လၢ ၂၀ သီအတီၢ်ပူၤ တၢ်ဒုးကဲထီၣ်လၢ ကညီဒီကလုၥ်ဂၢၤသးကရၢ ဂၢၤသးသုးရ့ၣ် ၁ ဒီး သုးမီၤစိရိၤသုးတဖၣ် အဘၢၣ်စၢၤ

၂၀၂၁ နံၣ်, လါစဲးပထ့ဘၢၣ် ၂၀သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုတီၤဖီလၥ် ကညီဒီကလုၥ်ဂၢၤသးကရၢ ဂၢၤသးသုးရ့ၣ် ၁ ဟီၣ်ကဝီၤပူၤ ခီဖျိ မီၤစိရိၤအသုးတဖၣ် ဟူးဂဲၤဝဲ သုးဂ့ၢ်ဝီ တၢ်ဟူးတၢ်ဂဲၤတဖၣ်အဃိ စးထီၣ်လါစဲးပထ့ဘၢၣ် ၁ သီတုၤ ၂၀ သီ, လၢအသီ ၂၀ အကတီၢ်ပူၤ တၢ်ဒုးကဲထီၣ်ဝဲလၢ ဂၢၤသးသုးရ့ၣ် ၁ အသုး ဒီး မီၤစိရိၤသုးအဘၢၣ်စၢၤ အိၣ်ဝဲ ၄၅ ဘျီဒီး သုးမီၤစိရိၤအသုးတကပၤ သံဝဲ ၃၅ ဂၤ ဒီး ဘၣ်ဒိဝဲ ၅၁ ဂၤန့ၣ်လီၤ.
ပယီၤသုးမီၤစိရိၤ အသုးကလၢၤ လၢအအိၣ်ဆီလီၤအသးလၢ ဃိၥ်လိၥ်ကျိကၢၢ်နံၤတနီၤ ခီဖျိလၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး ကညီဒီကလုၥ် ဂၢၤသးကရၢ အသုးတဖၣ် ထီၣ်ဒုးမၤန့ၢ်ကွံၥ်ဝဲအဃိ လၢတၢ်ကဟဲထီၣ်မၤန့ၢ်က့ၤ သုးကလၢၤ လၢအလီၤတဖၣ်အံၤအဂီၢ် ပယီၤသုးမီၤစိရိၤအသုးတဖၣ် ဟူးဂဲၤဝဲ ဒုးယၤဂ့ၢ်ဝီလီၤအဂ့ၢ်န့ၣ် ကညီဒီကလုၥ်ဂၢၤသးကရၢ ဂၢၤသးခိၣ်ကျၢၢ် ၂ သုးခိၣ်ဒိၣ်စိ စီၤဘိၤမံ စံးဝဲဒၣ်န့ၣ်လီၤ.
ဂၢၤသးသုးရ့ၣ် ၁ သုးဖိ ဒီး သုးခိၣ်သုးနၢ်တဖၣ် ကျဲးစၢးဝဲသပှၢ်ပှၢ် လၢတၢ်ဒီသဒၢက့ၤ ကမျၢၢ်လၢအအိၣ်လၢ ဂၢၤသးသုးရ့ၣ် ၁ အဟီၣ်ကဝီၤပူၤတဖၣ် န့ၣ်လီၤ.