အာဏာသိမ်းစစ်ကောင်စီမှ လက်နက်ကြီးလက်နက်ငယ်များဖြင့်ရမ်းသမ်းပစ်ခတ်၊ ဒေသခံများ ထိတ်လန့်နေ

၂၀၂၁ ခုနှစ်၊ စက်တင်ဘာ ၁၄၊ သထုံခရိုင်

သထုံခရိုင်၊ ဘီးလင်းမြို့နယ်၊ မြစ်ကျိုး ကျေးနယ်အုပ်စု၊ လေးကေကျေးရွာအတွင်း တပ်စွဲထားသော အာဏာသိမ်းစစ်ကောင်စီနှင့်လက်အောက်ခံ BGF ပူးပေါင်းတပ်ဖွဲ့ တို့မှ (လေးကေနှင့် မြစ်ကျိုးကျေးရွာအကြား) တွင် လက်နက်ကြီး လက်နက်ငယ်များဖြင့် ရမ်းသမ်းပစ်ခတ်မှုကြောင့် ဒေသခံလူထုမှာ ထိတ်လန့်ကြောက်ရွံနေကြကြောင်း ကေအဲန်ယူ-ဘီးလင်း သတင်းနှင့်ပြန်ကြားရေးဌာနမှ သတင်းပေးပို့သည်။

"လေးကေစခန်းကအဖွဲ့က ကြသောင်းဆိပ် BGF စခန်းနဲ့တပ်ချိန်းဖို့ စက်တင်ဘာ (၁၂) ရက်နေ့မနက် ၉ နာရီမှာ လေးကေစခန်းကစထွက်တယ် နေ့လည် ၁၂ နာရီ ၂၆ မိနစ်က လေးကေနဲ့ မြစ်ကျိုးရွာကြားမှာ လမ်းကြောင်းရှင်းတဲ့အနေနဲ့ 79 လောင်ချာ (၃) ချက်နဲ့သေနတ်ပစ်ဖောက်တာတွေရှိတယ် "ဟု ဘီးလင်းသတင်းနှင့်ပြန်ကြားရေးတာဝန်ရှိသူမှပြောသည်။ တပ်ချိန်းရာတွင် စားနပ်ရိက္ခာတင်ဆောင်ရန် အရပ်သားကား (၃) စီးကိုလည်း အတင်းအဓမ္မယူတောင်းယူကာ ကားပိုင်ရှင်မှ ကားမောင်းပို့ပေးရကြောင်း ဘီးလင်းသတင်းနှင့်ပြန်ကြားရေးဌာနခွဲမှပြောသည်။

"BGF-၁၀၁၃တပ်ရင်း၊ တပ်ခွဲ (၃) တပ်စုမှူး ကတုံးက ကြသောင်းဆိပ်စခန်းမှာအခု ရှိနေတဲ့ BGF-၁၀၁၃ တပ်ခွဲ (၂) နေရာကို တပ်ချိန်းဖို့ သွားတာ ကတုံးအဖွဲ့က ၃၅ ယောက်ပါတယ် သွားပို့တဲ့လူအင်အား ကအယောက် (၄၀) စုစုပေါင်း (၇၅) ယောက် တက်သွားတယ်" ဟုဘီးလင်းသတင်းနှင့်ပြန်ကြားရေးဌာနခွဲမှပြောသည်။