တၢ်ကစီၣ်တဖၣ်
သုးမီၤစိရိၤ လၢဟံးန့ၢ်ဆူၣ် တၢ်စိတၢ်ကမီၤအသုးတဖၣ် ဟဲထီၣ်ခးဝဲ သုးရ့ၣ်နီၢ်ဂံၢ် (၉) မြေနီကုန်း သုးကလၢၤ
၂၉ လါမးရှး ၂၀၂၁ နံၣ် သူလ့ၤတၢ်ကစီၣ်
၂၀၂၁ နံၣ် လါမးရှး ၂၇ သီအနံၤ သုးမီၤစိရိၤလၢအိၣ်ဖဲ ကျေၥ်က်ကြီးမြို့နယ် ဆင်မတေၥင်သုးကလၢၤတဖၣ် ဟဲထီၣ်ခးဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လၢၢ်ဒိၣ်ကီၢ်ဆၣ် သုးရ့ၣ် (၉) တၢ်မဲၥ်ညါသုးကလၢၤ လၢအမ့ၢ်ဝဲ မြေနီကုန်းသုးကလၢၤန့ၣ်လီၤ. ဟဲထီၣ်ခးဝဲ တၢ်ဆၢကတီၢ် ဖဲဂီၤခီ ၈း၃၀ နၣ်ရံၣ် အဆၢကတီၢ်န့ၣ်လီၤ. သုးမီၤစိရိၤအသုးလၢ အိၣ်လၢ ဆင်မတေၥင်သုးကလၢၤသ့ၣ်တဖၣ် ခးစိန့ၣ်ဝဲ ကျိဖးဒိၣ်လၢ အသုးလၢဟဲထီၣ်ခးဝဲ မြေနီကုန်းတဖၣ် အဂီၢ်န့ၣ်လီၤ. တၢ်ဒုးကယံၥ် (၃ နၣ်ရံၣ်) ဃၣ်ဃၣ် ဒီး ခီဖျိလၢ သုးမီၤစိရိၤအသုးသ့ၣ်တဖၣ် တၢ်ဘၣ်ဒိဘၣ်ထံး အိၣ်အါအဃိ အဝဲသ့ၣ်တဖၣ် ဂုၤက့ၤအခံ ဒီး ဟဲက့ၤအိၣ်ခိးတၢ်ဖဲ စးလဲသဝီ (သရံၣ်ဒီးဖဲ) တၢ်ဆါဟံၣ် န့ၣ်လီၤ. ၂၇ သီနံၤမုၢ်နၤခီ အဆၢကတီၢ် ဟဲထီၣ်ခးကဒီးဝဲ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် မြေနီကုန်းစခန်း ဘၣ်ဆၣ် ထီၣ်ဝဲတန့ၣ်ဘၣ် အဝဲသ့ၣ်တဖၣ် တဂုၤအခံဘၣ် အိၣ်ခိးတၢ်ဖဲ မြေနီကုန်း ကပၤဘၣ်ဆၣ် ဟဲနုၥ်လီၤဝဲလၢ ပသုးကလၢၤပူၤ တဘူၣ်ဘၣ် န့ၣ်လီၤ. ၂၈ သီအနံၤ သုးမီၤစိရိၤအသုးသ့ၣ်တဖၣ် အိၣ်ခိးတၢ်ဖဲန့ၣ် ဒီတနံၤန့ၣ်လီၤ. ဖဲ ၂၉ သီအနံၤ ဂီၤခီ ၁၀း၂၀ နၣ်ရံၣ် အဆၢကတီၢ် ထီၣ်ခးကဒီးဝဲ မြေနီကုန်းစခန်း ဒီး ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် သုးဖိသ့ၣ်တဖၣ် ခီၣ်ဆၢခးဝဲလၢ တၢ်သူၣ်ဒူသးဒူအပူၤအဃိ သုးမီၤစိရိၤအသုးသ့ၣ်တဖၣ် တၢ်ဘၣ်ဒိဘၣ်ထံးအါ တၢ်သံတၢ်ပှၢ်စ့ၢ်ကီး အိၣ်ဝဲအဃိ အဝဲသ့ၣ်တဖၣ် ဂုၤလီၤက့ၤအသးန့ၣ်လီၤ. သုးမီၤစိရိၤ အတၢ်ထီၣ်ခးဝဲ သုးရ့ၣ် (၉) မြေနီကုန်းစခန်း တဘျီအံၤ ထီၣ်ဝဲတန့ၣ်ဘၣ်န့ၣ်လီၤ. ပသ့ၣ်ညါဘၣ်လၢ သုးမီၤစိရိၤအသုး သုးရ့ၣ်ခိၣ်ပတီၢ်တဂၤ သံဝဲဒီး အပှၤသုးဖိစ့ၢ်ကီး သံဒီးဘၣ်ဒိအိၣ်ဝဲ အါမးန့ၣ်လီၤ. သုးမီၤစိရိၤအသုးတဖၣ် ဂုၤလီၤက့ၤအလီၢ်ခံဝံၤ မၣ်လိၥ်ဝဲသုးအသိလ့ၣ် လၢအမ့ၢ် (FAW) အကလုၥ် ဒီး ဟဲဟံက့ၤဝဲအပှၤလၢ သံဒီးဘၣ်ဒိ သ့ၣ်တဖၣ်န့ၣ်လီၤ.
သုးမီၤစိရိၤ အသုးတဖၣ် ဟးလူၤဖီၣ်ဝဲ ပှၤဝံတၢ်ဖိလၢ သဝီ ၀ဲးလၣ်ဒီ အပူၤဒီး တဲဝဲလၢ ကထီၣ်ဒုးဝဲ ချၢၣ်လွံၢ်ထူၣ်ကီၢ်ရ့ၣ် သုးက့ (၃) တဲၥ်တဲၥ်ဖျုဖျု န့ၣ်လီၤ. တနံၤအံၤ သုးမီၤစိရိၤ အကဘီယူၤ ဒုးသုး ဟးထီၣ်ဝဲလၢ တီအူ သုးမီၤစိရိၤ အသုးကလၢၤ ဒီး ဟဲခီဖျိဝဲ ကညီဒီကလုၥ်-စၢဖှိၣ်ကရၢ မူကီၢ်ဆၣ် ဒီး လဲၤထီၣ်ဝဲဆူ သုးက့ (၅) တကပၤ တနီၤဟးဆှၣ်တၢ်လၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ချၢၣ်လွံၢ်ထူၣ် အဟီၣ်ကဝီၤပူၤ သဝီဒ်အမ့ၢ် တကီၤဒၢ, ဃဲဒၢ, ဖှးဂီၤ တၢ်လီၢ်သ့ၣ်တဖၣ်န့ၣ်လီၤ. သုးမီၤစိရိၤ အသုးကဘီယူၤ လဲၤဆှၣ်စ့ၢ်ကီးဝဲ တၢ်လၢမဲၤဝ့ၤဟီၣ်ကဝီၤပူၤန့ၣ်လီၤ. သုးမီၤစိရိၤ အကဘီယူၤလၢ ဟးထီၣ်တနံၤညါအံၤ ခဲလၢၥ်အိၣ်ဝဲ (၇) ဘ့ၣ်န့ၣ်လီၤ.
ပူၤကွံၥ်တယံၥ်ဒံးဘၣ်
