တၢ်ဘၣ်သဂၢၢ် ခးလိၥ်သး အိၣ်ထီၣ်ဝဲလၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး ပယီၤသုးအဘၢၣ်စၢၤ

လါမ့ၤ  ၂၅  သီ,  ၂၀၂၁, သူလ့ၤတၢ်ကစီၣ်
ဖဲလါမ့ၤ  ၂၂  သီ,  ၂၀၂၁ နံၣ် အနံၤဂီၤခီ ၁၁း၄၅ မံးနံးအဆၢကတီၢ်
 ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် လၢအမ့ၢ် သုးက့ ၅ ဒီး သုးက့ ၃ တဖၣ်ပၥ်ဖှိၣ်ထီၣ်သးဒီး ဘၣ်သဂၢၢ်ခးဝဲပယီၤသုးလၢ အဟဲထီၣ်ဖဲဃဲဒၢကရူၢ်, လၢၢ်ပူၤထၣ်, ၀ၣ်မံၤလူၢ် ဟီၣ်ကဝီၤတဘျီဒီး ပယီၤသုး တကပၤသံဝဲ ၃ ဂၤ” ဘၣ်ဒိ ၆ ဂၤ ဒီး လၢကညီဒီကလုၥ် တၢ်ထူၣ်ဖျဲးသုးမုၢ်ဒိၣ် တကပၤ တၢ်ဘၣ်ဒိဘၣ်ထံးတအိၣ်ဘၣ် ဒီး မၤန့ၢ်ဝဲ ပယီၤသုးအစုကဝဲၤ ဒ်အမ့ၢ် (MA-1) တခိၣ် ဒီး (MA-2) တခိၣ်န့ၣ်လီၤ.
မၤကဒီးဖဲ ၂၄  သီ, ၂၀၂၁ နံၣ်အနံၤ ဂီၤခီ ၁၁း၃၆ မံးနံးအဆၢကတီၢ် ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဒီး ပယီၤ သုးအဘၢၣ်စၢၤ ဘၣ်သဂၢၢ်ခးလိၥ်သး ကဲထီၣ်ကဒီးဖဲ ဘုသိၣ်ကီၢ်ဆၣ် ပၣ်ဟဲးကရူၢ်, ကိၤဘီဒၢ ဟီၣ်ကဝီၤတဘျီ ဒီး ပယီၤသုးဘၣ်ဒိဝဲဒၣ် ၃ ဂၤအဂ့ၢ်န့ၣ် လီၢ်ကဝီၤတၢ်ကစီၣ် ဂံၢ်ခီၣ်ထံး စံးဝဲဒၣ်န့ၣ်လီၤ.
တၢ်ကဲထီၣ်ကဒီးအသးဖဲ ဟါခီ ၆း၃၀ မံးနံးအဆၢကတီၢ် ပယီၤသုးအိၣ်ဖၣ်ပူၣ် လၢအမ့ၢ် (၁၉) ဒီး (၃၄၀) အပှၤတဖၣ် ခးလီၤကျိဒိၣ် ၇ ဖျၢၣ် ဆူမုၢ်နုၥ် ဃိၣ်ကပီၤ ဒွဲၣ်လိပျိၢ်တကပၤ လၢအမ့ၢ် ကမျၢၢ်အကီၣ်ကျီးပူၤ, ပိၢ်ဝဲ ၆ ဖျၢၣ်ဒီး တပိၢ် ဘၣ်တဖျၢၣ်န့ၣ်လီၤ.
ဒ်န့ၣ်အသိး ဖဲတနံၤဃီအတီၢ်ပူၤ ပယီၤသုးဆှၢထီၣ်တၢ်အီၣ်လၢ ဂုၢ်ဘံထွံၣ် သုးက့ (၁) ဟီၣ်ကဝီၤပူၤ ဟဲထီၣ်သိလ့ၣ် ၁၃ ခိၣ် ဆူကမးမိၢ် ဒီး သိလ့ၣ်တီသုးတခိၣ်, တီတၢ်အီၣ် (၁၂) ခိၣ် ဒီး သိလ့ၣ်သ့ၣ်တဖၣ်ဒ်အမ့ၢ် (၆) ပၣ်သိလ့ၣ် (၁၀) ခိၣ် ဒီး (၁၀) ပၣ်သိလ့ၣ် (၃) ခိၣ်န့ၣ်လီၤ.
ပသ့ၣ်ညါဘၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီး ပယီၤသုးအဘၢၣ်စၢၤ တၢ်ဒုးကဲထီၣ်ဝဲဒၣ် ကိးမုၢ်နံၤဒဲးန့ၣ်လီၤ. တကးဒံးဘၣ် ပယီၤသုးအတၢ်ဟူးတၢ်ဂဲၤ လၢအခးလီၤနါစိၤကျိ ဒ်သိးအံၤစ့ၢ်ကီးန့ၣ် ကဲထီၣ်အသးခဲအံၤခဲအံၤ, တပတုၥ်ကွံၥ်အသးဒံးဘၣ် ဒီး ကဆဲးကဲထီၣ်အသးအိၣ်ဒံးဝဲဒၣ်န့ၣ်လီၤ.