သုးမီၤစိရိၤစုတီၤဖီလၥ် (စကခ-၈)(ခမရ-၄၀၇) အသုးတဖၣ် မၤပျံၤမၤဖုးမၤဘၣ်ဒိကမျၢၢ်

၂၀၂၁ နံၣ်, လါအီကူး ၁၇ သီ
၂၀၂၁ နံၣ် လါအီကူး ၁၅ သီ အနံၤဂီၤခီ ၈း၃၀ မံးနံးအဆၢကတီၢ် သုးမီၤစိရိၤစုတီၤဖီလၥ် စကခ-၈, ခမရ-၄၀၇ အသုး လၢအဘၣ်တၢ်တီခိၣ်ရိၣ်မဲအီၤလၢ သုးရ့ၣ်ခိၣ် (ကၠီၣ်မ့ထဲး) ဟဲအိၣ်ဖဲ မုၢ်တြီၢ်ကီၢ်ရ့ၣ်, ဒွဲၣ်လိကီၢ်ဆၣ်, မးထီကရူၢ်, မးထီသဝီပူၤသ့ၣ်တဖၣ် ခးတပျူၥ်ဝဲကျိဖးဒိၣ်ကျိဖိ လၢမးထီသဝီပူၤ အါထံၣ်ဒီး လီၤဘၣ်ဝဲလၢ ကမျၢၢ်ဖိ အတၢ်ဖံးအီၣ်မၤအီၣ်အလီၢ်အကျဲ (၈ ဖျၢၣ်) လီၤတဲၥ်ဝဲလၢ သီခါဖၠၣ်ကရၢၢ်ပူၤ (၃ ဖျၢၣ်) န့ၣ်လီၤ. သုးမီၤစိရိၤ ခးကျိဖးဒိၣ်ဒီးကျိဖိ ဘျီဝဲအံၤ ဘၣ်ဒိဝဲ သီခါတပါ အစုထွဲတကပၤန့ၣ်လီၤ. တကးဒံးဘၣ် မးထီသဝီဖိလၢအမ့ၢ် စီၤသါညး, စီၤဝ့လ့အူ, စီၤထူလး တဖၣ် သုးမီၤစိရိၤ ထူတံၢ်ယီၢ်တံၢ်ဝဲ ဒီးထံးဝဲအခိၣ်လၢကျိအခံပၣ် ဘၣ်ဒိဆါဝဲနးနးကလဲၥ် န့ၣ်လီၤ. သုးမီၤစိရိၤအသုးတဖၣ် ခးသံအီၣ်စ့ၢ်ကီးဝဲ စီၤထူလးအကျီၢ်တဒု ဒီးမဲၥ်တဲးလဲးတဒုန့ၣ်လီၤ.
သုးမီၤစိရိၤအသုးတဖၣ် မၤပျံၤမၤဖုး မၤဘၣ်ဒိဆါကမျၢၢ်ဖိဒ်အံၤအဖီခိၣ်န့ၣ် ခီဖျိလၢ အဝဲသ့ၣ်တဖၣ် ဟူးဂဲၤဝဲ ဒုးယၤအတၢ်ရဲၣ်တၢ်ကျဲၤ လၢမုၢ်တြီၢ်ကီၢ်ရ့ၣ်ဟီၣ်ကဝီၤပူၤ ဒီး အဝဲသ့ၣ်တဖၣ် ဘၣ်သဂၢၢ်ခးလိၥ်သးဒီး ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် ခဲအံၤခဲအံၤ ဒီး သံဘၣ်ဒိဝဲအါမးအဃိ လၢတၢ်တသးမံဝဲ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် အဖီခိၣ် မၤပျံၤမၤဖုး မၤဆူးမၤဆါဝဲကမျၢၢ်ဖိ န့ၣ်လီၤ.