သုးမီၤစိရိၤ ဖီၣ်ဒီးမၤသံ ပှၤကမျၢၢ်ဖိ ၂ ဂၤ အဂ့ၢ်

လါအီကူး ၁၇ သီ ၂၀၂၂ နံၣ်
ခ့ၣ်အဲၣ်ယူၣ်-လီၢ်ခၢၣ်သး
ဖဲလါအီကူး ၁၇ သီ ၂၀၂၂ နံၣ် အနံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ် မူကီၢ်ဆၣ် ဟီၣ်ကဝီၤပူၤ ဖဲဂီၤခီ (၁၀း၀၀) နၣ်ရံၣ်အဆၢကတီၢ် သုးမီၤစိရိၤအသုး ခမရ (၆၀၃) လၢအိၣ်ဆီလီၤအသးဖဲ ကၠိပ့ၣ်ဆ့း တၢ်လီၢ်တဖၣ် မၤသံဝဲဒၣ် သဝီဖိ ၂ ဂၤန့ၣ်လီၤ.
သဝီဖိလၢ သုးမီၤစိရိၤမၤသံဝဲတဖၣ် မ့ၢ်ဝဲ စီၤမ့ၤထူ (သးနံၣ်-၅၀) နံၣ်, အိၣ်တၢ်လီၢ်-ကီၢ်သီ (ကိး) စၣ်ဘူတီသဝီ ဒီး စီၤကၠံင့ (သးနံၣ်-၄၅) နံၣ်, အိၣ်တၢ်လီၢ်-နိၣ်ညၣ်လၣ်ဖိသဝီ သ့ၣ်တဖၣ်န့ၣ်လီၤ. သဝီဖိခံဂၤအံၤ ဖဲလါအီကူး ၁၅ သီအနံၤန့ၣ် က့ၤကွၢ်က့ၤ အဆၣ်ဖိကီၢ်ဖိ လၢအအိၣ်တ့ၢ်တဖၣ် အဆၢကတီၢ် ဒုၣ်ဒါဖီၣ်န့ၢ်အဝဲသ့ၣ် ဒီး မၤသံကွံၥ်အဝဲသ့ၣ်န့ၣ်လီၤ.
ခီဖျိလၢ သုးမီၤစိရိၤအသုးတဖၣ် မၤအၢမၤသီ မၤသံမၤဝီ သဝီဖိတဖၣ်အဃိ သဝီဖိတဖၣ် ပျံၤတၢ်ဖုးတၢ် ဒီး ဘၣ်ဃ့ၢ်အိၣ်ကဒုလၢ တၢ်ဘံၣ်တၢ်ဘၢအလီၢ်န့ၣ်လီၤ. ဒီး သဝီဖိတနီၤ ဖဲအဃ့ၢ်အိၣ်ကဒုလၢ တၢ်ဘံၣ်တၢ်ဘၢအလီၢ် အဆၢကတီၢ် အဝဲသ့ၣ် အဆၣ်ဖိကီၢ်ဖိ ဒ်အမ့ၢ် ကျီၢ်, ပနၢ် သ့ၣ်တဖၣ် စၢဃၥ်တ့ၢ်ဝဲအဃိ အဲၣ်ဒိးက့ၤကွၢ်က့ၤဝဲ ဘၣ်ဆၣ် က့ၤကွၢ်က့ၤဝဲတဘူၣ်လၢၤဘၣ်အဃိ ဆၣ်ဖိကီၢ်ဖိတနီၤနီၤ သံကွံၥ်ဝဲဒၣ် အိၣ်စ့ၢ်ကီးန့ၣ်လီၤ. ဒ်န့ၣ်အသိး ကမျၢၢ်တနီၤ ဖဲအဃ့ၢ်အိၣ်ကဒုအဆၢကတီၢ် တစၢဃၥ်တ့ၢ် အဆၣ်ဖိကီၢ်ဖိတဖၣ်ဘၣ် အဃိ ဆၣ်ဖိကီၢ်ဖိတဖၣ် ပှၤကွၢ်ထွဲအီၤ တအိၣ်နီတဂၤလၢၤဘၣ် ဒီး ဟးထီၣ်ဟးလီၤ မၤဟးဂီၤတၢ်မုၢ်တၢ်ဘိ အိၣ်စ့ၢ်ကီးဝဲဒၣ်န့ၣ်လီၤ.