ကီၢ်ပယီၤသုး ဟံဆူၣ်တၢ်စိတၢ်ကမီၤတဖု ပၥ်ဖှိၣ်သးဒီး ကီၢ်ပယီၤပၢၤကီၢ် ဃုၥ်ဒီး (ဒလန်-ပှၤလၢအဆှၢန့ၢ် ပယီၤသုးတၢ်ကစီၣ်) သ့ၣ်တဖၣ် ဟံဆူၣ်ဖီၣ်ဆူၣ်ကမျၢၢ် ဆၣ်ဖိကီၢ်ဖိ

လါစဲးပထ့ဘၢၣ် (၂) သီ, ၂၀၂၁

ဖဲလါစဲးပထ့ဘၢၣ် (၁) သီနံၤ ကီၢ်ပယီၤသုး ဟံဆူၣ်တၢ်စိတၢ်ကမီၤတဖု ပၥ်ဖှိၣ်ထီၣ်အသး ဃုၥ်ဒီး ပၢၤကီၢ် ဒီး (ဒလန်) ဝံၤ ဟံဆူၣ်ဖီၣ်ဆူၣ်ဝဲ ကမျၢၢ်အဆၣ်ဖိကီၢ်ဖိ ဖဲချၢၣ်လွံၢ်ထူၣ်ကီၢ်ရ့ၣ်, ဆီထံးကီၢ်ဆၣ်, ကွ့ဆ့းသဝီအဂ့ၢ် သဝီဖိတဂၤ ပၥ်ဖျါထီၣ်ဝဲန့ၣ်လီၤ.

ကီၢ်ပယီၤသုး ဟံဆူၣ်တၢ်စိတၢ်ကမီၤ သုးနီၣ်ဂံၢ် ခလရ (၂၆၄) ပှၤတီခိၣ်ရိၣ်မဲတၢ် ဝ့ၢ်ဖၠိအီၣ် ပၥ်ဖှိၣ်ထီၣ်အသး ဃုၥ်ဒီး ပၢၤကီၢ် ဒီး (ဒလန်) သ့ၣ်တဖၣ်ဝံၤ ဟံဆူၣ်ဖီၣ်ဆူၣ် ကွ့ဆ့းသဝီဖိ အကျီၢ်, ပနၢ် ဒီး မဲၥ်တဲးလဲး ဝံၤ က့ၤကိးနုၥ်ဝဲဆူၣ် သုးကလၢၤပူၤ လၢသဝီဖိတဖၣ် ကဘၣ်လဲၤထုးထီၣ်က့ၤဝဲ အဂီၢ်န့ၣ်လီၤ.
ကျီၢ် ဒီး ပနၢ်န့ၣ် သဝီဖိတဖၣ် ကဘၣ်လဲၤထုးထီၣ်က့ၤ လၢစ့ပယီၤ (၁၀၀၀၀၀-တကလီၢ်ကၠး) ဒီး မဲၥ်တဲးလဲး န့ၣ် စ့ပယီၤ (၅၀၀၀၀-ယဲၢ်ကလးကၠး) အဂ့ၢ် သဝီဖိလၢတအဲၣ်ဒိး ပၥ်ဖျါအမံၤတဂၤ ပၥ်ဖျါတၢ်ဂ့ၢ်တၢ်ကျိၤန့ၣ်လီၤ.

ကီၢ်ပယီၤသုး ဟံဆူၣ်တၢ်စိတၢ်ကမီၤတဖုအံၤ ဟးဝံၤဝီၤဟူးဂဲၤဝဲလၢ ဟီၣ်ကဝီၤပူၤ လူၤဃုထံၣ်ဝဲ သဝီဖိမၤအီၣ်တၢ် ကျိးဒဲကစၢ်, ဟးစိၥ်ဃုၥ်ဒီး ကျိးအလံၥ်အုၣ်ကီၤ လၢအတဖိးသဲးစဲ ဒီး မၢဆူၣ်ဒူသဝီဖိတဖၣ်လၢ ကမၤပှဲၤန့ၢ်အီၤအဂ့ၢ် သဝီဖိလၢတပၥ်ဖျါမံၤတဂၤ တဲအါထီၣ်ဝဲန့ၣ်လီၤ.

ကီၢ်ပယီၤသုး ဟံဆူၣ်တၢ်စိတၢ်ကမီၤ, ပၢၤကီၢ်ဒီး (ဒလန်) သ့ၣ်တဖၣ် ဟူးဂဲၤဝဲလၢ မုၢ်ဆါဒီးမုၢ်နၤ အဃိတၢ်အံၤဒုးအိၣ်ထီၣ်ဝဲ တၢ်ပျံၤတၢ်ဖုးလၢ လီၢ်ကဝီၤကမျၢၢ်သ့ၣ်တဖၣ် အဂီၢ်န့ၣ်လီၤ.
ဖဲလါအီကၢး ၃၁ သီ ပယီၤသုးဖီၣ်ဝဲ ယ့ၣ်လဲသဝီဖိ ၆ ဂၤအဂ့ၢ်န့ၣ် တၢ်သမံသမိးအဝဲသ့ၣ်ဝံၤ ဘၣ်တၢ်ပျၢ်ကွံၥ်အဝဲသ့ၣ် ၆ ဂၤလၢၥ်လံအဂ့ၢ်န့ၣ် ပသ့ၣ်ညါဘၣ်န့ၣ်လီၤ.