ခီဖျိလၢ ပယီၤသုးအကဘီယူၤ (Helicopter airbus) ဟးယူၤဆှၣ်တၢ်လၢ သုးက့ ၅ သိၣ်ဒူစိသုးရ့ၣ် အဟီၣ်ကဝီၤပူၤအဃိ လီၢ်ကဝီၤပှၤဘၣ်မူဘၣ်ဒါ ခးအီၤ (Karen Version)

ဖဲ ၁၇-၁၀-၂၀၂၀ နံၤ (တပခ) အသုးဂ့ၢ်ဝီခိၣ် သုးခိၣ်ဒိၣ်စိ အီၣ်စိမ့ ဒီး အသကိးခဲလၢၥ် (၄) ဂၤ ဒိးဝဲ (Helicopter airbus) ဟးထီၣ်ဝဲဆူ တီအူ ဒီး အတၢ်ရဲၣ်တၢ်ကျဲၤအိၣ်ဝဲဒၣ်လၢ ကဟဲဆူ သံမုၢ်ထၣ် ပယီၤသုးကလၢၤအိၣ်တၢ်အလီၢ်န့ၣ်လီၤ. ဖဲဂီၤခီ ၁၀ နၣ်ရံၣ် ၅ မံးနံး အဆၢကတီၢ် ကမျၢၢ်ဖိထံၣ်ဝဲ ပယီၤသုးအကဘီယူၤတဘ့ၣ်အံၤ အိၣ်ဟဲဆူ မီၤဖူ ဒီး ဟဲယူၤဃီၤဝဲဆူ တခီးတိၢ်ဘီသဝီ ဒီး ဖဲန့ၣ် ပပှၤဟီၣ်ကဝီၤပှၤဘၣ်မူဘၣ်ဒါလၢ ဟံးမူဒါလၢ ဟီၣ်ကဝီၤဖဲန့ၣ်တဖၣ် ခးပယီၤသုးကဘီၤယူၤအံၤ န့ၣ်လီၤ. ပယီၤသုးကဘီယူၤတဘ့ၣ်အံၤ တက့ၤကဒါဘၣ်အမဲၥ်ညါ ဆဲးယူၤဃီၤကဒီးဆူ ပသိၣ်ဒူစိသုးရ့ၣ် ဝဲၤလီၢ်ခိၣ်သ့ၣ်တၢ်လီၢ်အဃိ ပပှၤသုးဖိလၢ ဟံးတၢ်ဘံၣ်တၢ်ဘၢတဖၣ် ခးကဒီးအီၤတတီၤ န့ၣ်လီၤ. ပပှၤသုးဖိခးအီၤဝံၤ ပယီၤကဘီယူၤတဘ့ၣ်အံၤ က့ၤယူၤဃီၤက့ၤဝဲဆူ လၢၢ်ကၠ့ဒီခိၣ် ဒီး စီၢ်လီၤဝဲဖဲ အသုးကလၢၤပူၤ ဖဲ ၁၁ နၣ်ရံၣ် ၁၂ မံးနံး အဆၢကတီၢ် န့ၣ်လီၤ. ဖဲ ၁၁ နၣ်ရံၣ် ၂၀ မံးနံး အဆၢကတီၢ် ပယီၤသုးကဘီယူၤတဘ့ၣ်အံၤ စးထီၣ်ဟးထီၣ်က့ၤဝဲဖဲ လၢၢ်ကၠ့ဒီခိၣ် ဒီး ဟးဆှၣ်ကွၢ်တၢ်လၢ လၢၢ်မုၢ်ပျီ စီၤမုၢ်ပျီ အဟီၣ်ကဝီၤပူၤ ဖဲ ပပှၤသုးဖိအိၣ်တၢ်အလီၢ်ဝံၤ ဖဲ ၁၁ နၣ်ရံၣ် ၄၀ မံးနံး အဆၢကတီၢ် ပယီၤသုးကဘီယူၤတဘ့ၣ်အံၤ က့ၤယူၤဃီၤကဒါက့ၤဝဲဆူ မုၢ်သဲၣ်န့ၣ်လီၤ. ပယီၤသုးကဘီယူၤတဘ့ၣ်အံၤ စီၢ်လီၤဝဲဒၣ်ဖဲ မုၢ်သဲၣ်ဖျၢၣ်ထူပျီ န့ၣ်လီၤ.
တဟါဃီ ပယီၤသုးအပှၤဘှီကဘီယူၤ (၄) ဂၤ ဟဲဝဲဆူ လၢၢ်ဒိၣ်လၢ (Helicopter) ဒီး ဒိးထီၣ်ဝဲသုးအသိလ့ၣ် (၂) ခိၣ် လၢတၢ်ဘံၣ်တၢ်ဘၢအဂီၢ်တခီ သုးသိလ့ၣ်ဒိၣ် (၅) ခိၣ် ခးတယးသုးနီၣ်ဂံၢ်ခဲလၢၥ် ကအိၣ်ဝဲ တကယၤဃၣ်ဃၣ် န့ၣ်လီၤ. ပယီၤသုးဆီလီၤဝဲ တၢ်ဘံၣ်တၢ်ဘၢ စးထီၣ်လၢ (ဘီဘြဲ) တုၤမုၢ်သဲၣ်ဒီး ဆီလီၤဝဲအသုးလၢ မုၢ်သဲၣ်ဖျၢၣ်ထူပျီဝး၀းန့ၣ်လီၤ.
ပယီၤသုးအကဘီယူၤတဘ့ၣ်အံၤ ခီဖျိပပှၤသုးဖိ ဟံးတၢ်ဘံၣ်တၢ်ဘၢလၢတၢ်မဲၥ်ညါတဖၣ် ခးအီၤဒီး ဘၣ်ဝဲကဘီယူၤအ (အင်ဂျင်ဝိုင် ပိုက် ဒီး အဲယၥ်းကွန်း ပိုက်) အဃိ ကဘီယူၤတဘ့ၣ်အံၤ က့ၤယူၤဝဲဆူ အတၢ်လီၢ် တတုၤလၢၤဘၣ်ဒီး ဘၣ်ဟဲက့ၤစီၢ်လီၤဝဲဒၣ်လၢ မုၢ်သဲၣ်ဖျၢၣ်ထူပျီ ဒီး အပှၤဘှီကဘီယူၤတဖၣ် ဘၣ်ဟဲထီၣ်ဘှီက့ၤကဘီယူၤတဘ့ၣ်အံၤန့ၣ်လီၤ. ပယီၤသုးအပှၤဘှီကဘီယူၤတဖၣ် ဘှီဝဲကဘီယူၤဝံၤဖဲ ၁၈-၁၀-၂၀၂၀ နံၤ ဂီၤခီ ၇ နၣ်ရံၣ် ၃၅ မံးနံး အဆၢတီၢ် (တပခ) အသုးဂ့ၢ်ဝီခိၣ် သုးခိၣ်ဒိၣ်စိ အီၣ်စိမ့ ဟဲက့ၤလီၤကဒါက့ၤဝဲဆူ လၢၢ်ဒိၣ် လၢသုးအသိလ့ၣ် န့ၣ်လီၤ.
(တပခ) အသုးဂ့ၣ်ဝီခိၣ် သုးခိၣ်ဒိၣ်စိ အီၣ်စိမ့ အတၢ်ဟဲတဘျီအံၤ တတဲကျၢဝဲ သုးက့ (၃) ဒီး သုးက့ (၅) အပှၤဘၣ်မူဘၣ်ဒါနီတမံၤဘၣ် လဲၤဝဲဖဲအသး ဒီး ဟးဆှၣ်ကွၢ်တၢ်လၢ ပပှၤသုးဖိအိၣ်တၢ်အလီၢ် ကမျၢၢ်ဒူဖိသဝီဖိအိၣ်တၢ်အလီၢ်အဃိ လၢတၢ်ဘံၣ်တၢ်ဘၢအဂီၢ် ပပှၤသုးဖိလၢ ဟံးမူဒါလၢဟီၣ်ကဝီၤဖဲန့ၣ်တဖၣ် ခးဝဲ ပယီၤသုးအကဘီယူၤတဘ့ၣ်အံၤန့ၣ်လီၤ.