ခီဖျိလၢ သုးမီၤစိရိၤအသုးသ့ၣ်တဖၣ် ဟူးဂဲၤအါထီၣ်ဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤလၢ ကီၢ်သူလ့ၤဟီၣ်ကဝီၤပူၤအဃိ တၢ်ခးလိၥ်သး ကဲထီၣ်ဝဲလၢ ကီၢ်သူလ့ၤသုးမုၢ်ဒိၣ် ဒီး သုးမီၤစိရိၤအဘၢၣ်စၢၤ ခဲအံၤခဲအံၤ ဒီး ကမျၢၢ်လၢဘၣ်ဃ့ၢ်မှံဟးဖျိး လၢတၢ်ဒုးတၢ်ယၤအဃိ အိၣ်ထီၣ်ဝဲ (၇၂၀၀၀) ဂၤဃၣ်ဃၣ်

လါယူၤလံ ၃၀ သီ, ၂၀၂၁ နံၣ်, သူလ့ၤတၢ်ကစီၣ်
တကီၢ်ခါ တၢ်အိၣ်သးခဲအံၤ သုးမီၤစိရိၤအသုးသ့ၣ်တဖၣ် ဒီး သုးခိးကီၢ်ဆၢ (BGF) တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤလၢ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ် ကဝီၤပူၤအဃိ တၢ်ခးလိၥ်သး ကဲထီၣ်ဝဲဒၣ်လၢ ကညီတၢ်ထူၣ်ဖျဲး သုးမုၢ်ဒိၣ် ဒီး သုးမီၤစိရိၤအဘၢၣ်စၢၤ ခဲအံၤခဲအံၤန့ၣ်လီၤ.
တကးဒံးဘၣ် သုးမီၤစိရိၤအသုးသ့ၣ်တဖၣ် ခးလီၤကျိဖးဒိၣ်လၢ ဒူသဝီပူၤ, ကမျၢၢ်အတၢ်ဖံးအီၣ်မၤအီၣ်အလီၢ်အဃိ ကမျၢၢ်လၢ အတၢ်ကမၣ်တအိၣ်ဘၣ်တဖၣ် ဘၣ်သံဘၣ်ပှၢ်ဝဲ, ဘၣ်ဒိဘၣ်ထံးဝဲ အါမးဒီး ကမျၢၢ်အဟံၣ်အဃီ အတၢ်ဖံးအီၣ်မၤအီၣ် အလီၢ်အကျဲ သ့ၣ်တဖၣ် ဟးဂုၥ်ဟးဂီၤဝဲ, ကမျၢၢ်သ့ၣ်တဖၣ် ဘၣ်ဃ့ၢ်မှံဟးဖျိးဝဲဒၣ် ဒီး ဘၣ်ကွၢ်ဆၢၣ်မဲၥ်ဝဲ တၢ်ကီတၢ်ခဲ အါကလုၥ်အါမံၤန့ၣ်လီၤ.
တကီၢ်ခါ တၢ်အိၣ်သးခဲအံၤ ကမျၢၢ်ဖိလၢ အဃ့ၢ်မှံဟးဖျိးသ့ၣ်တဖၣ် ခဲလၢၥ်အိၣ်ဝဲ (၇၇၀၀၀) ဘျဲၣ်လံန့ၣ်လီၤ. ကမျၢၢ်လၢ ဘၣ်ဃ့ၢ်မှံဟးဖျိးသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ဂ့ၢ်ကီ အကလုၥ်ကလုၥ် ဒ်အမ့ၢ် တၢ်အီၣ်တၢ်အီ, ဒီး တၢ်အိၣ်ဆူၣ်အိၣ်ချ့ သ့ၣ်တဖၣ်န့ၣ်လီၤ.
ခီဖျိလၢ သုးမီၤစိရိၤ ဆှၢအါထီၣ်အသုးသ့ၣ်တဖၣ် လၢကီၢ်သူလ့ၤဟီၣ်ကဝီၤပူၤ ဒီး ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး ဟီၣ်ကဝီၤတၢ်ဒိၣ်စိအဃိ ကၠိသ့ၣ်တဖၣ် ဘၣ်ပတုၥ်ကွံၥ်အသး ဒီး ဖိဒံဖိသၣ် သူၣ်ဘီၣ်သးစၢ်တဖၣ် အတၢ်ခွဲးတၢ်ယၥ်လၢ ကမၤလိဘၣ်တၢ်န့ၣ် လီၤမၢ်ကွံၥ်ဝဲဒၣ်န့ၣ်လီၤ.
ကမျၢၢ်လၢ ဘၣ်ဃ့ၢ်မှံဟးဖျိးလၢ တၢ်ဒုးတၢ်ယၤအဃိသ့ၣ်တဖၣ် အါဒၣ်တၢ်တက့ၢ် မ့ၢ်ဝဲ ပှၤဖဲးအီၣ်ခုးသ့ၣ်တဖၣ်အဃိ တနံၣ်အံၤ အဝဲသ့ၣ်တဖၣ် တဖဲးအီၣ်ဘၣ်ခုးဘၣ်အဃိ လၢခဲမဟိတနံၣ်အဂီၢ် အဝဲသ့ၣ် ကဘၣ်ကွၢ်ဆၢၣ်မဲၥ်ဒီး တၢ်ဂ့ၢ်ကီ လၢအမ့ၢ် တၢ်အီၣ်တၢ်အီန့ၣ်လီၤ. သုးမီၤစိရိၤအသုးသ့ၣ်တဖၣ် မ့ၢ်ဟူးဂဲၤဝဲ ဒုးယၤဂ့ၢ်ဝီအ တၢ်ရဲၣ်တၢ်ကျဲၤလၢ ကီၢ်သူလ့ၤဟီၣ်ကဝီၤပူၤ တပယူၥ်ဃီန့ၣ် ကမျၢၢ်သ့ၣ်တဖၣ် ထီဘိကဘၣ်ကွၢ်ဆၢၣ်မဲၥ်ဝဲဒၣ် ဒီးတၢ်သံတၢ်ပှၢ်, တၢ်ဘၣ်ဒိဘၣ်ထံး, တၢ်ဖှီၣ်တၢ်နး န့ၣ်လီၤ.
ဘၣ်ဃး ဒီး ကမျၢၢ်လၢဘၣ်ဃ့ၢ်မှံဟးဖျိသ့ၣ်တဖၣ် အဂ့ၢ်အကျိၤ လီၤတံၢ်လီၤဆဲးန့ၣ် နမ့ၢ်အဲၣ်ဒိး သ့ၣ်ညါအါထီၣ်တခီ ဆဲးကျိးသံကွၢ်သ့ ခီဖျိ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ကစီၣ်ဒီး တၢ်ဘိးဘၣ်ရၤလီၤဝဲၤဒ့အ (Facebook Page) သ့ဝဲဒၣ်န့ၣ်လီၤ. တၢ်ဆဲးကျိးလၢ လီတဲစိတခီ မ့ၢ်ဝဲ (+၆၆ ၉၂၆၁၈၄၀၆၁) န့ၣ်လီၤ.
မ်ပကပၥ်ဖှိ ၣ်မၤသကိးတၢ် တဂၤလၢလီၢ်ကျဲ သနၢၣ်ဒၣ်ဝဲ ဒီး ဘှါရှဲသကိးတၢ်ဂ့ၢ်ကီလၢ ကမျၢၢ်ဘၣ်ကွၢ်ဆၢၣ်မဲၥ်ဝဲတဖၣ် ဒီး ဒုးလီၤပှီၢ်ကွံၥ်သကိး မီၤစိရိၤသနူ န့ၣ်တက့ၢ်.
ဃူဃူဆူ တၢ်မၤနၢၤဖီတၢၣ်