၂၀၂၂ နံၣ် လါနိၣ်ဝ့ဘၢၣ်တလါအကတီၢ်ပူၤ တၢ်ဒုးကစီၣ် ဒီး သုးမီၤစိရိၤအသုး, သုးခိးကီၢ်ဆၢ အသုးတဖၣ် တၢ်မၤထီဒါ ဟီၣ်ခိၣ်ဖိခွဲးယၥ်

၂၀၂၂ နံၣ်, လါဒံၣ်စ့ဘၢၣ် (၅) သီ, ခ့ၣ်အဲၣ်ယူၣ်-လီၢ်ခၢၣ်သး

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် ဟူးဂဲၤဝဲ ဒုးယၤဂ့ၢ်ဝီ အတၢ်ရဲၣ်တၢ်ကျဲၤ ဒီး မၤထီဒါဝဲ ဟီၣ်ခိၣ်ဖိခွဲးယၥ် အိၣ်ဝဲတပယူၥ်ဃီအဃိ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ ဒီး သုးမီၤစိရိၤအသုး, သုးခိးကီၢ်ဆၢ အသုးသ့ၣ်တဖၣ် အဘၢၣ်စၢၤ တၢ်ဘၣ်သဂၢၢ်ခးလိၥ်သး ကဲထီၣ်ဝဲ ကိးနံၤဒဲးန့ၣ်လီၤ.
ဒူသထူၣ်ကီၢ်ရ့ၣ် သုးက့ (၁) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၃၃) ဘျီ ဒီး သုးမီၤစိရိၤအသုး သံဝဲ (၄၄) ဂၤ ဒီး ဘၣ်ဒိဝဲ (၄၁) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ် ခဲလၢၥ်အိၣ်ဝဲ (၁၁) ခိၣ်ဒီး သုးခိးကီၢ်ဆၢ သုးရ့ၣ် (၁၀၁၄) အပှၤဟဲက့ၤပၥ်လီၤတၢ်စုကဝဲၤ (၁) ဂၤန့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ အသုးတဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ အဖျၢၣ် (၅၀) ဘျဲၣ်န့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ အသုးတဖၣ် ခးလီၤကျိဖးဒိၣ်အဃိ ဘၣ်ဟးဂီၤဝဲ ကမျၢၢ်ဖိအဟံၣ် (၇) ဖျၢၣ်ဒီး ဘၣ်သံဝဲကမျၢၢ်ဖိ (၂) ဂၤဒီး ကမျၢၢ်ဖိဘၣ်ဒိဝဲ (၂) ဂၤန့ၣ်လီၤ. သုးမီၤစိရိၤအသုး ခးသံစ့ၢ်ကီးဝဲ ကမျၢၢ်ဖိလၢ အတၢ်ကမၣ်တအိၣ်ဘၣ် (၁) ဂၤန့ၣ်လီၤ. သုးမီၤစိရိၤအသုး သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ အိၣ်ဝဲ (၂) ဘျီ ဒီး ဘၣ်ဟးဂီၤဝဲ ကမျၢၢ်ဖိအဟံၣ် (၂) ဖျၢၣ် ဒီး ဘၣ်ဒိဝဲကမျၢၢ်ဖိ (၁) ဂၤန့ၣ်လီၤ. သုးမီၤစိရိၤအသုး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် (၃) ဂၤ ဒီး သုးခိးကီၢ်ဆၢ သုးရ့ၣ် (၁၀၁၄) သုးဒ့ (၂) သုးဒ့ခိၣ် တ့ၣ်ဝ့ မၢဆူၣ်ဝဲ ဖၣ်အၣ်ကီၢ်ဆၣ် မဲး စံၢ်ထၣ်သဝီ, ပျီဖိတိၤသဝီ, လီၢ်ပူၤသဝီ ဒီး ဝဲပၠၣ်သဝီ မၢဆူၣ်ဝဲသဝီတဖျၢၣ်တနံၤ ကမျၢၢ်အဂၤ (၁၀), သဝီ (၄) ဖျၢၣ်သဝီဖိတနံၤအဂၤ (၄၀) ကဘၣ်ဘှီဂ့ၤထီၣ်န့ၢ်ဝဲ အသုးကလၢၤ ဒီး မၢဝဲကိးနံၤဒဲး လၢတလါအကတီၢ်ပူၤန့ၣ်လီၤ.
တီအူကီၢ်ရ့ၣ် သုးက့ (၂) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၁၇) ဘျီ ဒီး သုးမီၤစိရိၤအသုး သံဝဲ (၅၃) ဂၤ, ဘၣ်ဒိဝဲ (၁၀) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ် (၃) ခိၣ်န့ၣ်လီၤ. သုးမီၤစိရိၤအသုး သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၄) ဘျီ ဒီး ဘၣ်သံဝဲကမျၢၢ် (၂) ဂၤ, ဘၣ်ဒိဝဲကမျၢၢ် (၄) ဂၤ ဒီး ဘၣ်ဟးဂီၤဃုၥ်စ့ၢ်ကီး ကမျၢၢ်ဖိအဟံၣ် (၃) ဖျၢၣ် ဒီး သုးမီၤစိရိၤအသုး ဒွဲၣ်အူကွံၥ်စ့ၢ်ကီးဝဲ ကမျၢၢ်ဖိအဟံၣ် (၅) ဖျၢၣ်န့ၣ်လီၤ.
ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၃၁) ဘျီ ဒီး သုးမီၤစိရိၤအသုး သံဝဲ (၄၀) ဂၤ ဒီး ဘၣ်ဒိဝဲ (၂၉) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ ထီၣ်ဒုးမၤဟးဂီၤကွံၥ်ဝဲ သုးမီၤစိရိၤအသုးကလၢၤ (၃) ဖျၢၣ်ဒီး သုးမီၤစိရိၤအသုး သိလ့ၣ်ဟးဂီၤစ့ၢ်ကီးဝဲ (၁) ခိၣ်န့ၣ်လီၤ. သုးမီၤစိရိၤအသုး ခးလီၤဝဲ ကျိဖးဒိၣ် လၢကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ အိၣ်ဝဲအဖျၢၣ် (၆၀) ဘျဲၣ် ဒီး ဘၣ်သံဝဲကမျၢၢ် (၁) ဂၤ, ကမျၢၢ်ဘၣ်ဒိဝဲ (၂) ဂၤ, ဘၣ်ဟးဂီၤဝဲ ကမျၢၢ်ဖိအဟံၣ် (၆) ဖျၢၣ်, ကမျၢၢ်ကၠိ (၁) ဖျၢၣ်, ကမျၢၢ်တၢ်ဆါဟံၣ် (၁) ဖျၢၣ်န့ၣ်လီၤ. သုးမီၤစိရိၤအသုး သူဝဲ (Drone) ဒီး ဟဲတ့ၢ်လီၤမ့ၣ်ပိၢ် လၢကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၇) ဘျီ ဒီး ဘၣ်ဒိဝဲကမျၢၢ်ဖိ (၆) ဂၤ, ဘၣ်ဟးဂီၤဃုၥ်စ့ၢ်ကီး ကမျၢၢ်ဖိအဟံၣ် (၃) ဖျၢၣ်, ကမျၢၢ်တၢ်ဆါဟံၣ် တဖျၢၣ်န့ၣ်လီၤ. သုးမီၤစိရိၤအသုး သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၃၄) ဘျီ ဒီး ဘၣ်ဟးဂီၤဝဲ ကမျၢၢ်ဖိအဟံၣ် (၄) ဖျၢၣ်, ကမျၢၢ်တၢ်ဆါဟံၣ် (၁) ဖျၢၣ်, သီခါဖၠၣ်တမၣ်ယိၣ် (၁) ဖျၢၣ်န့ၣ်လီၤ. သုးမီၤစိရိၤအသုး ဒွဲၣ်အူကွံၥ်ဝဲ ကမျၢၢ်ဖိအဟံၣ် ခဲလၢၥ် (၂၁) ဖျၢၣ်ဒီး ဖီၣ်စ့ၢ်ကီးဝဲ ကမျၢၢ်ဖိလၢ အတၢ်ကမၣ်တအိၣ်ဘၣ် (၁၂) ဂၤန့ၣ်လီၤ.

ဘျံးဒဝဲၢ်ကီၢ်ရ့ၣ် သုးက့ (၄) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၃၁) ဘျီ ဒီး သုးမီၤစိရိၤအသုး သံဝဲ (၅၀) ဂၤ, ဘၣ်ဒိဝဲ (၂၆) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ်ခဲလၢၥ် (၆) ခိၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ အဖျၢၣ် (၃၀) ဘျဲၣ် ဒီး ဘၣ်သံဝဲကမျၢၢ်ဖိ (၁) ဂၤ ဒီး ကမျၢၢ်ဖိဘၣ်ဒိဝဲ (၅) ဂၤန့ၣ်လီၤ. သုးမီၤစိရိၤအသုး ဒွဲၣ်အူကွံၥ်ဝဲ ကမျၢၢ်ဖိအဟံၣ် (၉) ဖျၢၣ် ဒီး ဖီၣ်စ့ၢ်ကီးဝဲ ကမျၢၢ်ဖိ လၢအတၢ်ကမၣ်တအိၣ်ဘၣ် (၇) ဂၤန့ၣ်လီၤ.
မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၁၁၆) ဘျီ ဒီး သုးမီၤစိရိၤအသုး သံဝဲခဲလၢၥ် (၆၉) ဂၤ ဒီး ဘၣ်ဒိဝဲ (၅၁) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ မၤဟးဂီၤကွံၥ်ဝဲ သုးမီၤစိရိၤအသုး သိလ့ၣ် (၁) ခိၣ် ဒီး မၤဟးဂီၤဃုၥ်စ့ၢ်ကီး သုးမီၤစိရိၤအသုး သူဝဲလီတဲစိ (တၣ်၀ၣ်တဲၣ်) အတၢၣ်တခါန့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၃၃) ဖျၢၣ် ဒီး ဘၣ်ဟးဂီၤဝဲ ကမျၢၢ်ဖိအဟံၣ် (၁) ဖျၢၣ်န့ၣ်လီၤ. သုးမီၤစိရိၤအသုး သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၄) ဘျီ ဒီး ဘၣ်ဟးဂီၤဝဲ ကမျၢၢ်ဖိအဟံၣ် ခဲလၢၥ် (၁၂) ဖျၢၣ်, ကမျၢၢ်ဖိအကၠိ (၁) ဖျၢၣ် ဒီး တၢ်ဘါယွၤသရိၥ် (၁) ဖျၢၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဟးဒိးလီၤမ့ၣ်ပိၢ် လၢကမျၢၢ်ဖိဟးထီၣ်က့ၤလီၤကျဲအဃိ ကမျၢၢ်ဖိယီၢ်ဘၣ် သုးမီၤစိရိၤအမ့ၣ်ပိၢ် ဒီး သံဝဲ (၂) ဂၤ, ဘၣ်ဒိဝဲ (၁) ဂၤန့ၣ်လီၤ.
ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ တၢ်ဒုးဖးဒိၣ်, တၢ်ဒုးဖိ ခဲလၢၥ်ကဲထီၣ်ဝဲ (၅၃) ဘျီ ဒီး သုးမီၤစိရိၤအသုး သံဝဲ (၇၉) ဂၤ ဒီး ဘၣ်ဒိဝဲ (၈၀) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ်ဂၢၤသးကရၢ ထီၣ်ဒုးမၤဟးဂီၤကွံၥ်ဝဲ သုးမီၤစိရိၤ စုဒုၣ်တီၤဖီလၥ် ပၢၤကီၢ်အသုးကလၢၤ (၂) ဖျၢၣ် ဒီး ဖီၣ်သမူန့ၢ် သုးမီၤစိရိၤအသုး လၢတၢ်ဒုးပျီပူၤ (၄) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် ဖီၣ်န့ၢ်စ့ၢ်ကီးဝဲ သုးမီၤစိရိၤ စုဒုၣ်တီၤဖီလၥ် ဝီၢ်လ့ၣ်ပၢၤကီၢ်အပှၤ (၂) ဂၤ ပၣ်ဃုၥ်ဒီး ကသံၣ်မူၤဘှီးန့ၣ်လီၤ. သုးမီၤစိရိၤအသုး ဟဲက့ၤပၥ်လီၤတၢ်စုကဝဲၤ အိၣ်ဝဲ (၂) ဂၤစ့ၢ်ကီးန့ၣ်လီၤ. သုးမီၤစိရိၤအသုး ဒီး သုးခိးကီၢ်ဆၢ အသုး ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၇၇) ဖျၢၣ် ဒီးဘၣ်ဒိဝဲကမျၢၢ်ဖိ (၁) ဂၤ, ဘၣ်ဟးဂီၤဝဲကမျၢၢ်ဖိအဟံၣ် (၆) ဖျၢၣ်န့ၣ်လီၤ. သုးမီၤစိရိၤ သူဝဲကဘီယူၤဒုးသုး ဒီး ဟဲခးလီၤတၢ်လၢ ကမျၢၢ်ဖိအဒူသဝီ, တၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၁၂) ဘျီ ဒီး ဘၣ်သံဝဲ ကမျၢၢ်ဖိ (၃) ဂၤ, ဘၣ်ဒိဝဲကမျၢၢ်ဖိ (၆) ဂၤန့ၣ်လီၤ. သုးမီၤစိရိၤအသုးသ့ၣ်တဖၣ် ဟံဆူၣ်ဝဲ ကမျၢၢ်ဖိအတၢ်ဖိတၢ်လံၤ လီၤလၢစ့ယိၤ( ၆၀၀၀၀) ဘး ဒီး ဟံဆူၣ်စ့ၢ်ကီးကမျၢၢ်ဖိ အဟုသး (၅) ထၢၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ ဟီၣ်ကဝီၤပူၤ ၂၀၂၂ နံၣ်, လါနိၣ်ဝ့ဘၢၣ် ဒီတလါအကတီၢ်ပူၤ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ်, ကညီဒီကလုၥ် ဂၢၤသးကရၢ လုၢ်ထီၣ်အသးသမူလၢ ထံကီၢ်ဒီးပှၤကလုၥ်ဂီၢ် ခဲလၢၥ် (၃၀) ဂၤ ဒီး ဘၣ်ဒိဝဲ (၆၈) ဂၤန့ၣ်လီၤ.