သုးမီၤစိရိၤအသုး ခလရ-၂၀ သုးရ့ၣ်ခိၣ်-၂ နၤဒၣ်အီၣ် တီခိၣ်ရိၣ်မဲ သုးကရူၢ်တဖၣ် ဖီၣ်ဝဲ ရွ့ၣ်ခါမိ သဝီဖိ ဒီဖိပၢ်ခံဂၤ အဂ့ၢ်

၂၀၂၂ နံၣ် လါမ့ၤ ၂၅ သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ် - ကညီဒီကလုၥ်စၢဖှိၣ်ကရၢ, ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ်, ဒလၤစ့ၣ်ကရူၢ်, ရွ့ၣ်ခါသဝီဖိ ဒီဖိပၢ်ခံဂၤ လၢအမ့ၢ် မီၣ်ကၠီၣ်မ့စိ (သးနံၣ် ၄၅) နံၣ် ဒီး အဖိခွါ မီၣ်ထဲၣ်လ့စိ (ကိး) ဖိတီၤယိ (သးနံၣ် ၂၀) နံၣ် တဖၣ် သုးမီၤစိရိၤအသုး ဖီၣ်အဝဲသ့ၣ် ဖဲ ၂၀၂၂ နံၣ်, လါမ့ၤ ၂၃ သီ, ဟါခီ ၄ နၣ်ရံၣ် ဖဲလၢ သုးမီၤစိရိၤအသုး အသုးရ့ၣ်ခိၣ်-၂ နၤဒၣ်အီၣ် အသုးတဖၣ် လဲၤဟ့ၣ်လံၥ်ကွဲမုၥ်လၢ ကၠိကၠံသဝီ အဆၢကတီၢ် ဖီၣ်ဝဲဒၣ်သဝီဖိ ၂ ဂၤအံၤန့ၣ်လီၤ.

သုးမီၤစိရိၤအသုးတဖၣ် စံးဝဲဒၣ်လၢ ပှၤဒီဖိပၢ်ခံဂၤအံၤ မ့ၢ်ပှၤလၢ အစံၣ်လီၤ (PDF) တၢ်မၤလိ ဒီး ခီဖျိ တၢ်ဖီခိၣ်တၢ်နဲၣ်လီၤအဃိ တၢ်ဖီၣ်ဝဲပှၤခံဂၤအံၤလီၤ အဂ့ၢ် ပှၤလၢအဘူးဒီး ပှၤလၢတၢ်ဖီၣ်အီၤတဖၣ် စံးဝဲဒၣ်န့ၣ်လီၤ. ပှၤဒီဖိပၢ်ခံဂၤအံၤ မ့ၢ်ပှၤပတီၢ်မုၢ် ဒီး ဖံးအီၣ်မၤအီၣ်ဒၣ် လၢတနံၤဘၣ်တနံၤ န့ၣ်လီၤ. ဒီး အဝဲသ့ၣ် နုၥ်လီၤမၤလဲအီၣ်ဝဲတၢ်ဖဲ တၢ်ခူၣ်ထူအလီၢ် ဖဲ ခ့ၣ်အဲၣ်ယူၣ်- ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် ဆီထံးကီၢ်ဆၣ် တၢ်ခူၣ်ထူ တၢ်မၤအလီၢ်န့ၣ်လီၤ.
ဒလၣ်စ့ၣ်ကရူၢ်အံၤ သုးမီၤစိရိၤအသုးတဖၣ် ပၥ်ပနီၣ်ဝဲဒၣ် လၢအမ့ၢ် ရွ့ၣ်ကၠ့ၣ်ကီၢ်ဆၣ် ဒီး မ့မ့ၢ်လၢ ခ့ၣ်အဲၣ်ယူၣ်- ကညီဒီကလုၥ်စၢဖှိၣ်ကရၢ တခီ ပၥ်ပနီၣ်ဝဲ လၢအမ့ၢ် လၢၢ်ဒိၣ်ကီၢ်ဆၣ် တၢ်ပၢဟီၣ်ကဝီၤန့ၣ်လီၤ.