လါမ့ၤ ၁၃ သီ ၂၀၂၂ နံၣ်, ဒူသထူၣ်ကီၢ်ရ့ၣ်
သုးမီၤစိရိၤအသုး ဒီး သုးခိးကီၢ်ဆၢ (BGF) လၢအအိၣ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဖၣ်အၣ်ကီၢ်ဆၣ်, မ့ၣ်ထံၤလၤ (ဖယါကိ (BGF) သုးကလၢၤ) တဖၣ် ဖဲလါမ့ၤ ၁၂ သီ အနံၤန့ၣ် ကိးထံၣ်ဝဲ သဝီ ၁၅ ဖျၢၣ် အသဝီသးပှၢ်တဖၣ် ဒီး ဃ့န့ၢ်ဆူၣ်ဝဲ ကျိၣ်စ့လၢ သဝီသးပှၢ်တဖၣ် အအိၣ်န့ၣ်လီၤ.

"ဖဲလါမ့ၤ ၁၂ သီအနံၤန့ၣ် (BGF-၁၀၁၄) အသုး လၢအအိၣ်လၢ မ့ၣ်ထံၤလၤသုးကလၢၤတဖၣ် ကိးထံၣ်ဝဲ သဝီ ၁၅ ဖျၢၣ် အသဝီသးပှၢ်တဖၣ် ဒီး ဃ့န့ၢ်ဆူၣ်ဝဲ သဝီသးပှၢ် လၢကဟ့ၣ်အီၤစ့ (၁၄၃) ကလီၢ် န့ၣ်လီၤ. စ့အံၤ တၢ်ကဘၣ်ဟ့ၣ်အီၤ လၢ ၃ သီအတီၢ်ပူၤန့ၣ်လီၤ. ဃ့စ့ဒီး ဒုးနဲၣ်ဃုၥ်ဒီးကျိဒီး၀ၣ်အဃိ ပှၤတဟ့ၣ်အီၤဘၣ်ဒု တမ့ၢ်ပှၤအိၣ်တဘူၣ်ဘၣ်. ကတီၢ်ခဲအံၤ လၢထံဖိကီၢ်ဖိအဂီၢ် မ့ၢ်စ့ၢ်ကီးတၢ်ဃံးတၢ်စ့ၤ အဆၢကတီၢ်အဃိ ကဲထီၣ်တၢ်ကီတၢ်ခဲလၢ အဝဲသ့ၣ်အဂီၢ်လီၤ" အဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဒူသထူၣ်ကီၢ်ရ့ၣ်, ဖၣ်အၣ်ကီၢ်ဆၣ်, တၢ်ကစီၣ်ဒီးတၢ်ဘိးဘၣ်ရၤလီၤဝဲၤဒ့ ပှၤဘၣ်မူဘၣ်ဒါတဂၤ စံးဝဲဒၣ်န့ၣ်လီၤ.

သဝီလၢဘၣ်ဟ့ၣ်စ့တဖၣ် မ့ၢ်ဝဲ ၀ဲပၠၤကရူၢ်ပူၤ သဝီလၢအမ့ၢ် ဖယါစ့ၤသဝီ (၅) ကလီၢ်, ဝဲပၠၤသဝီ (၂၀) ကလီၢ်, ပ့ၤပ့ၣ်စ့ၣ်သဝီ (၁၂) ကလီၢ်, မ့ၣ်ထံလၤသဝီ (၅) ကလီၢ်, မံၣ်စဲထးခီ ဒီး မံၣ်စဲလၥ်ခီ (၂၀) ကလီၢ်, မံၣ်စဲကစၢၢ်ခီၣ်ထံးသဝီ (၅) ကလီၢ်, တိၣ်ကၠံသဝီ (၁၂) ကလီၢ်, ဖါဘီၤသဝီ (၁၅) ကလီၢ် ဒီး တခိးဘိကရူၢ် သဝီလၢဘၣ်ဟ့ၣ်စ့တဖၣ် မ့ၢ်ဝဲ ၀ဲပၠၤခၠီ၀ၣ်သဝီ (၅) ကလီၢ်, ကၠိၣ်ပ့ၤစ့ၣ်သဝီ (၁၁) ကလီၢ်, မၠဲၤသဝီ (၆) ကလီၢ်, စ့ၣ်ခၠီသဝီ (၅) ကလီၢ်, လဲၣ်ပတါသဝီ (၅) ကလီၢ်, ကိတါကၠံသဝီ (၁၅) ကလီၢ်, မံပိသဝီ (၁၀) ကလီၢ် ခဲလၢၥ် (၁၄၃) ကလီၢ် ဘၣ်ဟ့ၣ်ဝဲ (BGF) လၢအဃ့န့ၢ်ဆူၣ်တၢ်တဖၣ် အဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ် တၢ်ကစီၣ်ဒီးတၢ်ဘိးဘၣ်ရၤလီၤ ဘၣ်မူဘၣ်ဒါတဂၤ စံးဝဲဒၣ်န့ၣ်လီၤ.

ဘၣ်ထွဲဒီးတၢ်ဃ့န့ၢ်ဆူၣ် ကမျၢၢ်ကျိၣ်စ့ဒ်အံၤန့ၣ် ဒူသထူၣ်ကီၢ်ရ့ၣ်, ကီၢ်ရ့ၣ်ခိၣ် ပဒိၣ်စီၤစိမၠ့ၣ် စံးဝဲဒၣ်လၢ "တၢ်ဝဲအံၤ မ့ၢ်တၢ်မၤဘၣ်ဒိ ပှၤဟီၣ်ခိၣ်ဖိခွဲးယၥ်န့ၣ်လီၤ. ဃ့ဆူၣ်ကျိၣ်စ့ ဒီး ဒုးနဲၣ်ဒီးကျိဒီး၀ၣ်န့ၣ် မ့ၢ်တၢ်မၤနၢၤမၤဃၣ် ကမျၢၢ်န့ၣ်လီၤ."

လၢန့ၣ်အမဲၥ်ညါ ဖဲလါမ့ၤ ၅ သီအနံၤန့ၣ် (BGF-၁၀၁၄) ဒီး သုးမီၤစိရိၤအသုး လၢအလဲၤမၤစၢၤအသကိးလၢ လ့က့ၣ်သုးကလၢၤတဖၣ် ဖဲအလဲၤလၢကျဲအဆၢကတီၢ် ဒွဲၣ်အူဝဲ ကမျၢၢ်အကီၣ်ကျိး ခဲလၢၥ် (၁၃) အ့ၣ်ကၢး ဖဲဟၣ်တလဲၣ်ကရူၢ်ပူၤ ကီၣ်ကျိးတဖၣ် အဂ့ၢ် ဖၣ်အၣ်ကီၢ်ဆၣ်, တၢ်ကစီၣ်ဒီးတၢ်ဘိးဘၣ်ရၤလီၤ ဘၣ်မူဘၣ်ဒါတဂၤ စံးအါထီၣ်ဝဲန့ၣ်လီၤ.

သုးခိးကီၢ်ဆၢ (BGF-၁၀၁၄) သုးရ့ၣ်အံၤ ဘၣ်တၢ်တီခိၣ်ရိၣ်မဲအီၤလၢ သုးခိၣ်မီၤခၠ့ၣ် န့ၣ်လီၤ. သုးရ့ၣ်အံၤ ဟူးဂဲၤဝဲဒၣ်ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဖၣ်အၣ်ကီၢ်ဆၣ် ဒီး ဘံလ့ကီၢ်ဆၣ် ဟီၣ်ကဝီၤအပူၤ ဒီး မၤဘၣ်ဒိဝဲ ပှၤဟီၣ်ခိၣ်ဖိခွဲးယၥ် အိၣ်ထီၣ်ဝဲတလီၢ်လီၢ်န့ၣ်လီၤ.