Notice

  "From the Karen National Political Dialogue to ward the Political Will of the Karen National" 

  "From the Karen National Political Dialogue to establish a Federal Democratic Union" 

  • English
  • Karen
  • Myanmar

တၢ်ဂ့ၢ်အလၢအပှဲၤ

ကီၢ်ရ့ၣ်တဖၣ်

တၢ်မၤလၤကပီၤဝဲ ကညီဒီကလုၥ် ပၢၤကီၢ်သုးမုၢ်နံၤ ပှဲၤထီၣ် (၃၂) နံၣ် ဖဲဒူပျၥ်ယၥ်ကီၢ်ရ့ၣ်

လါစဲးပထ့ဘၢၣ် ၉ သီ ၂၀၂၃ နံၣ်, ခ့ၣ်အဲၣ်ယူၣ်-လီၢ်ခၢၣ်သး

၂၀၂၃ နံၣ် လါစဲးပထ့ဘၢၣ် ၉ သီအနံၤန့ၣ် မ့ၢ်ဝဲ ကညီဒီကလုၥ်ပၢၤကီၢ်သုးမုၢ်နံၤ ပှဲၤထီၣ် ၃၂ နံၣ်အဃိ ဒူပျၥ်ယၥ်ကီၢ်ရ့ၣ် ကညီဒီကလုၥ်ပၢၤကီၢ်သုး ခိၣ်နၢ်ပှၤဘၣ်မူဘၣ်ဒါတဖၣ် တီခိၣ်ရိၣ်မဲ ဒီးရဲၣ်ကျဲၤမၤလၤကပီၤဝဲ ကညီဒီကလုၥ်ပၢၤကီၢ်သုးမုၢ်နံၤ ပှဲၤထီၣ် (၃၂) နံၣ်အမူး ဖဲဒူပျၥ်ယၥ်ကီၢ်ရ့ၣ် ပၢၤကီၢ်ဝဲၤဒၢး န့ၣ်လီၤ
လၢတၢ်ရဲၣ်တၢ်ကျဲၤတဘျီအံၤ ကီၢ်ရ့ၣ်ခိၣ်နၢ်ပှၤဘၣ်မူဘၣ်ဒါတဖၣ်, ကီၢ်ရ့ၣ်ပတီၢ် ပၢၤကီၢ်ခိၣ်နၢ်ဘၣ်မူဘၣ်ဒါတဖၣ်, ကီၢ်ဆၣ်ပတီၢ် ပၢၤကီၢ်ခိၣ်နၢ်ဘၣ်မူဘၣ်ဒ တဖၣ်, ဝဲၤကျိၤခိၣ်နၢ်တဖၣ် ဒီးတမှံၤတဖၣ် ပၥ်ဖှိၣ်ထီၣ်အသး ဒီးမၤလၤကပီၤသကိးဝဲ ကညီဒီကလုၥ်ပၢၤကီၢ်သုး မုၢ်နံၤန့ၣ်လီၤ.
တချုးလၢ တၢ်ကရၢကရိဒုးအိၣ်ထီၣ် ကညီဒီကလုၥ်ပၢၤကီၢ်သုး-KNPF ဒံးဘၣ်န့ၣ် ဒ်သိး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤပူၤ သဲစးတၢ်ဒိၣ်စိကအိၣ်အဂီၢ် ကညီဒီကလုၥ်ဂၢၤသးကရၢ-KNDO ဘၣ်ဟံးမူဒါဝဲဒၣ်န့ၣ်လီၤ. ဖဲန့ၣ်အဆၢကတီၢ် ကညီဒီကလုၥ်ဂၢၤသးကရၢ သုးမုၢ်သံၣ်ဘိတဖၣ် ဘၣ်ဟံးဃုၥ်စ့ၢ်ကီးမူဒါဒီးသုးဂ့ၢ်ဝီ, တၢ်ဒုးတၢ်ယၤတဖၣ်န့ၣ်လီၤ. ဖဲန့ၣ်အဆၢကတီၢ် ဒ်သိးထံဖိကီၢ်ဖိတဖၣ် အသးသမူ, တၢ်အိၣ်ယၢၤ ဒီးတၢ်အိၣ်မူအတၢ်ဘံၣ်တၢ်ဘၢကအိၣ်အဂီၢ် ကညီဒီကလုၥ်ဂၢၤသးကရၢ ဘၣ်ဟံးမူဒါ တကးဒံးဘၣ် တၢ်မူးတၢ်ရၢ် လၢဟဲအိၣ်ထီၣ်တဖၣ် ဘၣ်ဟံးမူဒါ ရဲၣ်ကျဲၤဘှါရှဲကွံၥ်ဝဲ စ့ၢ်ကီးန့ၣ်လီၤ. ခီဖျိလၢ ကညီဒီကလုၥ်ဂၢၤသးကရၢ အတၢ်ဖံးတၢ်မၤအါ ဒ်အံၤအဃိ အလီၢ်အိၣ်လၢ တၢ်ကဘၣ်ကရၢကရိထီၣ် ကညီဒီကလုၥ်ပၢၤကီၢ်သုး သတးဒီး ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢခီကရဲး (၁၀) ဝီတဝီအပူၤ ဖဲ ၁၉၉၁ နံၣ် လါစဲးပထ့ဘၢၣ် ၉ သီအနံၤန့ၣ် တၢ်ကရၢကရိဒုးအိၣ်ထီၣ် ကညီဒီကလုၥ်ပၢၤကီၢ်သုးန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တီခိၣ်ရိၣ်မဲ ဒီးကရၢကရိဒုးအိၣ်ထီၣ်ဝဲ ကညီဒီကလုၥ်ပၢၤကီၢ်သုးအံၤ မ့ၢ်ဒ်သိး ထံဖိကီၢ်ဖိတဖၣ် အတၢ်ဘံၣ်တၢ်ဘၢ ကအိၣ်အဂီၢ် ဒီး ကအိၣ်မူဘၣ်ဝဲ မုၥ်မုၥ်ခုၣ်ခုၣ်အဂီၢ် တကးဒံးဘၣ် မ့ၢ်ဒ်သိး ကဒီသဒၢ ထံဖိကီၢ်ဖိတဖၣ် အတၢ်ဖိတၢ်လံၤ ဒီးကပူၤဖျဲးလၢ ပှၤအၢပှၤသီသ့ၣ်တဖၣ် အတၢ်မၤဆူးမၤဆါ သ့ၣ်တဖၣ်န့ၣ်လီၤ. ဒ်န့ၣ်အသိး မ့ၢ်ဒ်သိး ကညီကီၢ်စဲၣ်ပူၤ သဲစးတၢ်ဒိၣ်စိ ဒီးပၢပြးတၢ်ဖံးတၢ်မၤတဖၣ် ကလဲၤသးဘၣ်ဂ့ၢ်ဘၣ်ဝီ, လဲၤထီၣ်လဲၤထီ အမဲၥ်ညါ တၢ်မူးတၢ်ရၢ် လၢကဲထီၣ်တဖၣ် တၢ်ကဘှါရှဲအီၤ ဒ်သဲစးတၢ်သိၣ်တၢ်သီ အိၣ်အသိးအဂီၢ်န့ၣ်လီၤ.