စာတို
ဗဟိုဌာနချုပ်
ဝါရင့်ကရင့်တော်လှန်ရေးသမား ပဒိုစောသမိန်ထွန်းအား နိုင်ငံတကာရောက်ကရင်များ ဂုဏ်ပြု
ဖေဖော်ဝါရီလ (၂) ရက်၊ ၂၀၂၅ ခုနှစ်၊ ကေအဲန်ယူ−ဗဟို။
ကေအဲန်ယူ-ကရင်အမျိုးသားအစည်းအရုံး၏ ဗဟိုကော်မတီဝင်တစ်ဦးဖြစ်သည့် ဝါရင့် ကရင့်တော်လှန်ရေး သမား သမိုင်းပညာရှင် ပဒိုစောသမိန်ထွန်းအား နိုင်ငံတကာရောက် ကရင်အဖွဲ့အစည်းတစ်ခုဖြစ်သော Overseas Karen Coordination of Karen Struggle Team (OKCKST) မှ ဂုဏ်ပြုပွဲအစီအစဉ်တစ်ရပ်ကို ၂၀၂၅၊ ဇန်နဝါရီလ(၃၁)ရက်နေ့တွင် ကျရောက်သည့် (၇၆)နှစ်မြောက် ကရင့်အမျိုးသားတော်လှန်ရေးနေ့တွင် ကေအဲန်ယူ ဗဟိုဌာနချုပ်၌ ကျင်းပခဲ့သည်။
ကရင့်တော်လှန်ရေး၊ ကရင့်အမျိုးသားရေးနှင့်ပတ်သက်၍ ကိုယ်ကျိုးစွန့်ကာ စွမ်းစွမ်းတမံပေးဆပ် ဆောင်ရွက် ခဲ့သည့်အပြင် မျိုးဆက်သစ်လူငယ်များအတွက် စွမ်းရည်မြှင့်တင်ပေးခြင်း၊ စိတ်ဓာတ်မြှင့်တင် ပေးခြင်းအပြင် လူငယ်များစာဖတ်ရန် သမိုင်းသိအောင်လုပ်ရန် အမြဲတစေ တိုက်တွန်းတတ်သူ ပဒိုစောသမိန်ထွန်း သည် တော်လှန်ရေးခရီးကြမ်းတွင် မဟာလူမျိုးကြီးဝါဒနှင့် စစ်အာဏာရှင်စနစ်၏ လက်ပါးစေများကြောင့် သူ့မိသားစုဝင်သားသမီးများကို ကြေကွဲဖွယ်ရာ ဆုံးရှုံးခဲ့ရသည့်တိုင် တော်လှန်ရေး အပေါ် ယနေ့ထိတိုင် သစ္စာရှိစွာအနစ်နာခံပေးဆပ်ခဲ့ခြင်းကြောင့် ကြီးစွာသော ချစ်ခင်လေးစားမှုများဖြင့် ဂုဏ်ပြုခြင်းဖြစ်ကြောင်း OKCKST မှ ဖော်ပြခဲ့သည်။
Overseas Karen Coordination of Karen Struggle Team (OKCKST) သည် အမေရိကန်၊ နော်ဝေး၊ ဆွီဒင်၊ ကနေဒါ၊ သြစတေးလျ၊ နယ်သာလန်၊ စင်ကာပူ၊ ထိုင်း စသည့် နိုင်ငံများသို့ရောက်ရှိနေသော ကရင့် တော်လှန်ရေးသမားရဲဘော်ဟောင်းများ၊ တော်လှန်ရေးကိုချစ်မြတ်နိုးသော ကရင်လူထုများဖြင့် ဖွဲ့စည်း ထားပြီး ကရင်လူမျိုးများကိုယ့်သမိုင်းကြောင်းနှင့်တော်လှန်ရေးဖြတ်သန်းမှုများကို သိရှိလာပြီး စည်းလုံး ညီညွတ်စွာဖြင့် ကရင်တော်လှန်ရေးကို အထောက်အကူပြုရန် ရည်ရွယ်ချက်ဖြင့် ၂၀၂၄ခုနှစ် ဇန်နဝါရီလတွင် စတင်ဖွဲ့စည်းခဲ့ခြင်းဖြစ်သည်။
ဆက်စပ်လုပ်ရှားဆောင်ရွက်မှုများ
