လီၢ်ကဝီၤကမျၢၢ်တဖၣ် ဘၣ်ပျံၤဘၣ်ဖုးတၢ် အါထီၣ် ခီဖျိပယီၤသုး ခးလီၤကျိဖးဒိၣ်

၂၀၂၁ နံၣ် လါမးရှး ၈ သီ
ဖဲ လါမးရှးထီၣ် ၃ သီ ၂၀၂၁ နံၣ်အနံၤ ပယီၤသုး စကခ (၈) ခမရ (၄၁၀) သုးရ့ၣ်ခိၣ်မံၤ ထိလ့မၠ့ၣ်ဒီး ခမရ (၄၃၄) သုးရ့ၣ်ခိၣ်မံၤ မၠ့ၣ်စိအူ အပှၤအိၣ်ပီၥ်ပၢၢ်ကၠိ သုးကလၢၤ ခးလီၤကျိဖးဒိၣ် (၆၀ မးမး) (၃) ထံၣ် လၢအဘူးဒီး ခ့ထၣ်သဝီ ဖဲဂီၤ (၈း၄၅) ဆၢကတီၢ် (၂) ဖျၢၣ် ဒီး ဖဲသဝီဃၢၤ (၁) ဖျၢၣ်န့ၣ် ဘၣ်သံဃုၥ်ဝဲ ဆီတဘ့ၣ် န့ၣ်လီၤ. ဟံၣ်ဒူၣ်နီၣ်ဂံၢ်ခဲလၢၥ် အိၣ်ဝဲ (၃၆) ဖျၢၣ်, ပှၤနီၣ်ဂံၢ်ခဲလၢၥ်အိၣ်ဝဲ (၂၁၄) ဂၤ, မုၣ် (၁၀၇) ဂၤ, ခွါ (၁၁၁) ဂၤန့ၣ်လီၤ.

ပသ့ၣ်ညါဘၣ် သဝီဖိတဖၣ် လၢအဘၣ်စံၣ်ထီၣ်ကွံၥ်ဖဲ အသဝီ ဒီး စံၣ်အိၣ်လၢ တၢ်လီၢ်ခံတီၤ လၢအမ့ၢ်တဃီၤထၣ် ပှၢ်လၢ်ကျါတတီၤ ဟံၣ်ဒူၣ်နီၣ်ဂံၢ် ၄ ဒူၣ်, ပှၤနီၣ်ဂံၢ်ခဲလၢၥ် ၂၅ ဂၤ, အဂၤတတီၤမ့ၢ်ဝဲ လၢၢ်ဖးဒိၣ်ကျိ ဟံၣ်ဒူၣ်နီၣ်ဂံၢ် ၃၂ ဒူၣ် ပှၤနီၣ်ဂံၢ်ခဲလၢၥ် ၁၈၄ ဂၤန့ၣ်လီၤ. မ့မ့ၢ်သဝီဖိလၢ အစံၣ်အိၣ်ဖဲ တဃီၤထၣ်တဖၣ် ဟဲက့ၤလၢသဝီပူၤ တဘူၣ်ဒံးဘၣ်န့ၣ် ပသ့ၣ်ညါဘၣ်န့ၣ်လီၤ. အဂၤတဒူၣ် လၢအစံၣ်အိၣ်ဖဲ လၢၢ်ဖးဒိၣ်ကျိ အကျါတနီၤ ဟဲက့ၤအိၣ်လၢ ဟံၣ်အိၣ်ဒၣ်ထဲ ဟံၣ်ဒူၣ် (၃) ဒူၣ် ပှၤနီၣ်ဂံၢ်ခဲလၢၥ် ၁၇ ဂၤဒီး မ့မ့ၢ်အဂၤတဖၣ် အိၣ်ဒံးဝဲဒၣ်လၢ ပှၢ်ပူၤဒီး တနီၤအိၣ်ဒၣ် ဟဲက့ၤဘုၣ်ထိးဘုၣ်ဆီဝံၤ လဲၤအိၣ်ဒံးဒၣ်လၢ အစံၣ်အိၣ်ကဒုတၢ်လီၢ် ခီဖျိ ဘၣ်ယိၢ်ဝဲလၢ ပယီၤသုးကခးလီၤကဒီး ကျိဖးဒိၣ်န့ၣ်လီၤ.

မၤကဒီးဖဲ လါမးရှး ၆ သီ, ၂၀၂၁ နံၣ် ပယီၤသုး
 စကခ (၈) ခမရ (၄၁၀) သုးရ့ၣ်ခိၣ်မံၤ ထိလ့မၠၣ် ဒီး ခမရ (၄၃၄) သုးရ့ၣ်ခိၣ်မံၤ မၠ့ၣ်စိအူ အပှၤအိၣ် ပိၥ်ပၢၢ်ကၠိ သုးကလၢၤ ခးလီၤကဒီးကျိဖးဒိၣ် (၆၀-မးမး) ဖဲဟါလီၤခီ ၆ နၣ်ရံၣ် တုၤ ၁၁ နၣ်ရံၣ် အဆၢကတီၢ် ၃ ထံၣ် ဖဲသဝီဃၢၤ ၂ ထံၣ်, တထံၣ်န့ၣ် လီၤတဲၥ်ဖဲ ထံကျိပူၤ စီၤစုၤဒီး သဝီအကဲး ၁၀ န့ၣ်လီၤ. တကတီၢ်ဃီ သဝီဖိလၢ အအိၣ်တ့ၢ် ၃ ဒူၣ် ဖဲသဝီန့ၣ် ဃ့ၢ်ထီၣ်ကွံၥ်ဝဲဒၣ် ဒီး က့ၤအိၣ်က့ၤဝဲလၢ အသဝီ တဘူၣ်လၢၤဘၣ် အဂ့ၢ်န့ၣ်လီၤ.
ဒ်န့ၣ်အသိး ပသံကွၢ်စ့ၢ်ကီး ခ့ထၣ်ကၠိ သရၣ်မုၣ် လၢအမ့ၢ် နီၢ်ဘဲလ့ၣ်ဖီ စံးဝဲ "ဖဲပယီၤသုး ခးလီၤကျိဖးဒိၣ်အခါ ဘၣ်ဖဲသါအိၣ်ဖိဆံး ဝံၤတယံၥ်ဒံးဘၣ် ဒီး သါပျံၤတၢ်ဖုးတၢ် ဒီး သါတယးတၢ် တဘၣ်လၢၤဘၣ် န့ၣ်လီၤ." အဝဲစံးကဒီးဝဲ "ယအဲၣ်ဒိးလၢ ပယီၤသုးတဖၣ် ကက့ၤလီၤကွံၥ်လၢ ပဟီၣ်ကဝီၤပူၤ လၢအဆိန့ၣ်လီၤ."

စးထီၣ်လၢ လါယနူၤအါရံၤ ၁ သီ, ၂၀၂၁ နံၣ် ပယီၤသုးသ့ၣ်တဖၣ် ဟူးဂဲၤဝဲ လၢကျဲအါဘိ ဒ်အမ့ၢ် ဆှၢတၢ်အီၣ်, ဆှၢအါထီၣ်အပှၤဂံၢ်ဘါ လၢမုၢ်တြီၢ်ကီၢ်ရ့ၣ် ဟီၣ်ကဝီၤပူၤ တကးဒံးဘၣ် ခးလီၤကျိဖးဒိၣ် ကိးမုၢ်နံၤဒဲး ဃၣ်ဃၣ်ဆူ သဝီလၢ အအိၣ်ဘူးဒီး ပယီၤသုးကလၢၤတဖၣ် အဂ့ၢ်န့ၣ် ပသ့ၣ်ညါဘၣ်အီၤန့ၣ်လီၤ.