လၢၢ်ဒိၣ်ကီၢ်ဆၣ် ဟီၣ်ကဝီၤ သုးမီၤစိရိၤ အသုး ဒီး ပၢၤကီၢ်တဖၣ် လူၤဖီၣ်ဝဲ ကမျၢၢ်လၢ အပၥ်ဖျါထီၣ်အသးတဖၣ်, ခးပိၢ်ကျိ မၤပျံၤမၤဖုး ကမျၢၢ်တဖၣ် ဒီး ဖီၣ်န့ၢ်ဝဲသးစၢ် ၃ ဂၤ, စလဲသဝီကမျၢၢ်တဖၣ် ခဲလၢၥ်ဘၣ်ပၥ်တ့ၢ်လီၢ်ကျဲ ဒီး ဃ့ၢ်အိၣ်ခူသူၣ်

လါမးရှး ၂၇ သီ, ၂၀၂၁ နံၣ်, သူလ့ၤတၢ်ကစီၣ်
တနံၤအံၤ မ့ၢ်ဝဲကီၢ်ပယီၤ သုးမုၢ်ဒိၣ်မုၢ်နံၤအဃိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်, လၢၢ်ဒိၣ်ကီၢ်ဆၣ် ဟီၣ်ကဝီၤ ထံဖိကီၢ်ဖိကမျၢၢ်တဖၣ် ပၥ်ဖှိၣ်ထီၣ်အသးဒီး မၤဝဲတၢ်ပၥ်ဖျါထီၣ်သး ထီဒါ သုးမီၤစိရိၤ လၢအဟံးဆူၣ် ထံကီၢ်တၢ်စိတၢ်ကမီၤန့ၣ်လီၤ. ဘၣ်ဆၣ် သုးမီၤစိရိၤသုး ဒီး ပၢၤကီၢ်တဖၣ် ခးပိၢ်ကျိ မၤပျံၤမၤဖုး ကမျၢၢ်တဖၣ် ဒီး လူၤပီၣ်ဝဲကမျၢၢ်တဖၣ်အဃိ ကမျၢၢ်တဖၣ် လီၤပြံလီၤပြါကွံၥ်ဝဲဒၣ်န့ၣ်လီၤ.
ခီဖျိလၢ သုးမီၤစိရိၤအသုး ဒီး ပၢၤကီၢ်တဖၣ် လူၤဖီၣ်ဝဲ ကမျၢၢ်တဖၣ်အဃိ လၢၢ်ဒိၣ်ကီၢ်ဆၣ်, မ့ၣ်တၤကဝီၤဒ့အပူၤ သးစၢ် ၃ ဂၤ ဘၣ်တၢ်ဖီၣ်န့ၢ်အီၤ ဒီး က့ၤကိးအဝဲသ့ၣ်န့ၣ် ပသ့ၣ်ညါဘၣ်န့ၣ်လီၤ.
ဒ်န့ၣ်အသိး ခီဖျိသုးမီၤစိရိၤအသုး ဒီး ပၢၤကီၢ်သုးတဖၣ် ခးပျံၤခးဖုး ကမျၢၢ်အဃိ ခ့ၣ်အဲၣ်ယူၣ်-လၢၢ်ဒိၣ်ကီၢ်ဆၣ်, စလဲသဝီကမျၢၢ်တဖၣ် ဘၣ်ပၥ်တ့ၢ်လီၢ်ကျဲ ဒီး ဃ့ၢ်အိၣ်ခူသူၣ်လၢ ပှၢ်လၥ်ကျါ န့ၣ်လီၤ.
သးစၢ်လၢ တၢ်ဖီၣ်န့ၢ်အီၤ (၃) ဂၤအမံၤဒီး ကမျၢၢ်လၢအဘၣ်ဃ့ၢ်မှံဟးဖျိးတဖၣ် အနီၣ်ဂံၢ်နီၣ်ဒွးန့ၣ် ပမၤလီၤတံၢ်တန့ၢ်ဒံးဘၣ်န့ၣ်လီၤ.