အာဏာသိမ်း စစ်ကောင်စီနှင့် BGF ပူးပေါင်းတပ်ဖွဲ့တို့အား KNLA မှ မိုင်းဆွဲတိုက်ခိုက်၊ စစ်ကောင်စီမှ ၃ ဦးသေ၊ စစ်ကောင်စီမှ လက်နက်ကြီးများ ရမ်းသမ်းပစ်ခတ်၊ ဒေသခံကျွဲ ၄ ကောင်သေဆုံး

၂၀၂၁ ခုနှစ်၊ စက်တင်ဘာ ၂၁၊ သထုံခရိုင်

ကေအဲန်ယူ-သထုံခရိုင်၊ သထုံမြို့နယ်၊ ပုရစ်ခိုကျေးရွာအနီးတွင် အာဏာသိမ်းစစ်ကောင်စီ လက်အောက် ခံ စကခ (၈) နှင့် BGF ပူးပေါင်းတပ်ဖွဲ့ကို KNLA ကရင်အမျိုးသား လွတ်လပ်ရေး တပ်မတော် (KNLA) မှမိုင်းဆွဲတိုက်ခိုက်ရာ စစ်ကောင်စီမှ ၃ ဦးသေဆုံးခဲ့သည်။ မနေ့က ည ၁၁ နာရီ ၁၅ မိနစ်ခန့်တွင် ကေအဲန်ယူ-ဘီးလင်းမြို့နယ်အတွင်းရှိ ဝင်းတာပန်ကျေးရွာ BGF စခန်းနှင့် စကခ (၈) ပိန္နဲတော စခန်းအကြား လှုပ်ရှားနေသော အာဏာသိမ်းစစ်ကောင်စီနှင့် BGF ပူးပေါင်းတပ်ဖွဲ့ကို မိုင်းဆွဲ တိုက်ခိုက်ခြင်းဖြစ်သည်ဟု ကေအဲန်ယူ ဘီးလင်းမြို့နယ် သတင်းနှင့်ပြန်ကြားရေးဌာနမှပြောသည်။

KNLA ဖက်မှ ထိခိုက်ကျဆုံးမှုမရှိပဲ အာဏာသိမ်း စစ်ကောင်စီ စကခ (၈) ပိန္နဲတောစခန်းမှ နံနက် ၇ နာရီခန့်တွင် လက်နက်ကြီးများဖြင့် ရမ်းသမ်းပစ်ခတ်မှုကြောင့် အီဟယ်ရွာလေးကျေးရွာတွင် နေထိုင်သူ စောဒါးဟဲ၏ ကျွဲ (၄) ကောင် လက်နက်ကြီးထိမှန်သေဆုံးခဲ့ကြောင်း သိရသည်။ မနေ့ညက အာဏာသိမ်းစစ်ကောင်စီ တပ်များနှင့် KNLA တပ်များ အကြား အပြန်အလှန် ပစ်ခတ်သံများကို ည (၁၁) နာရီခန့်တွင် စတင်ကြားနေရပြီး နံနက် (၇) နာရီမှသာ ပစ်ခတ်သံများရပ်စဲသွားကြောင်း အမည်မ ဖော်လိုသူ ဒေသခံတစ်ဦးမှပြောသည်။