၂၀၂၂ နံၣ် လါဒံၣ်စ့ဘၢၣ် တလါအကတီၢ်ပူၤ တၢ်ဒုးကစီၣ် ဒီး သုးမီၤစိရိၤအသုးသ့ၣ်တဖၣ်, သုးခိးကီၢ်ဆၢ BGF အသုးသ့ၣ်တဖၣ် အတၢ်မၤထီဒါ ဟီၣ်ခိၣ်ဖိခွဲးယၥ်

၂၀၂၃ နံၣ်, လါယနူၤအါရံၤ (၇) သီ, ခ့ၣ်အဲၣ်ယူၣ်-လီၢ်ခၢၣ်သး
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢဟီၣ်ကဝီၤပူၤ ၂၀၂၂ နံၣ် လါဒံၣ်စ့ဘၢၣ် ဒီတလါအကတီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLA, ကညီဒီကလုၥ်ဂၢၤသးကရၢ KNDO ဒီး သုးမီၤစိရိၤအသုးသ့ၣ်တဖၣ် သုးခိးကီၢ်ဆၢ BGF အသုးသ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲ ခဲလၢၥ် (၃၀၆) ဘျီ ဒီး သုးမီၤစိရိၤအသုး ဒီး သုးခိးကီၢ်ဆၢ အသုး BGF သ့ၣ်တဖၣ် သံဝဲ (၂၁၇) ဂၤဘၣ်ဒိဝဲ (၁၇၁) ဂၤန့ၣ်လီၤ. ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် KNLA ဒီး ကညီဒီကလုၥ်ဂၢၤသးကရၢ KNDO တကပၤတခီ လုၢ်ထီၣ်အသးသမူလၢ ထံကီၢ်ဒီးပှၤကလုၥ်အဂီၢ် ခဲလၢၥ် (၉) ဂၤ ဒီးဘၣ်ဒိဝဲခဲလၢၥ် (၂၇) ဂၤန့ၣ်လီၤ.
ဒူသထူၣ်ကီၢ်ရ့ၣ် သုးက့ (၁) ဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ အဖျၢၣ် (၆၀) ဘျဲၣ် ဒီး ဘၣ်ဟးဂီၤဝဲ ကမျၢၢ်ဖိအဟံၣ် (၁၄) ဖျၢၣ်, ကမျၢၢ်ဖိအဘုဖီ (၁) ဖျၢၣ် ဒီး ကမျၢၢ်ဖိဘၣ်ဒိဝဲ (၅) ဂၤအကျါ ပၣ်ဃုၥ်ဒီး ပိၥ်မုၣ်နီၣ်ဒိၣ် (၁) ဂၤ ဒီး ပိၥ်မုၣ်ဖိသၣ် သးနံၣ် (၁၃) နံၣ် တဂၤန့ၣ်လီၤ. ဘၣ်သံစ့ၢ်ကီးဝဲ ကမျၢၢ်ဖိအကျီၢ် (၆) ဒု ဒီး ကမျၢၢ်ဖိအဆီ (၃) ဘ့ၣ်န့ၣ်လီၤ.
တီအူကီၢ်ရ့ၣ် သုးက့ (၂) ဟီၣ်ကဝီၤပူၤ သုးမီၤစိရိၤအသုး ခးလီၤကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲအဃိ ဘၣ်ဒိဝဲကမျၢၢ်ဖိ ပိၥ်ခွါ (၁) ဂၤ ဒီး ဘၣ်ဟးဂီၤဝဲ ကမျၢၢ်ဖိအဟံၣ် (၁) ဖျၢၣ်န့ၣ်လီၤ. သုးမီၤစိရိၤအသုး သူဝဲကဘီယူၤ ဒီးဟဲခးလီၤတၢ်လၢ ကမျၢၢ်ဖိအဒူသဝီ အိၣ်ဝဲ (၁) ဘျီ ဒီး ခးလီၤကျိဖးဒိၣ် (၃) ဖျၢၣ်န့ၣ်လီၤ.

ချၢၣ်လွံၢ်ထူၣ်ကီၢ်ရ့ၣ် သုးက့ (၃) ဟီၣ်ကဝီၤပူၤ သုးမီၤစိရိၤအသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိတၢ်အိၣ်တၢ်ဆိးလီၢ်ကျဲအဃိ ဘၣ်သံဝဲဖိသၣ်ပိၥ်မုၣ် သးနံၣ် (၇) နံၣ် တဂၤ ဒီး ဘၣ်ဒိဝဲ (၃) ဂၤအကျါ ပၣ်ဃုၥ်ဒီး ပိၥ်မုၣ်ဖိသၣ် သးနံၣ် (၁၀) နံၣ် (၁) ဂၤ, ပိၥ်ခွါသးစၢ် (၁၅) နံၣ် (၁) ဂၤန့ၣ်လီၤ. ဘၣ်ဟးဂီၤဃုၥ်စ့ၢ်ကီးဝဲ ကမျၢၢ်ဖိအဟံၣ် (၃) ဖျၢၣ်န့ၣ်လီၤ. သုးမီၤစိရိၤအသုး ကဘီယူၤ (၅) ဘ့ၣ် ဒီး Drone (၂) ဘ့ၣ် ဟဲခးလီၤတၢ်လၢ ကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၃) ဘျီ ဒီး ခးလီၤဝဲကျိဖးဒိၣ် ခဲလၢၥ် (၈) ဖျၢၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဒွဲၣ်အူဝဲကမျၢၢ်ဖိအဟံၣ် (၂) ဖျၢၣ်, ကမျၢၢ်ဖိအထူကျး (၁) ဖျၢၣ်, ကမျၢၢ်ဖိ အတၢ်ဘှီစဲးဖီကဟၣ်အကျး (၁) ဖျၢၣ်န့ၣ်လီၤ.
ဘျံးဒဝဲၢ်ကီၢ်ရ့ၣ် သုးက့ (၄) ဟီၣ်ကဝီၤပူၤ သုးမီၤစိရိၤအသုး ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ်တဖၣ် ခဲလၢၥ် (၈) ဂၤ ဒီး ဒွဲၣ်အူစ့ၢ်ကီးဝဲ ကမျၢၢ်ဖိအဟံၣ် (၂) ဖျၢၣ်န့ၣ်လီၤ.
မုၢ်တြီၢ်ကီၢ်ရ့ၣ် သုးက့ (၅) ဟီၣ်ကဝီၤပူၤ သုးမီၤစိရိၤအသုး ဒီး သုးခိးကီၢ်ဆၢ အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ အဖျၢၣ် (၁၀၀) ဘျဲၣ် ဒီး ဘၣ်သံဝဲကမျၢၢ်ဖိ ပိၥ်မုၣ်ဖိသၣ် သးနံၣ် (၁၃) နံၣ် (၁) ဂၤ, ဒီး ဘၣ်ဒိဝဲ (၄) ဂၤအကျါ ပၣ်ဃုၥ်ဒီး သးစၢ်ပိၥ်မုၣ် သးနံၣ် (၁၆) နံၣ် (၁) ဂၤ ဒီး ဘၣ်ဟးဂီၤဃုၥ်စ့ၢ်ကီးဝဲ ကမျၢၢ်ဖိအဟံၣ် (၄) ဖျၢၣ် ဒီး ဘၣ်သံဝဲ ကမျၢၢ်ဖိအကျီၢ် (၅) ဒု ဘၣ်ဒိဝဲ (၃) ဒုန့ၣ်လီၤ. သုးမီၤစိရိၤအသုး ခးသံစ့ၢ်ကီးဝဲ ကမျၢၢ်ပိၥ်ခွါ (၁) ဂၤန့ၣ်လီၤ.
သုးမီၤစိရိၤအသုး ကဘီယူၤ ဟဲခးလီၤတၢ်လၢ ကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်လီၢ်ကျဲ ခဲလၢၥ်အိၣ်ဝဲ (၂၇) ဘျီ ဒီး ခးလီၤဝဲ ကျိဖးဒိၣ် အဖျၢၣ်အိၣ်ဝဲ (၇၈) ဖျၢၣ် ဒီး ခးလီၤဝဲ ကျိစဲးလး လၢကဘီယူၤ အိၣ်အထံၣ် (၁၀၀၀) တကထိဘျဲၣ်န့ၣ်လီၤ. သုးမီၤစိရိၤအသုး ကဘီယူၤ ခးလီၤတၢ်အဖီခိၣ် ဘၣ်အူအီၣ်ဝဲ ကမျၢၢ်ဖိအဘုဖီ ခဲလၢၥ် (၁၀) ဖျၢၣ်, ဘၣ်အူအီၣ် ကမျၢၢ်ဖိအဟံၣ် ခဲလၢၥ် (၉) ဖျၢၣ်, ဘၣ်ဟးဂီၤဝဲ ကမျၢၢ်ဖိအဟံၣ် ခဲလၢၥ် (၃၃) ဖျၢၣ် ဒီး ဘၣ်ဒိဃုၥ်စ့ၢ်ကီး ကမျၢၢ်ဖိ (၁) ဂၤ, ဘၣ်သံဃုၥ်ကမျၢၢ်ဖိအပနၢ် (၁) ဒု, ဘၣ်ဒိဝဲ (၄) ဒုန့ၣ်လီၤ. သုးခိးကီၢ်ဆၢ အသုးရ့ၣ် (၁၀၁၃) အပှၤသ့ၣ်တဖၣ် ခးသံအီၣ်စ့ၢ်ကီးဝဲ ကမျၢၢ်ဖိအပနၢ် (၁) ဒု န့ၣ်လီၤ. သုးမီၤစိရိၤအသုး ဒွဲၣ်အူကွံၥ်စ့ၢ်ကီးဝဲ ကမျၢၢ်ဖိအဘုဖီ (၄) ဖျၢၣ် ဒီး ဒွဲၣ်အူကွံၥ်ဝဲ ကမျၢၢ်ဖိအဟံၣ် (၄) ဖျၢၣ်န့ၣ်လီၤ. သုးမီၤစိရိၤအသုးသ့ၣ်တဖၣ် ဖီၣ်ဝဲကမျၢၢ်ဖိလၢ အတၢ်ကမၣ်တအိၣ်ဘၣ် ခဲလၢၥ် (၈) ဂၤအကျါ ပၣ်ဃုၥ်ဒီးပိၥ်မုၣ် (၁) ဂၤ ဒီး မၢဝဲသဝီသးပှၢ် လဲၤထုးထီၣ်က့ၤသဝီဖိတဖၣ် လၢစ့န့ၣ်လီၤ.
ဒူပျၥ်ယၥ်ကီၢ်ရ့ၣ် သုးက့ (၆) ဟီၣ်ကဝီၤပူၤ သုးမီၤစိရိၤအသုး ဒီးသုးခိးကီၢ်ဆၢ အသုးသ့ၣ်တဖၣ် ခးလီၤဝဲကျိဖးဒိၣ် လၢကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ အဖျၢၣ် (၁၂၅) ဘျဲၣ် ဒီး ဘၣ်သံဝဲနဲၢ် (၂) ပါ ဒီး ဘၣ်ဒိဝဲ ကမျၢၢ်ဖိ (၈) ဂၤအကျါ ပၣ်ဃုၥ်ဒီးဖိသၣ်သးနံၣ် (၁၀) နံၣ် အဖီလၥ် (၂) ဂၤဒီး ဘၣ်ဒိဃုၥ်စ့ၢ်ကီး နဲၢ် (၄) ပါ ဒီး တပွဲဖိ (၁) ပါန့ၣ်လီၤ. ဘၣ်အူအီၣ်ကွံၥ်ဝဲ ကမျၢၢ်ဖိအဟံၣ် (၂) ဖျၢၣ်, ဘၣ်ဟးဂီၤဝဲကမျၢၢ်ဖိအဟံၣ် ခဲလၢၥ် (၁၉) ဖျၢၣ်န့ၣ်လီၤ. ဘၣ်သံစ့ၢ်ကီးဝဲ ကမျၢၢ်ဖိအကျီၢ် (၅) ဒု, ဘၣ်ဒိဝဲ (၅) ဒုစ့ၢ်ကီးန့ၣ်လီၤ. သုးမီၤစိရိၤအသုး ကဘီယူၤဟဲခးလီၤတၢ်လၢ ကမျၢၢ်ဖိအဒူသဝီ, ကမျၢၢ်ဖိအတၢ်ဖံးအီၣ်မၤအီၣ်အလီၢ်အကျဲ ခဲလၢၥ်အိၣ်ဝဲ (၁၁) ဘျီ ဒီး ခးလီၤဝဲကျိဖးဒိၣ် အဖျၢၣ် (၃၀) ဘျဲၣ်န့ၣ်လီၤ.
တကီၢ်ခါ တၢ်အိၣ်သးခဲအံၤ ကမျၢၢ်ဖိလၢ ဒူသထူၣ်ကီၢ်ရ့ၣ်, ချၢၣ်လွံၢ်ထူၣ်ကီၢ်ရ့ၣ်, မုၢ်တြီၢ်ကီၢ်ရ့ၣ်, ဒူပျၥ်ယၥ်ကီၢ်ရ့ၣ် သ့ၣ်တဖၣ် ခီဖျိလၢ ကညီဒီကလုၥ် တၢ်ထူၣ်ဖျဲးသုးမုၢ်ဒိၣ် KNLA, ကညီဒီကလုၥ်ဂၢၤသးကရၢ KNDO ဒီး သုးမီၤစိရိၤအသုးသ့ၣ်တဖၣ် သုးခိးကီၢ်ဆၢ BGF အသုးသ့ၣ်တဖၣ် အဘၢၣ်စၢၤ တၢ်ဒုးကဲထီၣ်ဝဲ တပယူၥ်ဃီအဃိ ကမျၢၢ်ဖိလၢ ဘၣ်ဃ့ၢ်အိၣ်ခူသူၣ်လၢ တၢ်ပူၤဖျဲးအလီၢ်သ့ၣ်တဖၣ် တုၤခဲအံၤ တက့ၤအိၣ်ဘၣ်ဝဲလၢ အဒူသဝီပူၤဘၣ် ဒီး ဘၣ်အိၣ်ဒၣ်လၢ ပှၢ်လၥ်ကျါအဃိ ကမျၢၢ်ဖိသ့ၣ်တဖၣ် ဘၣ်ကွၢ်ဆၢၣ်မဲၥ်ဒီး တၢ်ကီတၢ်ခဲ အကလုၥ်ကလုၥ် ဒ်အမ့ၢ် တၢ်အီၣ်တၢ်အီ, တၢ်အိၣ်တၢ်ဆိး, တၢ်ကူတၢ်သိး ဒီး တၢ်လိၣ်အဂၤသ့ၣ်တဖၣ်န့ၣ်လီၤ.