ပယီၤသုး ခးလီၤကျိဖးဒိၣ်ဆူ ကမျၢၢ်တၢ်ဖံးအီၣ်မၤအီၣ်အလီၢ် ဒီး တၢ်အိၣ်တၢ်ဆိးလီၢ်ကျဲ

၁၇.၃.၂၀၂၁
ဖဲမဟါတနံၤ လါမးရှး ၁၆ သီ, ၂၀၂၁ နံၣ် အနံၤ ဂီၤ ၁၀း၃၀ ဆၢကတီၢ် ပယီၤသုးကလၢၤ (တပခ) ခမရ (၂၀) အိၣ်ဆီလီၤအသး လူၤသီကီၢ်ဆၣ်, လၢၢ်မုၢ်ပျီကရူၢ်, ထိးမုၢ်ပျဲၢ်မဲသုးကလၢၤတဖၣ် ဒွဲၣ်လဲးမ့ၣ်အူ စးထီၣ် လီယးကၠိ တုၤ ပှၤတလ့ဒ့ တကတီၢ်ဃီ ဖဲ ၁၀း၄၅ ဆၢကတီၢ် တုၤလၢဟါ ၂း၁၃ နၣ်ရံၣ် ဆၢကတီၢ် ပယီၤသုးခးလီၤကျိဖးဒိၣ် ခဲလၢၥ် (၁၅) ဖျၢၣ်န့ၣ်လီၤ. ဖဲ ၁၅ သီ ဟါ ၃း၀၀ နၣ်ရံၣ် ဆၢကတီၢ် ပယီၤသုး စကခ (၄) ခမရ (၇၀၄) အိၣ်ဆီလီၤအသး ထံထီၣ်ပၢၢ် ဟဲလီၤဆူ စံၣ်ဒ့ဟီၣ်ကဝီၤ သိလ့ၣ်ယီၢ်ဖိ (၄) ခိၣ်ဒီး ဖဲ ၁၆ သီ, ဂီၤ ၇း၀၀ ဆၢကတီၢ် သိလ့ၣ်ယီၢ်ဖိ (၄) ခိၣ်အံၤ က့ၤကဒါက့ၤဆူ ထံထီၣ်ပၢၢ်သုးကလၢၤန့ၣ်လီၤ.
ပယီၤသုးတဖၣ် ခးလီၤဝဲကျိဖးဒိၣ်ဆူ ပီၤနွဲၤ (၂) ဖျၢၣ်, ပီၤနွဲၤခံ (၄) ဖျၢၣ်, တရံးပျီ (၂) ဖျၢၣ်, ဒူထီလူၢ် (၇) ဖျၢၣ် လၢအမ့ၢ် ကမျၢၢ်တၢ်ဖံးအီၣ်မၤအီၣ် အလီၢ်န့ၣ်လီၤ. ကမျၢၢ်လၢအတူၢ်ဘၣ်တၢ်တဖၣ် မ့ၢ်ဝဲ လၢၢ်မုၢ်ပျီသဝီ, ဟံၣ်ဒူနီၣ်ဂံၢ်ခဲလၢၥ် (၅၆) ဖျၢၣ် ပှၤနီၣ်ဂံၢ်ခဲလၢၥ် (၄၇၀) ဂၤ ဒီး ဟံၣ်ဂိၤလိၥ်ဒၢသဝီ ဟံၣ်ဒူၣ်နီၣ်ဂံၢ် (၂၅) ဖျၢၣ် ပှၤနီၣ်ဂံၢ်ခဲလၢၥ် (၂၈၀) ဂၤန့ၣ်လီၤ.
ပသ့ၣ်ညါဘၣ် ဖဲ လါမးရှး ၁၅ သီ, ၂၀၂၁ နံၣ် အနံၤဂီၤ ၇း၀၀ ဆၢကတီၢ် ပယီၤသုးကလၢၤ (တပခ) ခမရ (၂၀) အိၣ်ဆီလီၤအသး ထိးမုၢ်ပျဲၢ်မဲ ခးလီၤကျိဖးဒိၣ် (၁) ဖျၢၣ် ဆူ ကမျၢၢ်တၢ်ဖံးအီၣ်မၤအီၣ်အလီၢ် န့ၣ်လီၤ. မၤကဒီးဖဲ ၁၂း၄၀ ဆၢကတီၢ် ပယီၤသုးကလၢၤ လၢအမ့ၢ် (တပခ) ခမရ (၄၄၀) အိၣ်ကၠူၣ်လူၢ် ဒီး မီၤဖူ တဖၣ် ခးလီၤကျိဖးဒိၣ် (၅) ဖျၢၣ် ဆူသ့ၣ်သါမုၢ်ဒၢ ဟီၣ်ကဝီၤန့ၣ်လီၤ. တကတီၢ်ဃီ ဖဲဟါခီ ၁း၀၀ နၣ်ရံၣ် ဆၢကတီၢ် ပယီၤသုး (တပခ) ခမရ (၂၆၄) အိၣ် ဒၢကၠူၣ်ဒ့ ခးလီၤကျိဖးဒိၣ် (၅) ဖျၢၣ်ဆူ ဒၢကၠူၣ်ဟီၣ်ကဝီၤ ကမျၢၢ်တၢ်ဖံးအီၣ်မၤအီၣ်အလီၢ်န့ၣ်လီၤ. တနံၤဃီ ဖဲဟါခီ ၄း၄၅ မံးနံး ဆၢကတီၢ် ပယီၤသုးကလၢၤ (တပခ) ခမရ (၂၀) အိၣ်ဆီလီၤအသး ၀ၣ်ကျ့ၣ်တူၢ် ဟဲထီၣ်တုၤ ဒူထီကၠိ ခးလီၤကျိဖးဒိၣ် (၂) ဖျၢၣ်ဆူ ကမျၢၢ်တၢ်ဖံးအီၣ်မၤအီၣ်အလီၢ် ဒီး တကတီၢ်ဃီ အသကိးအိၣ် ထိးမုၢ်ပျဲၢ်မဲ သုးကလၢၤတဖၣ် ခးလီၤကဒီးကျိဖးဒိၣ် (၁) ဖျၢၣ်ဆူ ကမျၢၢ်တၢ်ဖံးအီၣ်မၤအီၣ်အလီၢ် ဖဲလၢၢ်မုၢ်ပျီ ဟီၣ်ကဝီၤပူၤန့ၣ် ပသ့ၣ်ညါဘၣ်အီၤန့ၣ်လီၤ.
ဒ်န့ၣ်အသိး ပယီၤသုးခးလီၤကျိဖးဒိၣ်အံၤ ပသံကွၢ်စ့ၢ်ကီး လီၢ်ကဝီၤဖိ လၢအမ့ၢ် နီၣ်အဲၣ်ပြံဝါ စံးဝဲ "ခီဖျိလၢ ပယီၤသုးခးလီၤကျိဖးဒိၣ် ဒ်သိးအံၤအဃိ ပဘၣ်အိၣ်လၢ တၢ်ပျံၤတၢ်ဖုး အလီၢ်ထီဘိ တကးဒံးဘၣ် ပမံအဆၢကတီၢ်ဒၣ်လဲၣ် ပဘၣ်အိၣ်လၢ တၢ်ပလီၢ်သးထီဘိန့ၣ်လီၤ."