၂၀၂၁ နံၣ် လါစဲးပထ့ဘၢၣ် (၇) သီ ခ့ၣ်အဲၣ်ယူၣ် ကညီဒီကလုၥ်စၢဖှိၣ်ကရၢ တၢ်ကစီၣ်ထၢဖှိၣ်

၂၀၂၁ နံၣ်, လါစဲးပထ့ဘၢၣ် (၇)
၂၀၂၁ နံၣ်, လါစဲးပထ့ဘၢၣ်ထီၣ် (၁) သီတုၤ (၇) သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်ပၢဟီၣ်ကဝီၤ ဒ်အမ့ၢ် ဒူသထူၣ် ကီၢ်ရ့ၣ်သုးက့ (၁), မုၢ်တြီၢ်ကီၢ်ရ့ၣ် သုးက့ (၅), ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤအဃိ တၢ်ဘၣ်သဂၢၢ်ခးလိၥ်သး အိၣ်ထီၣ်ဝဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA), ကညီဒီကလုၥ်ဂၢၤသးကရၢ (KNDO) ဒီးသုးမီၤစိရိၤ အသုးသ့ၣ်တဖၣ် အဘၢၣ်စၢၤန့ၣ်လီၤ. (၇) သီကတီၢ်ပူၤ တၢ်ဒုးအကလုၥ်ကလုၥ် ကဲထီၣ်ဝဲ (၃၅) ဘျီ ဒီး သုးမီၤစိရိၤအသုးသံဝဲ (၂၁) ဂၤဘၣ်ဒိဝဲ (၃၄) ဂၤ ဒီး သုးမီၤစိရိၤအသုးသိလ့ၣ်ဟးဂီၤဝဲ (၃) ခိၣ်န့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်ရ့ၣ်ဒူသထူၣ် သုးက့ (၁), မီၤစကိၣ်ဟီၣ်ကဝီၤပူၤ ဖဲလါစဲးပထ့ဘၢၣ် (၁) သီအနံၤ (သဲအိမ်) သဝီကမျၢၢ်ဖိ ဒီမါ၀ၤခံဂၤ လဲၤဃုအီၣ်ညၣ် ဒီး ဟဲက့ၤလၢကျဲအခါ ဖဲမုၢ်နၤခီ (၉) နၣ်ရံၣ်ဘျဲၣ် ကတီၢ် ဘၣ်သဂၢၢ်ဝဲဒီး သုးမီၤစိရိၤအသုး လၢဟးဆှၣ်ကွၢ်တၢ်တဖၣ် ဒီး သုးမီၤစိရိၤအသုးသ့ၣ်တဖၣ် ခးအီၤဒီး ဘၣ်သံဝဲအမါ အိၣ်ဃုၥ်ဒီးအဟုးအသးန့ၣ်လီၤ. မ့မ့ၢ်အ၀ၤတခီ ဘၣ်ဒိဝဲန့ၣ်လီၤ.

၂၀၂၁ နံၣ် လါစဲးပထ့ဘၢၣ် (၂) သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဖၣ်အၣ်ကီၢ်ရ့ၣ် သုးက့ (၇) မၤဝဲ (၉) ဝီတဝီ ဂံၢ်ခီၣ်ထံး သုးတၢ်မၤလိပျၢ်အမူး ဖဲသုးက့ (၇) ဝဲၤလီၢ်ခိၣ်သ့ၣ်န့ၣ်လီၤ. လၢတၢ်မၤလိပျၢ်အမူးဘျီဝဲအံၤ သုးဝဲၤလီၢ်ခိၣ်သ့ၣ် ခိၣ်နၢ်တဖၣ် ဒီး သုးက့ (၇) ခိၣ်နၢ်သိၣ်ဒူသ့ၣ်တဖၣ် ဟဲထီၣ်ဝဲဒၣ်န့ၣ်လီၤ. လၢတၢ်မၤလိပျၢ် အတၢ်ရဲၣ်တၢ်ကျဲၤအပူၤ သုးခိၣ်ကျၢၢ်ဖိ မါဆၣ်တူၢ်ဂီၤ ကတိၤဟ့ၣ်ဂံၢ်ဟ့ၣ်ဘါဝဲ ပှၤထီၣ်တၢ်မၤလိဖိသ့ၣ်တဖၣ်လၢ ပကဒုးထီဒါသကိး သုးမီၤစိရိၤ တုၤအလီၤပှီၢ်ကွံၥ်တစုန့ၣ်လီၤ.

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ ဖဲလါစဲးပထ့ဘၢၣ်ထီၣ် (၂) သီၤအနံၤ သုးမီၤစိရိၤအသုး ခလရ-(၇၉) လၢအိၣ်ဆီလီၤအသးဖဲ မဲၤဝ့ၤသုးကလၢၤတဖၣ် ခးလီၤဝဲကျိဖးဒိၣ် ကျိဖိအါထံၣ်လၢ ဃီဖိခံဒီး မဲၤပီထၣ်သဝီအပူၤန့ၣ်လီၤ. ကမျၢၢ်ဖိသ့ၣ်တဖၣ် ဘၣ်ပျံၤဘၣ်ဖုးဝဲတၢ်လၢ သုးမီၤစိရိၤအသုးသ့ၣ်တဖၣ် ခးလီၤဝဲကျိဆူ သဝီပူၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် သုးက့ (၃) လၢၢ်ဒိၣ်ကီၢ်ဆၣ် ဘေၥကထၥ ကရူၢ်, ကုန်းမြင့်သၥယၥ သဝီအပူၤ ဖဲလါစဲးပထ့ဘၢၣ်ထီၣ် (၄) သီအနံၤ သုးမီၤစိရိၤအစုဒုၣ်တီၤဖီလၥ် ပၢၤကီၢ်သ့ၣ်တဖၣ် သူဝဲတၢ်စိတၢ်ကမီၤ ဒီး မၢဆူၣ်ဝဲ ကုန်းမြင့်သၥယၥ သဝီဖိ လၢကဘၣ်ကရၢၢ်န့ၣ်အဝဲသ့ၣ် အတၢ်လီၢ် လၢပျံၤထးဆှုၣ်န့ၣ်လီၤ. ဖဲလါစဲးပထ့ဘၢၣ်ထီၣ် (၅) သီအနံၤ မၢကဒီးဝဲကမျၢၢ် လၢကဘၣ်ဃဲၣ်လီၤကွံၥ် ပျံၤထးဆှုၣ် ဒီး ကရၢၢ်က့ၤန့ၣ်အဝဲသ့ၣ်လၢ (အိးခဲ) တၢ်ဒူၣ်န့ၣ်လီၤ. ကမျၢၢ်ဖိသ့ၣ်တဖၣ် ဘၣ်မၤန့ၣ်အဝဲသ့ၣ် အတၢ်လၢတၢ်ပျံၤတၢ်ဖုးအဖီခိၣ်န့ၣ်လီၤ. လါစဲးပထ့ဘၢၣ် (၅) သီဂီၤခီ ၈း၃၀ အဆၢကတီၢ် သုးမီၤစိရိၤ ဒီး အပှၤအုပ်ချုပ်ရေးမှူး အူသါလွ့ၤ တဖၣ် ဖီၣ်ဝဲ စီၤတၢ်မျၢ်ဂီၤ (ကိး) ဇင်မင်းထွန်း လၢအအိၣ်ဖဲ နတ်သံကွင်း ကဝီၤ (၆) တဂၤန့ၣ်လီၤ. တၢ်ဖီၣ်ဝဲ စီၤတၢ်မျၢ်ဂီၤ လၢတၢ်ဂ့ၢ်မနုၤလဲၣ် ဒီး လဲၤဆှၢဝဲဖဲလဲၣ်န့ၣ် အဟံၣ်ဖိဃီဖိတသ့ၣ်ညါထွဲဝဲဘၣ်အဃိ အဟံၣ်ဖိဃီဖိ ဘၣ်ကိၢ်ဘၣ်ဂီၤတၢ်လၢအဂီၢ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ လီၢ်ခၢၣ်သး ဘိးဘၣ်ရၤလီၤဝဲ လံၥ်ဘိးဘၣ်ရၤလီၤ ဖဲလါစဲးပထ့ဘၢၣ် (၃) သီအနံၤ လၢအဘၣ်ဃးဒီး ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကမၤသကိးတၢ်ဒီး တၢ်ကရၢကရိ တဖုလၢ်လၢ် လၢအထီဒါဝဲ သုးမီၤစိရိၤ လၢအဟံးန့ၢ်ဆူၣ် တၢ်စိတၢ်ကမီၤတဖၣ်န့ၣ်လီၤ. ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အလံၥ်ဘိးဘၣ်ရၤလီၤအဖီခိၣ် ကညီသူၣ်ဘီၣ်သးစၢ်သ့ၣ်တဖၣ် မၤဝဲ (Photo Campaign) လၢအတူၢ်လိၥ်ဝဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ အလံၥ်ဘိးဘၣ်ရၤလီၤအံၤန့ၣ်လီၤ.
ကီၢ်ပယီၤသုး ဟံးန့ၢ်ဆူၣ်တၢ်စိတၢ်ကမီၤ ဖဲ ၂၀၂၁ နံၣ် လါဖ့ၤဘြူၤအါရံၤ ၁ သီနံၤ ဝံၤအလီၢ်ခံ လါဖ့ၤဘြူၤအါရံၤ (၂) သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘိးဘၣ်ရၤလီၤစ့ၢ်ကီးဝဲလၢ တၢ်ကသူၣ်ထီၣ် ဖဲၣ်ဒဲၣ်ရဲၣ်ကီၢ်စၢဖှိၣ်အဂီၢ် ခ့ၣ်အဲၣ်ယူၣ် ကမၤသကိးတၢ်ဒီး ကလုၥ်ဒူၣ်တဖၣ် ဒီး ထံဖိကီၢ်ဖိ ကမျၢၢ်သ့ၣ်တဖၣ် န့ၣ်လီၤ. ဖဲလါဖ့ၤဘြူၤအါရံၤ ၁၄ သီအနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘိးဘၣ်ရၤလီၤကဒီးဝဲလၢ တၢ်ဟံးန့ၢ်ဆူၣ်တၢ်စိတၢ်ကမီၤအံၤ မ့ၢ်တၢ်မၤတခါ လၢအထီဒါ လဲၤကပၥ်ကွံၥ် ဆဲးလၤသီ လၢထံရူၢ်ကီၢ်သဲးတၢ်ဂ့ၢ်ကီအံၤ တၢ်ကဘၣ်ဘှါရှဲအီၤလၢ ထံရူၢ်ကီၢ်သဲးတၢ်မၤကျဲ ဒီး တၢ်ဟံးန့ၢ်ဆူၣ်တၢ်စိတၢ်ကမီၤအံၤ မ့ၢ်တၢ်မၤတခါ လၢအထုးထီထီၣ်ဝဲ မီၤစိရိၤသနူ အသးသမူအဃိ ခ့ၣ်အဲၣ်ယူၣ်ထီဒါအီၤန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ ကီၢ်ဆၣ် အစူးချေၥင်းကရူၢ်အပူၤ ဖဲလါစဲးပထ့ဘၢၣ် (၆) သီအနံၤ မုၢ်ထူၣ် (၁၂း၄၅) မံးနံးအဆၢကတီၢ် သုးမီၤစိရိၤအသုး ခမရ (၄၀၅) သုးကျိၤ (၂) သုးဖိသ့ၣ်တဖၣ် သူဝဲကမျၢၢ်ဖိအသိလ့ၣ် ဒီး ဟဲက့ၤဆှၢလီၤဝဲ အပှၤဘၣ်ဒိ လၢသုးက့ (၅) ဟီၣ်ကဝီၤပူၤ (၄) ဂၤ ဒီး ဖဲအတုၤလီၤဝဲဖဲ အစူးချေၥင်း သဲတံတၥး အကပၤအဆၢကတီၢ် ခးဝဲကျိဒိၣ် (၇၉) သၢထံၣ် ဒီး (၈၁) မးမး (၂) ထံၣ်ဝံၤ ခးကဒီးဝဲ ကျိဖိအါထံၣ်န့ၣ်လီၤ. ခီဖျိလၢ သုးမီၤစိရိၤအသုး ခးကျိဒ်အံၤအဖီခိၣ် ကမျၢၢ်သ့ၣ်တဖၣ် ဘၣ်ပျံၤဘၣ်ဖုးတၢ် ဒီး ဟးထီၣ်ဟးလီၤဝဲ တဘူၣ်လၢၤဘၣ်န့ၣ်လီၤ.