀၂၃ နံၣ် လါအီးကထိဘၢၣ် ၂၈ သီအနံၤန့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ချၢၣ်လွံၢ်ထူၣ်ကီၢ်ရ့ၣ် သုးက့ (၃) တီခိၣ်ရိၣ်မဲ ဒီးရဲၣ်ကျဲၤမၤဝဲ သုးယဲၤခိၣ်တၢ်မၤလိပျၢ်အမူး အဆိကတၢၢ်တဘျီ ဖဲဒါစုယၤပျီ အပူၤန့ၣ်လီၤ.

လၢတၢ်မၤလိပျၢ်မူး တၢ်ရဲၣ်တၢ်ကျဲၤတဘျီအံၤ သုးက့ (၃) သုးက့ခိၣ် သုးခိၣ်ကျၢၢ်ဖိ စီၤလ့တြီၤ, သုးရ့ၣ်ပှၤဘၣ်မူဘၣ်ဒါ သုးခိၣ်စိ စီၤအါစဲၣ်, သုးခိၣ်ဒိၣ်ဂီၢ်ဂ့ၢ် စီၤဖံထၢၣ်, ချၢၣ်လွံၢ်ထူၣ်ကီၢ်ရ့ၣ် ကီၢ်ရ့ၣ်နဲၣ်ရွဲၣ် ပဒိၣ်စီၤနဲထူပၠဲ, ချၢၣ်လွံၢ်ထူၣ်ကီၢ်ရ့ၣ် ကညီပိၥ်မုၣ်ကရၢနဲၣ်ရွဲၣ် နီၢ်သဘှဲဖီ, ချၢၣ်လွံၢ်ထူၣ်ကီၢ်ရ့ၣ် ကညီသးစၢ်ကရၢနဲၣ်ရွဲၣ် စီၤတၢ်ဒိၣ်ထူ, ကၠိဖိမုၣ်ခွါတဖၣ် ဒီး ဒူသဝီကမျၢၢ်တဖၣ် ဟဲထီၣ်ဝဲမူးအတၢ်ရဲၣ်တၢ်ကျဲၤအံၤန့ၣ်လီၤ. လၢတၢ်မၤလိပျၢ်မူး တၢ်ရဲၣ်တၢ်ကျဲၤတဘျီအံၤ သုးက့ခိၣ် အနီၢ်ကစၢ်ဒၣ်ဝဲ ဟ့ၣ်လီၤဝဲလံၥ်အုၣ်သး လၢပှၤတၢ်မၤလိဖိ လၢအဖျိထီၣ် သုးယဲၤခိၣ်တၢ်မၤလိ တဘျီအံၤန့ၣ်လီၤ.

တၢ်မၤလိတဘျီအံၤန့ၣ် သုးက့ပတီၢ် သုးခိၣ်သုးနၢ်တဖၣ် ဒီးပှၤဘၣ်မူဘၣ်ဒါတဖၣ် တီခိၣ်ရိၣ်မဲ ဒီးဟ့ၣ်လီၤဝဲ သုးယဲၤခိၣ်တၢ်မၤလိအဆိကတၢၢ်တဘျီန့ၣ်လီၤ. တၢ်မၤလိတဘျီအံၤ သရၣ်လၢအသိၣ်လိတၢ် အိၣ်ဝဲ ၅ ဂၤန့ၣ်လီၤ.

သုးယဲၤခိၣ်တၢ်မၤလိတဘျီအံၤ တၢ်စးထီၣ်မၤအီၤဖဲ ၂၀၂၃ နံၣ် လါယူၤလံ တုၤ လါအီးကထိဘၢၣ် န့ၣ်လီၤ. တၢ်မၤလိယံၥ်ဝဲ (၄) လါန့ၣ်လီၤ. တၢ်မၤလိတဘျီအံၤအပူၤ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် သုးက့ (၃) သုးဝဲၤလီၢ်ခိၣ်သ့ၣ်, သုးရ့ၣ် (၇,၈,၉) ဒီး ကညီဒီကလုၥ်ဂၢၤသးကရၢ သုးရ့ၣ် (၃) အပူၤ သုးယဲၤခိၣ်တဖၣ် ဟဲထီၣ်ဝဲဒၣ်တၢ်မၤလိအံၤန့ၣ်လီၤ.

တၢ်မၤလိတဘျီအံၤ အတၢ်ပညိၣ် မ့ၢ်ဒ်သိး သုးယဲၤခိၣ်တဖၣ် ကသ့တီခိၣ်ရိၣ်မဲဝဲ အသုးယဲၤပူၤသုးဖိတဖၣ် တုၤလီၤတီၤလီၤအဂီၢ်န့ၣ်လီၤ. တၢ်မၤလိအပူၤ တၢ်မၤလိဝဲ လၢလံၥ်လဲၢ်အိၣ်အသိး လၢပျီပူၤတၢ်မၤသ့သးတဖၣ်စ့ၢ်ကီး တၢ်မၤလိဃုၥ်စ့ၢ်ကီးန့ၣ်လီၤ.

တၢ်မၤလိအံၤ မ့ၢ်တၢ်မၤလိလၢအနး ဒီးကီခဲဝဲအဃိ ပှၤမၤလိတၢ်ဖိတနီၤ ထီၣ်ဝဲတၢ်မၤလိတကတၢၢ်ဘၣ် ဒီးဟးထီၣ်ကွံၥ်ဝဲလၢ တၢ်ဘၢၣ်စၢၤအိၣ်ဝဲဒၣ်န့ၣ်လီၤ. ပှၤလၢအထီၣ်တၢ်မၤလိ တုၤအကတၢၢ်အိၣ်ဝဲဒၣ် ၂၈ ဂၤဒီး ပှၤ ၂၈ ဂၤအံၤ ဖျိထီၣ်ဝဲတၢ်မၤလိ ဂ့ၤဂ့ၤဘၣ်ဘၣ် ဒီးတၢ်ဟ့ၣ်လီၤအီၤ လံၥ်အုၣ်သးန့ၣ်လီၤ.