ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် ဒီး ကညီဒီကလုၥ်ဂၢၤသးကရၢ အသုးတဖၣ် လဲၤထီၣ်ဒုးမၤန့ၢ်ဝဲ သုးမီၤစိရိၤ အသုးကလၢၤအဂ့ၢ်

၂၀၂၁ နံၣ်, လါစဲးပထ့ဘၢၣ် ၉ သီ, ခ့ၣ်အဲၣ်ယူၣ်-လီၢ်ခၢၣ်သး
ဖဲ ၂၀၂၁ နံၣ် လါစဲးပထ့ဘၢၣ် ၉ သီ ဂီၤခီ ၄ နၣ်ရံၣ် အဆၢကတီၢ်န့ၣ် ခ့ၣ်အဲၣ်ယူၣ်-သုးက့ ၃ တၢ်တီခိၣ်ရိၣ်မဲအဖီလၥ် ကညီဒီကလုၥ်ဂၢၤသးကရၢ သုးရ့ၣ် ၃ ဒီး ခ့ၣ်အဲၣ်ယူၣ်-သုးက့ ၅ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် အသုးတဖၣ် ထီၣ်ဒုးမၤန့ၢ်ဝဲ သုးမီၤစိရိၤအသုးကလၢၤတဖျၢၣ် လၢအမ့ၢ် ကဘီတူၢ် သုးကလၢၤန့ၣ်လီၤ. သုးကလၢၤတဖျၢၣ်အံၤ အိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤ လၢအမ့ၢ် သုးက့ ၃ ဒီး သုးက့ ၅ အဘၢၣ်စၢၤန့ၣ်လီၤ.
တၢ်လဲၤထီၣ်ဟံးန့ၢ် သုးမီၤစိရိၤအသုးကလၢၤဝံၤအလီၢ်ခံ သုးမီၤစိရိၤ သူဝဲကဘီယူၤ ဒီး ဟဲဆှၣ်ကွၢ်တၢ်ဖဲ တၢ်ကဲထီၣ်အသး ဟီၣ်ကဝီၤ လၢအမ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် ယဲၤမုၢ်ပျီဟီၣ်ကဝီၤ တဖၣ်န့ၣ်လီၤ. တၢ်ကဲထီၣ်သးအဖီခိၣ် တၢ်ဘၣ်ဒိဘၣ်ထံး အဂ့ၢ်အကျိၤတခီ ပကပၥ်ဖျါထီၣ် ဆူညါန့ၣ်လီၤ.